Showing posts with label မေးဖြေပြီးသမျှ [Q / A]. Show all posts
Showing posts with label မေးဖြေပြီးသမျှ [Q / A]. Show all posts

မေတ္တာပို့တာ သူ့အတွက်လား၊ ကိုယ့်အတွက်လား


”မေတ္တာရဲ့ သဘောက သူ့အတွက်ပို့ရင်း ကိုယ့်အတွက်လည်း အေးချမ်းခြင်း သဘောပါ”

ဒကာမလေးတစ်ယောက်က မေးဖူးပါတယ်။အရှင်ဘုရား မေတ္တာပို့တာဟာ ကိုယ့်အတွက် ပို့တာလား၊ သူများအတွက် ပို့တာလား”တဲ့။ ဟုတ်ပ။ သူမေးမှပဲ သတိပြုမိတော့တယ်။ ရုတ်တရက်ကြည့်ရင် ကိုယ့်မှာရန်သူတွေ နည်းစေဖို့ မေတ္တာကို ပွားများကြတာတွေလည်း ရှိနေတော့ ကိုယ့်အတွက် ပို့သလို ဖြစ်နေတတ်ပါတယ်။ အဲဒီ မေတ္တာရဲ့ သဘောက အေးချမ်းတယ်ဆိုတဲ့အတွက် ကိုယ့်မှာအပူတွေ ရှိနေတဲ့သူတွေဟာ မေတ္တာကို များများပွားလေ့ ရှိတတ်ကြတာဆိုတော့ တစ်ဖက်ကကြည့်ရင် မေတ္တာပို့တာဟာ ကိုယ့်အတွက် ပို့တာလို့ တွေးကောင်းတွေးနိုင်တာပေါ့။ 

အမှန်တော့ မေတ္တာဆိုတာ အကျိုးကိုလိုးလားခြင်း၊ အထူးသဖြင့် သူတပါးအကျိုးကို လိုလားခြင်း ဖြစ်တဲ့အတွက် မေတ္တာပို့တိုင်းပို့တိုင်း သူတပါး အကျိုးကို လိုလားပြီး ပို့ရတာ ဖြစ်ပါတယ်။ ဥပမာအားဖြင့် အလုံးစုံသော သတ္တဝါတွေ ဘေးရန်ကင်းပါစေ၊ စိတ်ဆင်းရဲခြင်းကင်းပါစေ၊ ကိုယ်ဆင်းရဲခြင်း ကင်းပါစေ၊ ချမ်းသာစွာ မိမိခန္ဓာဝန်ကို ရွတ်ဆောင်နိုင်ပါစေ ဆိုပြီး ဖြူစင်သန့်ရှင်းတဲ့ စိတ်နဲ့ ပို့တာဟာ မေတ္တာအပို့ခံရတဲ့သူရဲ့ အကျိုးကို လိုလိုလားလား ပို့သခြင်း ဖြစ်တဲ့အတွက် သူများအတွက် ပို့သခြင်းပဲ ဖြစ်ပါတယ်။ သူများအတွက်ကို ပို့သခြင်းကြောင့် ဖြစ်ပေါ်လာတဲ့ အေးချမ်းမှုကတော့ ကိုယ့်အတွက်လို့ပဲ ပြောရမှာ ဖြစ်ပါတယ်။

သူတပါး အကျိုးကို လိုလားပြီး သူများအတွက် မေတ္တာများများ ပွားနိုင်တဲ့သူဟာ သူတပါး ချမ်းသာလေ၊ ကိုယ်လည်းဝမ်းသာလေ ဖြစ်တဲ့အတွက် အဲဒီ မေတ္တာပွားနေ၊ မေတ္တာပို့နေတဲ့ ကိုယ့်စိတ်အစဉ်ဟာ အေးမြမှုကို ဖြစ်နေစေတာပါ။ မေတ္တာပွားများနေတဲ့အခိုက်မှာ ကိုယ့်သန္တာန်မှာ မေတ္တာရဲ့ ဆန့်ကျင်ဘက်ဖြစ်တဲ့ ဒေါသတွေ ပေါ်မလာတာဟာ ကိုယ့်အတွက် အပူသက်သာနေတာပါ။ အဲဒီလို ကိုယ်က မေတ္တာ ပို့လိုက်လို့ အပို့ခံရသူမှာ ကောင်းကျိုးတွေ ဖြစ်ထွန်းသွားပြီး ကိုယ့်ရဲ့မေတ္တာအရှိန်ကြောင့် ကိုယ့်အပေါ်မှာ ဖြစ်ပေါ်တဲ့ မကောင်းတဲ့ တုန့်ပြန်မှုတွေ မရှိတော့တာ စတာတွေဟာ ကိုယ်က သူတပါးအပေါ် စစ်မှန်တဲ့ အကျိုးကို လိုလားတဲ့စိတ်နဲ့ မေတ္တာပို့ပေးမှုရဲ့ တန်ပြန်သက်ရောက်မှု သဘောပဲ ဖြစ်ပါတယ်။ 

ဒါကြောင့် မေတ္တာဟာ သူ့အကျိုးကို လိုလားပြီး ပွားများရတဲ့ ဘာဝနာကျင့်စဉ်ဖြစ်ပေမယ့် ကိုယ့်အကျိုးကိုလည်း ပြီးမြောက်စေတဲ့ သဘောပဲ ဖြစ်တဲ့အတွက် မေတ္တာထားခြင်း၊ မေတ္တာပွားခြင်းဟာ သူ့အကျိုးရော ကိုယ့်အကျိုးပါ သက်ရောက်မှု ကောင်းစေတဲ့ အလွန်အေးမြတဲ့ ကျင့်စဉ်တစ်ခုဖြစ်ကြောင်း ဆိုခြင်း ဖြစ်ပါတယ်။ 

Read more »

FACEBOOK က အမေးတစ်ပုဒ်


မေး။ Thet Lay (https://www.facebook.com/thet.hlaing.9)
အရှင်ဘုရား ရှိခိုးကန်တော့ပါတယ်ဘုရား။ အချိန်ရရင် တခုလောက်ဖြေကြားပေးပါ။ ရင်ထဲမှာ သိချင်စိတ်ဖြစ်လာလွန်းလို့ပါဘုရား။ အမှားပါရင် ခွင့်လွတ်ပါ။ တပည်တော်မတို့အိမ်မှာ မွေးထားတဲ့နွားနှစ်ကောင်က ဖေကရောင်းထုတ်ပစ်လိုက်တယ်လို့ ခုပဲသိရပါတယ်ဘုရား။ ရင်ထဲမှာတွေးမိပြီး သနားပြီး စိတ်ကောင်းဖြစ်ပြီး ငိုမိပါတယ် ဝဋ်ကြွေးကြေတာပေါ့လေလို့ပဲ ဖြေသိမ့်လိုက်ရပါတယ် တပည်တော်မ သိချင်တာက ကြောင်းမကောင်းခဲ့လို့ သူတို့တိရစ္ဆာန်ဘဝ ရောက်ခဲ့ရတယ်ထား။ သူတို့ကို ဘဝကောင်ရောက်အောင် ဘယ်လိုမျိုးလုပ်ပေးရင် ရပါသလဲ။ ဘယ်လိုမှလုပ်ပေးလို့ မရတော့ဘူးလား။ တပည်တော်မကနေ သူတို့ရဲ့ ကံတရားကောင်အောင် ဘာများလုပ်ပေးလို့ ရနိုင်မလဲဘုရား။ လူတစ်ယောက် ဆုံးပါးသွားရင်တော့ အလှူအတန်းလုပ်ပေးရင် ရနိုင်တယ်လို့ပြောပါတယ် ဒီလိုတိရိစ္ဆာန်လေးတွေ အတွက်ရော လုပ်ပေးလို့ ရပါသလားဘုရား အချိန်ရင် ဖြေကြားပေးတော်မူပါ့ဘုရား။

ဖြေ။ မနာပဒါယီ အရှင်ဝိစိတ္တ (https://www.facebook.com/ashinvicitta)
နိမ့်ကျတဲ့ ဘဝကို ရောက်နေတဲ့ တိရစ္ဆာန်တွေအတွက်လည်း ကောင်းတဲ့ဘဝကို ရောက်အောင် ပြုလုပ်ပေးနိုင်ပါတယ်။ အထူးသဖြင့် လူနဲ့အနီးဆုံး ဖြစ်နေတဲ့ ခွေးကြောင်နွား စတဲ့ သတ္တဝါတွေအတွက် လုပ်ပေးနိုင်ဖို့ အခွင့်အရေး ပိုများကြပါတယ်။ တစ်ချို့ သတ္တဝါတွေဟာ လူတွေရဲ့ မေတ္တာဓာတ်၊ လူတွေရဲ့ သင်ကြားပေးမှုကြောင့် ကောင်းတဲ့ အမူအကျင့်လေးတွေ လုပ်တတ်နေတာကို တွေ့ရတတ်ပါတယ်။ ဥပမာအားဖြင့် ရဟန်းသံဃာတွေ ဆွမ်းခံကြွလာတဲ့ အခါ သံဃာမှန်းသိပြီး ခရီးဦးကြိုတာ၊ အသိအမှတ်ပြုတာ၊ လူတွေလုပ်သလို လိုက်လုပ်တာ စတာတွေဟာ သူတို့ကို ကောင်းတဲ့ဘဝကို ထောက်ပံ့ပေးနိုင်တဲ့ ကံတွေပဲ ဖြစ်ပါတယ်။ 

ရှေးအခါက နွားကျောင်းသားတစ်ဦးရဲ့ အိမ်မှာမွေးထားတဲ့ ခွေးလိမ္မာတစ်ကောင် ရှိခဲ့ဖူးပါတယ်။ အဲဒီခွေးလေးဟာ နွားကျောင်းသား ကိုးကွယ်တဲ့ ရဟန်းတော်ကို အကြိုအပို့ လုပ်တဲ့အခါမှာ လမ်းခရီးတစ်လျှောက် အန္တရာယ် မကျရောက်အောင် အသံဟောင်ပြီး ရှင်းလင်းပေးလေ့ရှိပါတယ်။ နောက်ပိုင်း အဲဒီ ကုသိုလ်အရှိန်နဲ့ သေလွန်တဲ့အခါ နတ်ပြည်မှာ အသံကောင်းတဲ့ ဃောသက နတ်သားအဖြစ်ကို ရရှိခဲ့ပါတယ်။ (ကျမ်းကိုး- ဃောသကသူဌေး- မဟာဗုဒ္ဓဝင် တတိယတွဲ) ဒါကိုကြည့်ရင် သတ္တဝါတွေကို အသက်ရှင်နေတဲ့ အခိုက်မှာ ကောင်းတဲ့အလေ့အကျင့်လေးတွေ လုပ်ပေးရင် ဒီကုသိုလ် အရှိန်နဲ့ ကောင်းတဲ့ဘုံဘဝကို ရောက်နိုင်တယ်ဆိုတာ နားလည်နိုင်မှာ ဖြစ်ပါတယ်။

နောက် အဲဒီသတ္တဝါတွေ သေပြီးသွားတဲ့အခါမှာလည်း လူတွေလို သူတို့ကို အာရုံပြု ရည်စူးပြီး အမျှပေးဝေပါက သာဓုခေါ်နိုင်တဲ့ဘဝကနေ သာဓုခေါ်ပါက ဒီအကျိုးကျေးဇူးကြောင့် ကောင်းတဲ့ဘဝကိုလည်း ရရှိစေနိုင်တာ ဖြစ်ပါတယ်။ များသောအားဖြင့် လူတွေကို ခင်တွယ်တဲ့ သတ္တဝါတွေဟာ သေတဲ့အခါမှာလည်း သူတို့ခင်မင်တဲ့ သူတွေကို စွဲလန်းတဲ့ စိတ်နဲ့သေးသွားနိုင်ပြီး အဲဒီအစွဲကြောင့်ပဲ အိမ်နီးဝန်းကျင်မှာ ပြိတ္တာအဖြစ် ကျင်လည်ရတာလည်း ရှိကောင်းရှိနိုင်ပါတယ်။ အဲဒီလို ပြိတ္တာဘဝ ရောက်သွားတဲ့ တိရစ္ဆာန်တွေကိုလည်း ကုသိုလ်လုပ် အမျှပေးဝေးတဲ့အခါ အဲဒီဘဝကနေ သူတို့သာဓု ခေါ်နိုင်ပါက ဒီအဖို့အစုကို ရရှိပြီးကောင်းတဲ့ ဘုံဘဝမှာ ပြန်လည်ဖြစ်နိုင်တာ ဖြစ်ပါတယ်။ 

ဒါကြောင့် တိရစ္ဆာန်ဘဝမှာ ရှိတဲ့ သတ္တဝါတွေဟာ လူတွေလောက် အသိဉာဏ်မရှိတဲ့အတွက် အဲဒီ နိမ့်ကျတဲ့ ဘဝကနေ ကောင်းတဲ့သုဂတိဘဝကို ပြန်ရောက်ဖို့ ခဲရင်းပေမယ့် အဲဒီသတ္တဝါတွေကို လူတွေက ကလျာဏမိတ္တအနေနဲ့ အထက်မှာပြောခဲ့တဲ့အတိုင်း သူတို့အသက်ရှင်နေတုန်းနဲ့ သေပြီးနောက်ပိုင်းတွေမှာ ကုသိုလ်အလေ့အကျင့်တွေ၊ ကုသိုလ်အဖို့အစုတွေနဲ့ ကောင်းတဲ့ဘုံဘဝကိုရောက်အောင် ကူညီလို့ ရနိုင်ကြောင်း ဆိုခြင်းဖြစ်ပါတယ်။ 

Read more »

Facebookက အမေးတစ်ပုဒ် (၁၁)


မေး။ Maghalulin (http://www.facebook.com/magha.lulin)
အရှင်ဘုရား…
မွေးနေ့အထိမ်းအမှတ်အဖြစ် သူငယ်ချင်းတွေကို အရက်ဝယ်တိုက်ပြီး အရက်ဖိုးဒကာခံပေးတာ ကုသိုလ်ရပါသလားဘုရား။ တပည့်တော်ကတော့ မသောက်ပါဘူးဘုရား။ သူငယ်ချင်းများရဲ့ ဆန္ဒကို ဖြည့်ပေးတဲ့အနေနဲ့ သူတို့ဖြစ်ချင်တာကို လုပ်ပေးတာပါဘုရား။ အဲလိုလှူတာ အကျိုးရှိမရှိ။ သူတပါးလိုအပ်တာကို ဖြည့်ပေးတာဖြစ်တဲ့အတွက် ကောင်းတဲ့အလုပ်လို့ ယူလို့ရမရ သိချင်ပါတယ်ဘုရား။ ကျေးဇူးတင်ပါတယ်။

ဖြေ။ မနာပဒါယီ အရှင်ဝိစိတ္တ (http://www.facebook.com/ashinvicitta)
သူတပါးလိုအပ်တာကို ဖြည့်ပေးတဲ့နေရာမှာ ကောင်းတဲ့အရာ ကောင်းတဲ့လိုအပ်ချက်တွေကို ဖြည့်ပေးမှသာ တကယ့်ကောင်းတဲ့အလုပ်လို့ ယူဆလို့ရပြီး မိတ်ဆွေအစစ်လို့ ယူဆလို့ရပါတယ်။ အပါယသဟာယ မိတ္တလို့ခေါ်တဲ့ မကောင်းတဲ့အရာတွေမှာ အပေါင်းအဖော်ဖြစ်တာ လိုက်လျောတာ ဖြည့်ဆည်းပေးတာဟာ မကောင်းမှုကို အားပေးရာရောက်တဲ့အတွက် မိတ်ဆွေအတု လက္ခဏာထဲမှာ ပါဝင်ပါတယ်။

အရက်ဝယ်တိုက်ပြီး အရက်ဖိုး အလှူပြုပေးတာ ကုသိုလ်လုံးဝမရတဲ့အပြင် အကျိုးလည်းမရှိပါ။ အရက်မဟုတ်ဘဲ တခြားအစားအသောက် အလှူမျိုးဆိုရင်တော့ ကုသိုလ်ရပါတယ်။ အရက်ကတော့ မလှူကောင်းတဲ့အလှူ၊ တစ်နည်းအားဖြင့် အပါယ်လားစေနိုင်တဲ့ အလှူထဲမှာ ပါလို့ပါ။ ဘုန်းဘုန်းတို့ ပရိဝါပါဠိတော်မှာ မလှူကောင်းတဲ့ အလှူငါးမျိုးကို ဖော်ပြထားပါတယ်။ အဲဒီငါးမျိုးက

(၁) မဇ္ဇဒါန = သေရည်အရက် ဘိန်းစတဲ့ ယစ်မျိုးအလှူ
(၂) သမဇ္ဖဒါန = ဇာတ်၊ ရုပ်သေး၊ အငြိမ့်စတဲ့ အဆိုအတီးကချေသည် သဘင်အလှူ
(၃) ဣတ္ထိဒါန = ကာမအမှုအတွက် အလိုဖြည့်စေရန် မိန်းမအလှူ
(၄) ဥသဘဒါန = နွားမတို့အလယ်တွင် ထယ်ဝါခန့်ငြားတဲ့ နွားလား၊ နွားသိုးကြီးတို့ကို လွှတ်ပေးတဲ့ အလှူ
(၅) စိတ္တကမ္မဒါန = ကာမရာဂစိတ်ကို ဖြစ်ပေါ်စေတဲ့ ပန်းချီ၊ ပန်းပုရုပ် စတဲ့ သုခုမအနုပညာ အလှူ တို့ဖြစ်ပါတယ်။
ဒီအလှူငါးမျိုးအပြင် တစ်ခြား မလှူကောင်းတဲ့ အလှူတွေလည်း ရှိပါသေးတယ်။ အဲဒါတွေကတော့
-သတ္တဒါနလို့ခေါ်တဲ့ လက်နက်ခဲယမ်းအလှူ
-၀ိသဒါနခေါ်တဲ့ သေကျေပျက်ဆီးစေတဲ့ အဆိပ်အလှူ
-သင်္ခလိကဒါနခေါ်တဲ့ လက်ထိပ်သံခြေချင်းအလှူ
-ကုက္ကဋ သူကရဒါနခေါ် ကြက်ဝက်သားကောင်အလှူ စတာတွေပါ။

ဒါကြောင့် အထက်ပါအလှူများဟာ ဘယ်လောက်ပဲ အကုန်ကျခံ လှူဒါန်းပေးကမ်းပေမယ့် အကျိုးမရှိ၊ ကုသိုလ်မဖြစ်တဲ့ အလှူတွေ ဖြစ်တဲ့အတွက် မွေးနေ့မှာ အရက်ဖိုးလှူပြီး ဧည့်ခံကျွေးမွေးတာဟာ ကုသိုလ်မဖြစ်ပါဟု ဖြေကြားလိုက်ပါတယ်။ အရက်မှ မဟုတ်ပါ ဒီမှာဖော်ပြထားတဲ့ အလှူအားလုံးကို အလှူပြုတဲ့အခါ မလှူဖြစ်အောင် ကျိုးစားပြီး အပြစ်ကင်းတဲ့ အလှူဖြစ်အောင် တစ်ခြားအရာတွေကိုသာ လှူကြပါလို့လည်း တိုက်တွန်းလိုက်ပါတယ်။ 

Read more »

Facebookက အမေးတစ်ပုဒ် (၁၀)


မေး။ Myat Min San 
အရှင်ဘုရား တပည့်တော် ဦးတင်ပါတယ်ဘုရား။ အရှင်ဘုရားရေးသားတဲ့ တရားတွေလဲ ဖတ်ပါတယ် ဘုရား တပည်တော် တစ်ခုလောက် မေးပါရစေဘုရား။ မြတ်စွာဘုရား တရားတော်တွေကို ရွတ်ဆိုရင်ကုသိုလ် ရတယ် ဆိုတာကို ဘယ်လိုကြောင့် ဘယ်ဟာက ဘယ်လို အကျိုးပြုတယ်ဆိုတာ နဲနဲလောက် ရေးသားပေးပါဘုရား။ တပည့်တော်က ဘုရားရှီခိုးရင် ပရိတ်ကြီး ၁၁ သုတ်ထဲက မင်္ဂလသုတ်၊ မေတ္တာသုတ်နဲ့ ကျန်တဲ့ တိုတဲ့ ပရိတ်တွေအားလုံး ရွတ်ပါတယ် ဘုရား၊ ပဋ္ဌာန်း ပစ္စယနိဒ္ဒေသလည်း ရွတ်ပါတယ် ဘုရား။ ဒါပေမယ် သူများတွေ မေးလာတဲ့အခါ မှာ ဘယ်လို အကျိုး ပြုတယ်ဆိုတာ တပည်တော့ သေချာ မရှင်းတတ်ပါဘု၇ား။ ဒါပေမယ် တပည့်တော် ဘုရားရှိခိုး မထားရင်တော့ နေလို့မပျော်ပါဘူး ဘုရား။ စိတ်တော့ ပျော်ရွှုင်ပါတယ် ဘုရား။ ကျေးဇူးတင်ပါတယ်ဘုရား။ ဦးတင်ပါတယ် ဘုရား။

ဘုရားရှင်ရဲ့ တရားတော်တွေကုို ရွတ်ဆုိုပူဇော်တာ ဓမ္မာနုဿတိ ဘဝနာပဲ ဖြစ်ပါတယ်။ ဓမ္မာနုဿတိ ဘာဝနာဟာ သမထကမ္မဋ္ဌာန်း (၄၀)မှာ အကျုံးဝင်တဲ့ ကျင့်စဉ်တစ်ခု ဖြစ်တဲ့အတွက် မှန်ကန်တဲ့ ဘာဝနာ ကျင့်စဉ်တစ်ခုလည်း ဖြစ်ပါတယ်။ သမထကျင့်စဉ်ဟာ တည်ငြိမ်အေးချမ်းမှု သမာဓိ အားအစွမ်းကုို ဖြစ်စေတဲ့အတွက် တရားတော်များကုို ရွတ်ဆုိုပူဇော်နေသူတွေဟာ အဲဒီအခုိုက်အတန့်မှာ ကိလေသာတွေကုို အခုိုက်အတန့်အားဖြင့် ပယ်ခွာထားနုိုင်ပြီး တည်ငြိမ်အေးချမ်းမှုကုို ရရှိစေနုိုင်တာ ဖြစ်ပါတယ်။ ဒီထက်တစ်ဆင့်တက်ပြီး အဲဒီ ဓမ္မာနုဿတိဘာဝနာကုိုပဲ ရွတ်စဉ်တဲ့အသံနဲ့ ရွတ်စဉ်တဲ့ ဟန်၊ လှုပ်ရှားနေတဲ့ ပါးစပ်ရုပ်တရားတွေ အပေါ်မှာ ဓာတ်ကြီးလေးပါးတင်ပြီး ဝိပဿနာ အဖြစ် ရှုပွားနုိုင်ရင် ဝိပဿနာဉာဏ်ဖြစ်ကာ နောက်ဆုံး ကိလေသာကုို အကြွင်းမဲ့ ခွာနုိုင်တဲ့အထိ အကျိုးသက်ရောက်မှုကုို ဖြစ်စေတာ ဖြစ်ပါတယ်။ 

သာမန်သူတွေအနေနဲ့ အဲဒီလုို ဓမ္မာနုဿတိကုို ဝိပဿနာအဆင့်အထိ မရှုမှတ်နုိုင်သေးပေမယ့်လည်း တရားတော်တွေကုို ရွတ်ဖတ်ပူဇော်နေတဲ့ အချိန်မှာ ခုနပြောခဲ့သလုို ကုသုိုလ်တရားတွေ တုိုးပွားနေပြီး စိတ်အစဉ်မှာ တည်ငြိမ်အေးချမ်းနေတတ်တာ အမှန်ပဲ ဖြစ်ပါတယ်။ ပြီးတော့ ဝစီကံ ကုသုိုလ်အနေနဲ့လည်း ပါးစပ်က ဒီအတုိုင်းထားရင် တခြားအကုသုိုလ်ဖြစ်စရာ အကျိုးယုတ်စရာ စကားတွေ ပြောဆုိုနေမိတတ်ပေမယ့် အခုလုို တရားတော်တွေကုို ရွတ်ဖတ်ပူဇော်နေတဲ့ အချိန်မှာ ဝစီကံ ကုသုိုလ်ကတော့ ရနေစေတာ အသေအချာပဲ ဖြစ်ပါတယ်။ 

နောက်တစ်ချက်က တရားတော်ကုို ရွတ်ဖတ်ပူဇော်နေတဲ့ အချိန်မှာ ကုိုယ်မမြင် မတွေ့နုိုင်တဲ့ သူတော်ကောင်း နတ်တွေက အချိန်မရွေး လာပြီး နာယူမှတ်သားတတ်တဲ့အတွက် တရားတော်များကုို ရွတ်ဖတ်သူတွေမှာ သူတော်ကောင်းနတ်တွေရဲ့ စောင့်ရှောက်မှုကုို ရရှိစေနုိုင်သလုို အဲဒီလုို သူတော်ကောင်းတွေ နာယူခွင့်ရအောင် ရွတ်ဖတ်ပူဇော်ကာ ဓမ္မကုို အသံနဲ့ မျှဝေပေးနုိုင်တဲ့အတွက် တရားအလှူလည်း ဖြစ်နေတာ ဖြစ်ပါတယ်။ သဗ္ဗဒါနံ ဓမ္မဒါနံ ဇိနာတိ- အလှူတကာ အလှူထဲမှာ တရားအလှူဟာ အကောင်းဆုံး အသာဆုံး အမြတ်ဆုံးလုို့ ဘုရားဟောတော်မူထားတဲ့အတွက် အမြတ်ဆုံး တရားအလှူကုို လှူရာလည်း ရောက်နေတာ ဖြစ်ပါတယ်။

သေချာတာကတော့ တရားတော်ကုို ရွတ်ဖတ်ပူဇော်နေတဲ့ ကုိုယ်ကုိုယ်တုိုင်ကတော့ နေ့စဉ် ဓမ္မာနုဿတိ ဘာဝနာဖြစ်နေသလုို ဘာဝနာကုသုိုလ်တွေကုို လုပ်ဖြစ်နေတာ ဖြစ်တဲ့အတွက် စိတ်အစဉ်မှာ တည်ငြိမ်ပြီး အေးချမ်းနေတတ်တာပဲ ဖြစ်ပါတယ်။ ဒါကြောင့် တရားတော်များကုို ရွတ်ဖတ်ပူဇော်ခြင်းဟာ အထက်မှာ ဖော်ပြပေးခဲ့တဲ့ ကောင်းကျိုးများအပြင် ဖော်မပြနုိုင်တဲ့ အကျိုးတရားတွေကုိုလည်း ရရှိစေနုိုင်တာ ဖြစ်တဲ့အတွက် အလွန်မွန်မြတ်တဲ့ ကုသုိုလ်ထူးဖြစ်ကြောင်း လုိုရင်းချုပ်၍ အဖြေထုတ်ပေးလုိုက်ရပါတယ်။

Read more »

Facebook က အမေးတစ်ပုဒ် (၉ )


မေး။ Xing Xing Su Hlaing

အရှင်ဘုရား..တပည့်တော်ဦးစွာရှစ်ခိုးဦးခိုက်လိုက်ပါတယ်။ 
_/\__/\__/\_ Facebook မှာ အရှင်ဘုရားရဲ့တရားများကို အမြဲဖတ်ရှု မှတ်သားရပါတယ်။ အရှင်ဘုရားရဲ့တရားတွေကြောင့်လည်း တပည့်တော် တရားအသိတရာမှန် တွေအများကြီးရပါတယ်။ အဲ့အတွက်လည်း အရှင်ဘုရားရဲ့ကျေးဇူး ကိုအမြဲအမှတ်ရနေပါတယ်။ အခုလည်း တပည့်တော်သိချင်တာလေး တစ်ခုလောက်မေးလျှောက်ချင်လို့ပါဘုရား။ လူတစ်ယောက်သေပြီးရင်နောက်ဘ၀တစ်ခုကို ချက်ချင်းကူးပြောင်းတယ် လို့ သိရပါတယ်။ ၀ိညာဉ်ဆိုတာမရှိဘူးလို့ဆိုတယ်။တပည့်တော်နားမ လည်တာက နာရေးတွေမှာတွေ့ရတဲ့လိပ်ပြာခေါ်တယ်ဆိုတာပါပဲ။ အသုဘချတဲ့နေ့မှာသေသူရဲ့လိပ်ပြာကို အ်ိမ်ကိုခေါ်လာရတဲ့အလေ့တစ်ခု ကိုလုပ်ကြတယ်။ လိပ်ပြာခေါ်လာတဲ့သူက စကားမပြောရဘူးနာက်လှည့် မကြည့်ရဘူးလို့ပြောပါတယ်။ ဘာကြောင့်အဲ့လိုလုပ်ရတာလည်းဆိုတာ ရယ်၊ လိပ်ပြာတစ်ကယ်ခေါ်လို့ရသလားဆိုတာတပည့်တော်သိချင်ပါ တယ်ဘုရား။ ဒီဘက်ဘ၀သေတာနဲ့နောက်ဘ၀တစ်ခုကိုချက်ချင်းပြောင်း တယ်ဆိုတော့သေသူရဲ့ဝိညာဉ်ကိုဘယ်လိုခေါ်လို့ရလည်းဆိုတာကို တပည့်တော်ရှင်းရှင်းလင်းလင်းသိချင်ပါတယ် ဘုရား။ တပည့်တော်က ဗုဒ္ဓဘာသာကိုသက်ဝင်ယုံကြည်တဲ့ဗုဒ္ဓဘာသာစစ်စစ်တစ်ယောက်ပါ။ ခုလိုမေးတာ တရားတော်တွေကိုမယုံလို့မဟုတ်ပါဘူး။ တပည့်မသိသေး တာသိချင်တာ၊ အမြင်မှားနေတာကိုအမှန်ရချင်တာပါဘုရား။ အရှင်ဘုရားအချိန်ရတဲ့အခါတပည့်တော်မေးခွန်းလေးကိုဖြေပေးပါဘုရား။ 
အရှင်ဘုရားကျန်းမာချမ်းသာစွာဖြင့် သာသနာအကျိုးကိုထမ်းဆောင်နိုင်ပါစေ ဘုရား။


မင်္ဂလာပါ 
မေးသင့်တဲ့ မေးခွန်းပဲ ဖြစ်ပါတယ်။ သေတာနဲ့ ပတ်သက်ပြီး ဗုဒ္ဓဘာသာ အလုိုအရတော့ ရုပ်ဇီဝိတလုို့ခေါ်တဲ့ ရုပ်သက်နဲ့ နာမ်ဇီဝိတလုို့ ခေါ်တဲ့ နာမ်သက်ချုပ်သွားတာကုို သေတာလုို့ ပြောတာဖြစ်ပါတယ်။ သတ္တဝါ တစ်ဦးတစ်ယောက် သေသွားတယ်ဆုိုတာ အဲဒီလုို နာမ်ရုပ်ချုပ်သွားတာကုို ဆုိုတာဖြစ်တဲ့အတွက် တစ်ချို့တစ်ချို့ ထင်နေသလုို ရုပ်သာသေပြီး ဝိညာဉ်က မသေဘဲ တခြားဘဝ ကူးပြောင်းသွားတယ်ဆုိုတာ မဟုတ်ပါဘူး။ ဗုဒ္ဓဘာသာ အယူအဆမှာ ဝိညာဉ်ဆုိုတာလည်း မရှိပါဘူး။ သတ္တဝါ တစ်ဦးတစ်ယောက် အဲဒီနာမ်သက်၊ ရုပ်သက်ချုပ်သွားတာနဲ့ တစ်ပြိုက်တည်း ဘဝတစ်ခုကုို ကူးပြောင်းသွားတာ ဖြစ်ပါတယ်။ ဝိညာဉ်လိပ်ပြာ မရှိရင်ဘာက ကူးသွားတာလဲလုို့ မေးစရာရှိပါတယ်။ ကံစွမ်းတွေက ဘဝသစ်ကုို ပုံဖော်ပြီး ကူးပြောင်းသွားတာ ဖြစ်ပါတယ်။ မသေခင် ပြုလုပ်ထားတဲ့ ကံသုိုလ်ကံ၊ အကုသုိုလ်ကံတွေရဲ့ အစွမ်းတွေနဲ့ ကောင်းကံတွေ လုပ်တဲ့သူတွေဟာ ကောင်းတဲ့သုဂတိ ဘုံတွေမှာ ပြန်ဖြစ်တာဖြစ်ပြီး မကောင်းကံတွေ လုပ်တဲ့သူတွေဟာ မကောင်းတဲ့ ဒုဂ္ဂတိဘုံတွေမှာ ချက်ချင်းဖြစ်ကြရတာ ဖြစ်ပါတယ်။ ဒီလုို ကံစွမ်းတွေနဲ့ ဘဝအသစ်ကုို ဖြစ်တဲ့သူတွေအနေနဲ့ ဘဝတစ်ခု ချုပ်သွားတာနဲ့ နောက်ထပ်ဘဝတစ်ခုမှာ ချက်ချင်းသွားဖြစ်တာ ဖြစ်ပါတယ်။ ကြားမှာ ဟုိုမှာနေတာ၊ ဒီမှာနေတာ၊ ဘယ်နှစ်ရက်နေမှ ထွက်သွားတာ၊ ဘယ်နှစ်ရက်နေမှ ကျွတ်သွားတာ စတာတွေ မရှိပါဘူး။ 

တစ်ခါတလေ တစ်ချို့သတ္တဝါတွေဟာ သေပြီးနောက်မှာ မိမိတုို့နဲ့ သက်ဆုိုင်တဲ့ ဝန်းကျင်နားမှာ တစ်ခုခု ပုံရိပ်ပြတာတုို့၊ အသံပြုတာတုို့ စသဖြင့် လုပ်ပြတတ်တာတွေ ရှိပြီး သူ့အတွက် ကုသုိုလ်လုပ် အမျှပေးဝေပြီးမှာ ပျောက်သွားတာမျိုးတွေ ရှိတတ်ပါတယ်။ ဒီသဘောတွေဟာလည်း ဘဝကူးရေးအတွက် ကြားခံအနေနဲ့ ဝိညာဉ်လိပ်ပြာ ပုံစံမျိုးမဟုတ်ပါဘူး။ ဒါဟာ သေပြီးပြီးချင်း ဘဝအသစ်တစ်ခုမှာ ဖြစ်သွားတာပဲ ဖြစ်ပါတယ်။ သေခါနီးမှာ အစွဲတစ်ခုခုကြောင့် သေသွားတဲ့ သတ္တဝါတွေဟာ ပေတဆုိုတဲ့ တစ္ဆေ၊ သရဲ၊ ပြိတ္တာ၊ နာနာဘာဝလုို ဘဝမျိုးမှာ သွားဖြစ်တာပဲ ဖြစ်ပါတယ်။ လိပ်ပြာကောင်လေး၊ ဝိညာဉ်ကောင်လေး အနေနဲ့ လှည့်လည်နေတဲ့ သဘောမျိုး မဟုတ်ပါဘူး။ နောက်တော့ အဲဒီ ပြိတ္တာဘဝကနေ ကျန်ခဲ့တဲ့သူတွေရဲ့ ကုသုိုလ်အဖုို့ကုို အမျှရပြီး နောက်ထပ်ဘဝ အသစ်ကုို ရောက်သွားတဲ့အခါမှာ ဒီလိုတစ္ဆေသရဲ ပြိတ္တာဘဝက လွတ်သွားခြင်း သဘောမျိုးဖြစ်ပါတယ်။ ဒီလုို တစ်ဘဝကနေ တစ်ဘဝကို ကူးပြောင်းသွားတာဟာ ကံစွမ်းတွေပဲ ဖြစ်ပြီး ဝိညာဉ်က ကူးသွားတာ မဟုတ်ပါဘူး။

ဆိုတော့ကား မေးခွန်းရှင်ပြောသလို နားရေးတွေမှာ လိပ်ပြာခေါ်တာ၊ အုိုးခွဲတာ စတာတွေဟာ အရိုးစွဲနေတဲ့ ရှေးရိုးအယူအဆတွေလုို့ပဲ ပြောရမှာ ဖြစ်ပါတယ်။ တကယ်လည်း လိပ်ပြာဆုိုတာ မရှိသလုို၊ မရှိတဲ့ လိပ်ပြာဆုိုတာလည်း ခေါ်လုို့ရတာ မဟုတ်ပါဘူး။ တကယ်လုို့ တုိုက်တုိုက်ဆုိုင်ဆုိုင် အဲဒီလုို လုပ်ခဲ့လုို့ အိမ်မှာ ထူးခြားမှုဖြစ်တာ၊ အသံပြုတာ၊ အနံ့နံတာ၊ ခြောက်တာ စတာတွေ ဖြစ်ခဲ့ရင် ဒါဟာ လိပ်ပြာက သုဿာန်က ပါလာတာမဟုတ်ဘဲ ပေတဆုိုတဲ့ ပြိတ္တာဘဝက ရောက်သွားတဲ့ သေသူရဲ့ ပုံရိပ်လုို့ပဲ ပြောရမှာ ဖြစ်ပါတယ်။ ဘုန်းဘုန်းတုို့ မြန်မာပြည်မှာ သေသူနဲ့ ပတ်သက်ပြီး အဲဒီလုို အရုိုးစွဲနေတဲ့ ရေးရုိုးစွဲအယူအဆတွေ အများကြီး ရှိနေတတ်ပါတယ်။ ဥပမာ သေသွားတဲ့ ရုပ်ကောင်ကုို သရဏဂုံတင်တာတုို့၊ သေသူကုို မီးမသဂြိုဟ်ခင် သူကြိုက်တတ်တဲ့ အစားအသောက်တွေ ပြင်ဆင်ပြီး ကျွေးတာတုို့၊ သေသူအတွက် ဘာပစ္စည်း၊ ညာပစ္စည်း ထည့်ပေးတာတုို့ စသဖြင့် အများကြီးပါပဲ။ ဒါတွေဟာ တကယ်တော့ လွဲမှားနေတဲ့ ရှေးရုိုးစွဲ အယူအဆတွေပဲ ဖြစ်ပါတယ်။ ဗုဒ္ဓဘာသာရဲ့ အယူအဆ မဟုတ်ပါဘူး။ တစ်ချို့လည်း ဘာမှမသိတော့ ဒီလုို လုပ်ပေးရတယ်ထင်ပြီး နောက်မျိုးဆက်တွေက ဆက်လုပ်နေကြခြင်းပဲ ဖြစ်ပါတယ်။ အကျိုးသက်ရောက်မှု ရှိလုို့တော့ မဟုတ်ပါဘူး။ သေသူအတွက် အကောင်းဆုံးနဲ့ အကျိုးသက်ရောက်မှု အရှိဆုံး အလုပ်က အဲဒီ ပုဂ္ဂိုလ်ကို ရည်စူးပြီး ကုသုိုလ်ကောင်းမှု လုပ် အမျှပေးဝေခြင်းပဲ ဖြစ်ပါတယ်။ ဒါတောင်မှ သုံးရက်နေမှ သရဏဂုံတင်ပြီး ကုသုိုလ်လုပ် အမျှဝေတာတုို့ ရက်လည်မှ ကုသုိုလ်လုပ် အမျှဝေတာတုို့ စတဲ့ အယူအဆတွေရှိသေးပါတယ်။ ဒီအတွက် ရက်သတ်မှတ်ချက် မရှိပါဘူး အချိန်မရွေး သေသူအတွက် ကုသုိုလ်လုပ် အမျှပေးဝေနုိုင်တာ ဖြစ်ပါတယ်။ ရတာမရတာက သေသူရဲ့ ဘဝအသစ်နဲ့၊ သာဓုခေါ်နုိုင်မှု၊ မခေါ်နုိုင်မှုနဲ့ပဲ ဆုိုင်ပါတယ်။ 

ဒါကြောင့် သေသူနဲ့ ပတ်သက်ပြီး လွဲနေကြတဲ့ အလွဲတွေထဲမှာ မေးခွန်းရှင်မေးသလုို လိပ်ပြာခေါ်တာတုို့၊ ဝိညာဉ်ခေါ်တာတုို့ စတဲ့ အယူအဆ အလွဲတွေလည်း ရှိတတ်တဲ့အတွက် ဒါတွေဟာ ဘုရားဟောတဲ့ အယူအဆ၊ ဗုဒ္ဓဘာသာရဲ့ အယူအဆ  မဟုတ်ဘဲ လွဲမှားနေတဲ့ ရှေးရုိုးစွဲ အယူအဆများပဲ ဖြစ်ပါကြောင်း ဒီလောက်နဲ့ပဲ အမေးကြည့်ပြီး အဖြေညှိပေးလုိုက်ရပါတယ်။

Read more »

Facebook က အမေးတစ်ပုဒ် (၈)

Tin Tun Oo (http://www.facebook.com/TINTUNOO.TUNTUN) 
ဆရာတော် သံဃာတော်များအား လျှောက်ထားအပ်ပါသည်။ လူပညာရှိများကိုလည်းဆရာတင်ပါသည်။

 "နမော တဿ ဘဂ၀တော အရဟတော သမ္မာသမ္ဗုဒ္ဓ" ဟူသာ ဘုရားရှိခိုးကို မည်သို့ရွတ်ဆိုမှ ပါဠိသဒ္ဒါမှန်ပြီး ဌာန်ကရိုင်းကျန မှန်ကန်ပါသနည်း။ 

 ၁။နမောတဿ ဟုတွဲဆိုခြင်းနှင့် နမော တဿ ဘဂ၀တော ဟုခွဲဆိုခြင်း။ 

၂။နမော တဿဘဂ၀တော ဟုဆိုခြင်း။ 

 ၃။နမော တဿ ဘဂ ၀တော ဟုခွဲ၍ဆိုခြင်း နှင့် ဘဂ၀တော ဟုတွဲ၍ဆိုခြင်း။ 

 ၄။အရဟတော ၊ အရ ဟတော နှင့် အ ရဟတော ဟု သုံးဂါထာတွင်တစ်မျိုးစီဆိုခြင်း။ 

 မနာပဒါယီ အရှင်ဝိစိတ္တ (http://www.facebook.com/ashinvicitta) 

 ၁။ နမော တဿဘဂဝတောလို့ ရွတ်ဆိုရင်ပိုသင့်ပါတယ်။  

 ၂။ အဓိပ္ပါယ် အရရွတ်ဆိုမယ်ဆိုရင် တဿဘဂဝတော-ထိုမြတ်စွာဘုရားရှင်အား နမော-ရှိခိုးပါ၏ ဆိုတဲ့ အဓိပ္ပါယ်နဲ့ တဿဘဂဝတောလို့ ရွတ်ဆိုနိုင်ပါတယ်။  

 ၃။ ဘဂဝတောဆိုတဲ့ ပါဠိပုဒ်ဟာ ဝေါဟာရ စကားလုံးတစ်ခု သက်သက်ဖြစ်တဲ့အတွက် ခွဲပြီးမရွတ်ဘဲ ဘဂဝတောလို့ တစ်ပေါင်းတည်း ရွတ်သင့်ပါတယ်။  

 ၄။ သုံးမျိုးလုံးကို အဓိပ္ပါယ်နဲ့တကွ ဂုဏ်ကိုမှန်းပြီး ပူဇော်နိုင်ရင်ပိုကောင်းပါတယ်။  ဒီသုံးမျိုးလုံးဟာ အဖြတ်အတောက်ကွဲတာနဲ့အမျှ အဓိပ္ပါယ်လည်း ကွဲသွားတာဖြစ်ပါတယ်။ အရဟတောဆိုရင် လူနတ်ဗြဟ္မာသတ္တဝါအားလုံးတို့၏ ပူဇော်အထူးကို ခံယူတော်မူထိုက်သောလို့ အဓိပ္ပါယ်ရပြီး အရ ဟတောကတော့ ကိလေသာမှန်သမျှကို အကြွင်းအကျန်မရှိ အကုန်အစင် ပယ်သတ်တော်မူပြီးသောလို့ အဓိပ္ပါယ်ရကာ အ ရဟတောကတော့ ဆိတ်ကွယ်ရာ အရပ်မှာပင် မကောင်းမှု အကုသိုလ်ကို ပြုတော်မမူသောလို့ အဓိပ္ပါယ်ရပါတယ်။ ဒါကြောင့် ဒီသုံးမျိုးလုံးကို အဓိပ္ပါယ်နဲ့တကွ ဂုဏ်ကိုအာရုံပြုပြီး ရွတ်ဆိုနိုင်ရင် အကောင်းဆုံးပဲ ဖြစ်ပါတယ်။ 

 နမော တဿ ဘုရားရှိခိုး 
အရဟတော- လူနတ်ဗြဟ္မာ သတ္တဝါ အားလုံးတို့၏ ပူဇော်အထူးကို ခံယူတော် မူထိုက်သော အရ ဟတော - အလုံးစုံသော ကိလေသာမှန်သမျှကို အကြွင်းအကျန်မရှိ အကုန်အစင် ပယ်သတ်တော်မူပြီးထသော အ ရဟတော - စိတ်ကွယ်ရာ အရပ်၌ပင်လျှင် မကောင်းမှု အကုသိုလ်ကို ပြုတော်မမူတတ်ထသော  သမ္မာသမ္ဗုဒ္ဓဿ - သစ္စာလေးတန် တရားမှန်ကို ဆရာမကူ သယမ္ဗူဉာဏ်ဖြင့် ကိုယ်တော်တိုင် ထိုးထွင်း၍ သိတော်မူတတ်ထသော  တဿ ဘဂဝတော- ဘုန်းတော်အစုံ တန်ခိုးဂုဏ်နှင့် ပြည့်စုံတော်မူသော ထိုဘုရားရှင်အား နမော- ရိုသေမြတ်နိုးမာန်ရိုကြိုး၍ ရှိခိုးပါ၏ အရှင်ဘုရား။

Read more »

သေသူအတွက် ကုသိုလ်လုပ်တဲ့အခါ ဘယ်လိုစိတ်ထားနဲ့ ဘယ်လိုပြုလုပ်သင့်ပါသလဲ

မင်္ဂလာပါ အရှင်ဘုရား
နှစ်သစ်မင်္ဂလာ ဖြစ်ပါစေရယ်လို့ ဆုတောင်းမေတ္တာပို့သအပ်ပါတယ် ဘုရား။

နှစ်သစ်မင်္ဂလာမှာ တပည့်တော်နဲ့ ထပ်တူ သိလိုကြတဲ့သူတွေအတွက် တပည့်တော်ကို မေးလျှောက်ခွင့်ပြုပါဦးဘုရား။
မေး။ ။ မိဘတစ်ယောက်ယောက် ဆုံးသွားလို့ ရည်စူးပြီး ကုသိုလ်ပြုကြတဲ့အခါ ထားအပ်တဲ့ စိတ်နေစိတ်ထားနဲ့ ဘယ်လိုမျိုးတွေ ဆောင်ရွက်ပေးရင် သွားလေသူအတွက် အကောင်းဆုံးဖြစ်နိုင်မယ်ဆိုတာ ရှင်းလင်းပြောပြပေးစေချင်တာပါဘုရား။

ကွယ်လွန်ခြင်း တစ်နှစ်ပြည့်ကို သံဃာတော်တွေကို ဆွမ်းကပ်၊ တရားနာပြီး လူပရိသတ်ကို ဧည့်ခံကျွေးမွေးပါ့မယ်။ ဒီလိုလုပ်ဆောင်တဲ့အခါ ဘယ်လိုစိတ်ထားမျိုးန လုပ်ဆောင်ရမှာပါလဲဘုရား။ ကောင်းမှုအစုစုအတွက် ဘယ်လိုအမျှပေးရမယ်ဆိုတာမျိုး၊ ကွယ်လွန်သူအတွက် ထိရောက်စေတဲ့ အလှူမျိုးကို ညွှန်ပြပေးစေချင်ပါတယ်ဘုရား.... ။ ဒါ့အပြင် ဘုရားဟော နိပါတ်တော်တွေမှာလည်း ရက်လည်၊ လလည်၊ နှစ်လည်လုပ်ခဲ့တဲ့ အလေ့တွေရှိပါသလား၊ ဘုရားက ဘယ်လိုညွှန်ပြသွန်သင်ခဲ့တယ်ဆိုတာမျိုး ရှင်းလင်းညွှန်ပြ ဆုံးမပေးစေချင်ပါတယ်ဘုရား ....
အရှင်ဘုရားရေးသားတဲ့စာတွေကို အဆက်မပြတ် လေ့လာအားပေးရင်း မှတ်သားနာယူနေသူပါဘုရား ...
ရိုသေစွာရှိခိုးလျှက်

တပည့်တော်
ကိုသန့်
(ကလေး)

မင်္ဂလာပါ ဒကာ ကိုသန့်
အလုပ်တွေ မအားတာနဲ့ ဒကာတော်ရဲ့ သိလိုတာလေးတွေကို ဖြေကြားပေးဖို့ နောက်ကျသွားပါတယ်။ နားလည်ပေးစေချင်ပါတယ်။

ဖြေ။ ။ သေသူကိုရည်စူးပြီး ကုသိုလ်လုပ်တာကို စာပေကတော့ မတကဘတ္တလို့ ခေါ်ပါတယ်။ သေသွားတဲ့သူက သွားပြီဖြစ်ပေမယ့် ကျန်ခဲ့တဲ့သူတွေမှာ သေသူအတွက် ကုသိုလ်ကောင်းမှုလေးတွေ လုပ်ပြီး အမျှအတမ်း ပေးဝေတဲ့ အလေ့အကျင့်ဟာ ဗုဒ္ဓဘာသာဝင်တွေရဲ့ ဘုရားဟောနဲ့အညီ ပြုလုပ်ကြတဲ့ အလေ့အကျင့် ဖြစ်ပါတယ်။ မိဘနဲ့ သားသမီးတွေမှာဆိုရင် မိဘတွေကို ရည်စူးပြီး သားသမီးတွေအနေနဲ့ လုပ်ကိုလုပ်ပေးရမယ်ဆိုပြီး သားသမီး ဝတ္တရား တစ်ခုအဖြစ်တောင် ဘုရားက ဟောတော်မူပါတယ်။ အဲဒီ သားသမီး ဝတ္တရာတွေထဲမှာ လှူမျှဝေ၍ဆိုတဲ့ ဝတ္တရားတစ်ခုလည်း ပါဝင်ပါတယ်။ အလှူကို အမျှဝေပေးရမယ်ဆိုတဲ့အချက်ပါ။

အမျှဝေပေးရမယ်ဆိုတဲ့ စကားအရ သေသူတွေအတွက် တိုက်ရိုက်ချမ်းသာအောင် ပစ္စည်းဝတ္ထုတွေ ဘာတွေညာတွေ စတာတွေ ပေးပို့လို့မရဘဲ ကုသိုလ်ကောင်းမှု လုပ်ပြီး အဲဒီ ကုသိုလ်ရဲ့ အဖို့ဘာဂကိုသာ အမျှဝေပေးလို့ ရတာဖြစ်တဲ့ အတွက် အဓိက အချက်နှစ်ချက်ကို သတိပြုကြရမှာ ဖြစ်ပါတယ်။
တစ်အချက်က ကုသိုလ်ကောင်းမှုကို အရင်လုပ်
နှစ်အချက်က အဲဒီလို လုပ်ပြီးရရှိလာတဲ့ အကျိုးတရားကို တစ်ခါမျှဝေပေးဆိုတဲ့ အချက်တွေပဲ ဖြစ်ပါတယ်။

ဆိုတော့ကား ဒီအချက်နှစ်ချက်လုံးမှာ ကုသိုလ်လုပ်နေတဲ့ ကိုယ်ကိုယ်တိုင်ပဲ အဓိက ကျနေတာဖြစ်ပါတယ်။ ကိုယ်ကိုယ်တိုင်က ကုသိုလ်ကောင်းမှုကို အပြည့်အဝ ရနိုင်အောင် အရင်လုပ်ဖို့ ပိုအရေးကြီးပါတယ်။ အပြည်အဝ ရဖို့အတွက် ပြတ်သားတဲ့ စေတနာ၊ ထက်သန်တဲ့ သဒ္ဓါ၊ ဖြူစင်တဲ့ ပစ္စည်းဝတ္ထု၊ ပြည့်စုံတဲ့ ကိုယ်ကျင့်သီလ၊ အကျင့်သီလ ပြည့်စုံလှတဲ့ အလှူခံပုဂ္ဂိုလ် စတဲ့ အချက်လေးတွေနဲ့ အညီ လုပ်နိုင်မယ်ဆိုရင် ကောင်းမှုအကျိုးကို အပြည့်အဝ ရနိုင်မှာ ဖြစ်ပါတယ်။ အဲဒီလို ကိုယ်ကအရင် ပြည့်စုံအောင် ကုသိုလ်တွေလုပ်၊ ကိုယ်ကိုယ်တိုင် ရပြီးပြီဆိုရင် ကိုယ်ရထားတာကို ကိုယ်မျှဝေချင်တဲ့ ပုဂ္ဂိုလ်ကို ရည်စူးပြီး အမျှပေးဝေရမှာ ဖြစ်ပါတယ်။ အဲဒီအမျှပေးဝေတာကို ရည်စူးတဲ့ ပုဂ္ဂိုလ် ရနိုင်၊ မရနိုင်ဆိုတာက ဘဝပြောင်းသွားသူရဲ့ ရောက်ရှိနေတဲ့ ဘုံဘဝအပေါ်မှာ မူတည်နေတာရယ်၊ ရောက်ရှိတဲ့ ဘုံဘဝကနေ သာဓုခေါ်နိုင်၊ မခေါ်နိုင် အပေါ်မှာပဲ မူတည်နေတာ ဖြစ်ပါတယ်။ ဒါက သေသူဘက်က အပိုင်းပဲ ဖြစ်ပါတယ်။ သေချာတာက သေသူမရလည်း ကိုယ်ကတော့ ရအောင်ယူထားနိုင်ရင် ရပြီးသားပဲ ဖြစ်ပါတယ်။ ဒီအချက်နဲ့ ပတ်သက်ပြီး ဘုန်းဘုန်းရေးထားပြီး ဖြစ်တဲ့ သေသူရည်မှန်း ကုသိုလ်စွမ်း ဆိုတဲ့ ဒီပို့စ်လေးကို ပြန်ဖတ်ကြည့်စေချင်ပါတယ်။

ဆိုလိုတာက သေသူကိုရည်စူးပြီး ကုသိုလ်လုပ်တဲ့ အခါမှာ သေသူအတွက် လိုအပ်နိုင်တဲ့ နေစရာ၊ ဝတ်စရာ၊ စားစရာ စတဲ့ အရာတွေကို အာရုံပြုပြီး အဝတ်သင်္ကန်း၊ ဆွမ်းကျောင်းဆေး စတဲ့ ပစ္စည်းအလှူတွေကို ပြတ်သားတဲ့ စေတနာ၊ ထက်သန်တဲ့ သဒ္ဓါ၊ သန့်ရှင်းတဲ့ ပစ္စည်းဝတ္ထု၊ ပြည့်စုံတဲ့ အလှူခံပုဂ္ဂိုလ် စတာတွေကို အကောင်းဆုံး ပြင်ဆင်ပြီး ကိုယ်ကိုယ်တိုင် အရင်ဆုံး ကုသိုလ်ကို အပြည့်အဝရအောင် ကြိုးစားကာ အမျှဝေတဲ့ အခါမှသာ အဲဒီရရှိလာတဲ့ ရလာဘ်ကို သေသူအတွက်လည်း ထပ်တူထပ်မျှ ရပါစေဆိုတဲ့ စိတ်ထားနဲ့ ပြုလုပ်ပေးဖို့လိုကြောင်း ဆိုလိုတာ ဖြစ်ပါတယ်။ အဲဒီလို ကိုယ်ကိုယ်တိုင် ကုသိုလ်ကောင်းမှုကို စိတ်ပါလက်ပါ သန့်သန့်ရှင်းရှင်း ပြုလုပ်ပြီး အမျှဝေမယ်ဆိုရင် ကိုယ့်အတွက်လည်း အကျိုးကြီးသလို သွားလေသူအတွက်လည်း အကယ်၍ လိုအပ်နေတဲ့ ဘုံဘဝမှာ ဖြစ်နေခဲ့မယ်ဆိုရင် အကောင်းဆုံး အကျိုးသက်ရောက်မှုကို ဖြစ်စေမှာ အမှန်ပဲ ဖြစ်ပါတယ်

Read more »

Facebook က အမေးတစ်ပုဒ် (၇)

Zin Nway Ei Win
မေး။ သီလဆိုတာ ငါးပါးသီလကို ဆိုလိုတာပါလားဘုရား။
တကယ်လို့ ငါးပါးသီလကို တိတိကျကျ မဆောက်တည်နိုင်ဘူးဆိုရင် အဲဒီလူက တကယ်ကို မကောင်းတဲ့လူ၊ မစင်ကြယ်တဲ့ လူတစ်ယောက်ဖြစ်သွားတာလား အရှင်ဘုရား။
ငါးပါးသီလ တခါကျိုးပြီဆိုတာနဲ့ နောက် စောင့်ထိန်းလဲ အကျိုးရှိပါသလားဘုရား။
ကျုးလွန်လိုက် စောင့်ထိန်းလိုက်ဆိုရင်ရော အဲဒီသီလက အကျိုးမရှိတဲ့သီလဖြစ်ပါသလား ဘုရား။

မနာပ ဒါယီ အရှင်ဝိစိတ္တ ‎>> Zin Nway Ei Win
ဖြေ။ လူတွေအတွက် အခြေခံ သီလကတော့ ငါးပါးသီလပဲ ဖြစ်ပါတယ်။ ငါးပါးသီလကို ကောင်းကောင်းလုံနေရင်ကိုပဲ ဘဝသံသရာမှာ အကောင်းဆုံး အားကိုးရာ ဖြစ်နေပါပြီ။ သီလကို တိတိကျကျ မစောင့်ထိန်းနိုင်တဲ့အတွက် တစ်သက်လုံးမကောင်းတဲ့သူ၊ မစင်ကြယ်တဲ့သူ၊ ယုတ်မာတဲ့သူလို့ မဆိုနိုင်ပေမယ့် သူတော်ကောင်းတစ်ယောက်အဖြစ်တော့ ခံယူနိုင်မှာ မဟုတ်ပါဘူး။ ဒီငါးပါးသီလဟာ လူတွေအတွက်တော့ တစ်သက်လုံးလုံနေရင် တစ်သက်လုံးကောင်းပေမယ့် မစောင့်ထိန်းတာနဲ့စာရင် စောင့်ထိန်းနိုင်တဲ့အချိန်ဟာ အကောင်းဆုံး အချိန်ဖြစ်ပါတယ်။ စောင့်ထိန်းရင်း ငါးပါးသီလ ကျိုးပေါက်သွားခဲ့လည်း နောက်ထပ်စောင့်ထိန်းနိုင်တဲ့အချိန်မှာ အချိန်မရွေးစောင့်ထိန်းနိုင်ပါတယ်။

ကုသိုလ်နဲ့အကုသိုလ်က တစ်ကန့်စီအကျိုးပေးတာ ဖြစ်တဲ့အတွက် စောင့်ထိန်းနိုင်ရင် ကောင်းတဲ့အကျိုးကို ဖြစ်စေမှာ ဖြစ်ပြီး မစောင့်ထိန်းနိုင်လို့ ချိုးဖောက်တဲ့အခါမှာလည်း မကောင်းတဲ့အပြစ်ကတော့ ရောက်လာမှာ ဖြစ်ပါတယ်။ မေးခွန်ရှင် မေးသလို သီလဟာ ကျူးလွန်လိုက် စောင့်ထိန်းလိုက်လုပ်မိရင်လည်း ကျူးလွန်တဲ့အခါ အပြစ်ရမှာဖြစ်ပြီး စောင့်ထိန်းတဲ့အခါမှာလည်း ကောင်းကျိုးရစေမှာ ဖြစ်ပါတယ်။ အဓိကကတော့ စေတနာကောင်းကောင်းနဲ့ မကျူးလွန်မိအောင် အရင်ကြိုးစားပြီး မသိလို့ ကျူးလွန်မိလိုက်ရင်လည်း အသိဝင်တဲ့အခါ ပြန်ပြီးစောင့်ထိန်းနိုင်အောင် ကြိုးစားရပါတယ်။ တစ်ခါကျူးလွန်မိလို့ မထူးတော့ပါဘူးဆိုပြီး မထူးဇာတ်ခင်းတာထက်စာရင် အသိသတိဝင်တဲ့အခါမှာ ရနိုင်သလောက်ပြန်တည်ဆောက်နိုင်ရင် အဲဒီအတွက် ကောင်းတဲ့အကျိုးသက်ရောက်မှုကတော့ ရှိနေမှာအမှန်ပဲ ဖြစ်ပါတယ်။

Zin Nway Ei Win
သဘောပေါက်ပါပီ အရှင်ဘုရား။ တပည့်တော် ငါးပါးသီလကို ကျူးလွန်နေပါလားလို့ သိသိကြီးနဲ့ ကျူးလွန်တဲ့အချိန်တွေလည်း ရှိပါတယ်ဘုရား။ ဒါပေမယ့် တတ်နိုင်သလောက် စောင့်ထိန်းဖို့ ကြိုးစားပါ့မယ် အရှင်ဘုရား.. _/\_

Read more »

Facebook က အမေးတစ်ပုဒ် (၆)

Aye Mya Mya Moe
မေး။ အရှင်ဘုရား သိချင်တာလေတခုရှိလို့ပါဘုရား။
မိုးညှင်းသမ္ဗုဒ္ဓေ ကိုအလုံး 1000 ပုတီးစိပ်ရင် ဆုတောင်းပြည့်တယ်ဆိုတာ ဟုတ်ပါသလားဘုရား။

မနာပ ဒါယီ အရှင်ဝိစိတ္တ
ဖြေ။ ကိုယ်လုပ်ထားတဲ့ ကောင်းမှုကုသိုလ်ရဲ့ အကျိုးပေးချိန်နဲ့ တောင်းဆုပြုထားမှု တိုက်ဆိုင်ကြုံတွေ့သွားတဲ့ သဘောပဲ ဖြစ်ပါတယ်။ ဒီဘုရားကိုသွားပြီး ဒီလို ပုတီးစိပ်တိုင်း ဆုတောင်းပြည့်နိုင်တာတော့ မဟုတ်ပါဘူး။ ကောင်းမှုနဲ့ မကောင်းမှုဆိုတာ ပြုလုပ်တဲ့သူနဲ့ အကျိုးပေးချိန် တိုက်ဆိုင်မှ၊ အကျိုးပေးခွင့်သာမှ အကျိုးပေးတာ ဖြစ်ပါတယ်။ အကျိုးပေးချိန် မတန်သေးရင် ကောင်းတာတွေ လုပ်နေပေမယ့် မကောင်းတာတွေနဲ့ ကြုံတွေ့နေရတတ်ပြီး မကောင်းတာတွေ လုပ်နေသူတွေလည်း ကောင်းတာလေးတွေ ကြုံနေရတတ်ပါတယ်။ ဒါက ကောင်းမှုမကောင်းမှု အကျိုးပေးချိန် မတန်သေးလို့ပဲ ဖြစ်ပါတယ်။ ဒါပေမယ့် ကောင်းကံဆိုတာ များများလုပ်ပေးနိုင်လေ ကံကောင်းမှုတွေ များများရောက်လာလေဖြစ်ပြီး ကံကောင်းမှုကြောင့် ကောင်းကျိုးတွေ များများရောက်လာတာဟာ ဆုတောင်းပြည့်တာပါပဲ။

ဒါကြောင့် ဆုတောင်းပြည့်တာ မပြည့်တာ ကံရဲ့အလုပ်ဖြစ်ပြီး ကုသိုလ်ကောင်းမှုလုပ်တာက ကိုယ့်ရဲ့အလုပ်ပဲ ဖြစ်တဲ့အတွက် ဘာပဲဖြစ်ဖြစ် သီလကိုအခြေခံတဲ့ ကုသိုလ်ကောင်းမှုသာ များများလုပ်ဖို့ တိုက်တွန်းလိုပါတယ်။

Aye Mya Mya Moe
မေး။ ကျေးဇူးတင်ပါတယ် အရှင်ဘုရား။ မေတ္တာကိုဘယ်လိုပို့ရမလဲ ပြောပြပါလားဘုရား။ တပည်တော်မ အလုပ်ရှာဖို့ ဘယ်လိုပို့ရမလဲမသိ ဖြစ်နေလို့ပါဘုရား။ ဒီမြို့နယ်မှာ ရှိတဲ့နေရာ ၄ ၅ ခုကို ရှာမှာဆိုတော့ မေတ္တာပို့ရအောင်လည်း နေရာအတိအကျ မသိဘူး။ အလုပ်ရှင်လဲ အတိအကျမသိတော့ ဘယ်လိုပို့ရမလဲ မသိဘူးဖြစ်နေလို့ပါဘုရား။ ဘယ်လိုလုပ်ရမလဲ ရှင်းပြပေးပါအုံးဘုရား။

မနာပ ဒါယီ အရှင်ဝိစိတ္တ
ဖြေ။ မေတ္တာပို့ရမယ့် နေရာနဲ့ မေတ္တာပို့ရမယ့် ပုဂ္ဂိုလ်ကို အတိအကျ မသိပေမယ့် အလုပ်ရှာဖို့ မသွားခင် ဒါမှမဟုတ် သွားနေတဲ့အချိန်မှာတော့ ဘယ်နေရာ၊ ဘယ်ကုမ္ပဏီကို သွားမယ်ဆိုတာ ကြိုတင်စဉ်းစားထားပြီး ဖြစ်တတ်ပါတယ်။ အဲဒီလို အချိန်မှာ ကိုယ်သွားမယ့် ကုမ္ပဏီရှိရာ နေရာဒေသဝန်းကျင်ရှိ သမ္မာဒေဝနတ်ကောင်းနတ်မြတ်များနဲ့ သူတော်ကောင်းများ၊ ပြီးတော့ ကုမ္ပဏီ ပိုင်ရှင်များနဲ့ ဝန်ထမ်းများ၊ ဆိုင်ရာတာဝန်ရှိသူများနဲ့ ကိုယ်နဲ့ရှေးရှေးဘဝ တစ်ခုခုက ပတ်သက်ဆက်နွယ်ဖူးသူများ စသဖြင့် မြင်ဖူးတွေ့ဖူးခြင်း မရှိပေမယ့် စိတ်ကမှန်းပြီး စေတနာအမှန်နဲ့ မေတ္တာပို့ပေးနိုင်ပါတယ်။ မမြင်ဖူး၊ မရောက်ဖူးပေမယ့် အမည်ပညတ် သဘောအားဖြင့် ဘယ်နေရာ၊ ဘယ်ကုမ္ပဏီ၊ ဘယ်ကုမ္ပဏီပိုင်ရှင် ဘယ်ဝန်ထမ်းစတာတွေဆိုတာ အမှန်တကယ် ရှိနေတာတွေဖြစ်တဲ့အတွက် အဲဒီလို အမည်ပညတ်ရှိနေတာတွေကိုပဲ စိတ်ကမှန်းပြီး ပို့သပေးလို့ ရပါတယ်။ မျက်နှာအသွင်အပြင်နဲ့ ပုံရိပ်ကို တိုက်ရိုက်မမြင်နိုင်ပေမယ့် အမည်ပညတ်တွေနဲ့ မှန်းပြီးပို့သပေးလို့ ရပါတယ်။

ဥပမာ အလုပ်သွားရှာမယ့်နေရာကို စရောက်ရောက်ချင်း “ဤအရပ်ဤဒေသဤဝန်းကျင်၌ ရှိကြကုန်သော သမ္မာဒေဝ နတ်ကောင်းနတ်မြတ်များနဲ့တကွ အားလုံးသော သူတော်ကောင်းအပေါင်း မြင်အပ်မမြင်အပ်တဲ့ ပုဂ္ဂိုလ်သတ္တဝါအပေါင်းကို ကိုယ်နဲ့တစ်သားတည်းထားပြီး ဘေးရန်ကင်းပါစေ ကိုယ်ဆင်းရဲခြင်း ကင်းပါစေ၊ စိတ်ဆင်းရဲခြင်း ကင်းပါစေ၊ ချမ်းသာစွာ မိမိခန္ဓာဝန်ကို ရွတ်ဆောင်နိုင်ပါစေ” စသဖြင့် ပို့သပေးနိုင်ပါတယ်။ ကိုယ်နဲ့ထပ်တူစိတ်ထားဖို့ လိုတယ်ဆိုတာက ကိုယ်ဘေးရန်ကင်းချင်သလို သူတို့လည်းကင်းပါစေ၊ ကိုယ်ကိုယ်ဆင်းရဲခြင်း ကင်းချင်သလို သူတို့လည်း ကင်းပါစေ၊ ကိုယ်စိတ်ဆင်းရဲခြင်း ကင်းချင်သလို သူတို့လည်း ကင်းပါစေ စသဖြင့် ကိုယ်နဲ့ယှဉ်ပြီး စေတနာထားကြည့်စေချင်တဲ့ သဘောပဲဖြစ်ပါတယ်။

ပြီးတော့ နေရာအတိအကျ ကြိုတင်သိထားရင်တော့ အဲဒီနေရာကို စိတ်ထဲမှာမှန်းပြီး အကြိမ်ကြိမ် မေတ္တာပို့ထားပေးလို့ ရပါတယ်။ အဲဒီလိုပဲ ကုမ္ပဏီတစ်ခုခုကို သွားတဲ့အခါ သွားမယ့်ကုမ္ပဏီရဲ့ အမည်နဲ့ကုမ္ပဏီပိုင်ရှင်၊ ဝန်ထမ်းများ၊ ဤကုမ္ပဏီနှင့် ပတ်သက်ဆက်နွယ်လျက်ရှိတဲ့ ပုဂ္ဂိုလ်များစသဖြင့် အားလုံးကို စိတ်ကမှန်းပြီး ခုနပြောသလို မေတ္တာပို့ပေးလို့ ရပါတယ်။ တစ်ခုတော့ရှိပါတယ်။ တစ်ခုခုကို လိုချင်လို့ မေတ္တာပို့တဲ့ သဘောသက်ရောက်ပေမယ့် မေတ္တာပို့တဲ့အခိုက်မှာတော့ စိတ်မှာ မျှော်လင့်ချက်အကင်းဆုံးနဲ့ တကယ်ချမ်းသာစေလိုတဲ့ စိတ်စေတနာ သက်သက်နဲ့ မေတ္တာပို့နိုင်အောင် ကြိုးစားသင့်ပါတယ်။ လိုချင်တာရှိလို့ မေတ္တာပို့ပေးတဲ့ သဘောဆိုရင်တော့ အကျိုးသက်ရောက်မှုက ထင်သလောက် မဖြစ်ပေါ်နိုင်တဲ့အတွက် ဘာပဲဖြစ်ဖြစ် မေတ္တာပို့တဲ့အခိုက်မှာတော့ စိတ်ကိုအသန့်ရှင်းဆုံးထားပြီး အရိုးရှင်းဆုံးအာရုံပြုမှုနဲ့ ပို့သပေးနိုင်အောင် ကြိုးစားသင့်ပါတယ်။ အဲဒီလို ဖြစ်ဖို့လည်း တိုက်တွန်းလိုပါတယ်။

Read more »

Facebook က အမေးတစ်ပုဒ် (၅)

Kaungmyat Thu
ဆရာတော် အရှင်ဘုရား... ကံကံ၏ အကျိုးကျေးဇူးဆိုတာ ကိုယ်လုပ်နေတဲ့ အလုပ်နဲ့ပဲ ဆိုင်ပါသလားဘုရား။ အလုပ်ကောင်းပြီး စေတနာမကောင်းရင် ကံကောင်းပါသလားဘုရား။ စေတနာကောင်းပြီး အလုပ်မကောင်းရင်ရော ကံဆုိုးပါသလားဘုရား။ လူတိုင်းမှာ အမှားကိုယ်စီ ရှိကြပါတယ်ဘုရား မရှောင်နိုင်လို့ မှားခဲ့ရင် ကံဆိုးပါသလားဘုရား။ ကရုနာရှေ့ထားပြီး ပြန်လည်ဖြေကြားပေးပါရန် မေတ္တာရပ်ခံအပ်ပါတယ်ဘုရား။

Ashin Vicitta ‎>> Kaungmyat Thu
ကံဆိုတာ အလုပ်ကိုပြောတာဖြစ်ပြီး အလုပ်ဆိုတာမှာလည်း စေတနာပါတဲ့ အလုပ်ကသာ အကျိုးသက်ရောက်မှုကို ဖြစ်စေတာ ဖြစ်ပါတယ်။ စေတနာ စေတသိက်ဟာ စိတ်ကိုလှုံဆော်ပေးတဲ့ အရာဖြစ်ပြီး ကောင်းတဲ့အလုပ်တွေမှာလည်း စေတနာက ယှဉ်နေပြီး မကောင်းတဲ့အလုပ်တွေမှာလည်း စေတနာက ယှဉ်နေတတ်ပါတယ်။ ဒါကြောင့် ကောင်းတဲ့အလုပ်တွေ ဖြစ်ပေမယ့် စေတနာမပါရင်၊ စေတနာအားနည်းရင် အကျိုးသက်ရောက်မှုလည်း မရှိဘဲ အားနည်းနေတတ်သလို၊ မကောင်းတဲ့ အလုပ်တွေမှာလည်း စေတနာ မပါရင်၊ စေတနာ မရှိရင် အကျိုးသက်ရောက်မှုလည်း မရှိဘဲ ဖြစ်နေတတ်ပါတယ်။ အကျိုးသက်ရောက်မှုကောင်း ရှိခြင်းမရှိခြင်းဟာ ကံကောင်းခြင်း၊ မကောင်းခြင်းပဲ ဖြစ်ပါတယ်။ ဒီသဘောအရ ပုထုဇဉ်ပုဂ္ဂိုလ်တွေအတွက် ကောင်းတဲ့အလုပ်တွေမှာ စေတနာကောင်းရှိဖို့လိုသလို၊ တကယ်လို့ ကောင်းတဲ့အလုပ်တွေမှာ စေတနာ မပါခဲ့ရင်လည်း ကောင်းကျိုးမရရုံလောက်သာဖြစ်ပြီး အပြစ်သက်ရောက်မှုက မရှိနိုင်တဲ့အတွက်ဖြေဆည်လို့ ရနိုင်ပေမယ့် မကောင်းတဲ့အလုပ်တွေမှာတော့ မလုပ်ဘဲ နေနိုင်အောင် ကြိုးစားတာက အကောင်းဆုံးပါပဲ။ မရှောင်နိုင်လို့ မဖြစ်မနေ လုပ်ရတဲ့ အခါ မကောင်းတဲ့ အလုပ်တွေမှာတော့ စေတနာမပါအောင် အထူးကြိုးစားရမှာ ဖြစ်ပါတယ်။

ခက်တာက ပုထုဇဉ်ပုဂ္ဂိုလ်တွေရဲ့ စိတ်ဟာ ဘယ်လောက်ပဲ ခိုင်ပါတယ်ပြောပြော သဒ္ဓါတရား မမြဲသေးတဲ့အတွက် တစ်ခါတလေ စေတနာမပါဘူးလို့ ဆိုနေပေမယ့် စေတနာ ပါသွားတာတွေက အများကြီးပါပဲ။ အဲဒီလို အမြဲပြောင်းနေတဲ့အတွက် ကောင်းတာပဲဖြစ်ဖြစ်၊ မကောင်းတာပဲဖြစ်ဖြစ် လုပ်တဲ့အခါမှာ စေတနာ မပါအောင် ကြိုးစားပေမယ့် ပါသွားတာတွေရှိတတ်သလို၊ စေတနာပါအောင် ကြိုးစားပေမယ့်လည်း မပါတတ်တာတွေလည်း ရှိတတ်ပါတယ်။ လုပ်တဲ့သူရဲ့ စိတ်အစဉ်နဲ့ စေတနာမှာပဲလိုက်ပြီး အကျိုးသက်ရောက်မှု ရရှိမရှိ၊ ကံကောင်းမကောင်းဆိုတာ ဆုံးဖြတ်ရမှာ ဖြစ်ပါတယ်။ အကောင်းဆုံးကတော့ စိတ်စေတနာဟာ မတည်ငြိမ်တဲ့အတွက် ကောင်းတဲ့အလုပ်တွေမှာ လုပ်နိုင်သမျှ၊ လုပ်လို့ရသလောက် လုပ်ကြရမှာဖြစ်ပြီး မကောင်းတဲ့အလုပ်တွေမှာတော့ ရှောင်နိုင်သမျှ ရှောင်နိုင်အောင် ကြိုးစားကြရမှာ ဖြစ်ပါတယ်။

ဒါလေးကို ပြန်ဖတ်ကြည့်ပါဦး။
http://www.facebook.com/note.php?note_id=215589285128027

Read more »

Facebookက အမေးတစ်ပုဒ် (၄)

ဘုန်းဘုန်းရဲ့ facebook (http://www.facebook.com/ashinvicitta) note commentမှာ မေးထားလို့ဖြေထားတဲ့ အမေးအဖြေ အချို့ဖြစ်ပါတယ်။ အများဖတ်ပြီး အမြတ်ရစေဖို့၊ တစ်လုံးတစ်ပါဒဖြစ်ဖြစ် အသိရစေဖို့ တစ်ဆင့်ပြေလည် မျှဝေလိုက်ပါတယ်။

Kaungmyat Thu
မေး။ အရှင်ဘုရား.. တပည့်တော် တစ်ခုလောက်မေးပါရစေ။ ဗုဒ္ဓဟောတဲ့ တရားတော်တွေထဲမှာ မပြစ်မှားကောင်းတဲ့ မိန်းမ ၂၀ ဆိုတာ ရှိပါတယ်ဘုရား။ မပြစ်မှားကောင်းတဲ့မိန်းမကို ပြစ်မှားမိရင် ကံထိုက်တယ်ဆိုတာတော့ သိပါတယ်ဘုရား။ တပည့်တော် သိချင်တာက မပြစ်မှားကောင်းတဲ့ မိန်းမရှိရင် ပြစ်မှားကောင်းတဲ့ မိန်းမရော ရှိပါသလားဘုရား။ ကရုနာရှေ့ထားပြီး ပြန်လည်ဖြေကြားပေးပါရန် မေတ္တာရပ်ပါတယ်ဘုရား။

Ashin Vicitta ‎>> Kaungmyat Thu
ဖြေ။ မပြစ်မှားကောင်းတာ ရှိရင် ပြစ်မှားကောင်းတာလဲ ရှိမှာပဲဆိုပြီး ဝေါဟာရပညတ် တစ်ခုခုကို ရှာကြံပြီး တွေးလို့တော့ မဖြစ်ပါဘူး။ အကုသိုလ်တစ်ခုဟာ မလုပ်ကောင်းတဲ့အကုသိုလ်၊ လုပ်ကောင်းတဲ့ အကုသိုလ်ဆိုတာ မရှိဘဲ အကုသိုလ်မှန်သမျှ ရှောင်ကြဉ်ကြရမှာ ဖြစ်သလို ပြစ်မှားခြင်းဆိုတဲ့ အကုသိုလ်မှာလည်း ပြစ်မှားကောင်းတယ်ဆိုတဲ့ အရာမျိုး မရှိဘဲ ပြစ်မှားမှု မှန်သမျှ မပြစ်မှားမိအောင် ရှောင်ကြဉ်ရမှာပဲ ဖြစ်ပါတယ်။ တကယ်တော့ မေးခွန်းရှင် မေးထားတဲ့ မပြစ်မှားကောင်းတဲ့ မိန်းမ(၂၀)ဆိုတာ ကာမဂုဏ်နဲ့ ပတ်သက်ပြီး မသွားလာ မကျူးလွန်ကောင်းတဲ့ အဂမနီယဝတ္ထု (၂၀)ကို အသေးစိပ်ဖော်ပြပေးထားတာဖြစ်ပြီး ဒီအဂမနီယဝတ္ထု (၂၀) (ဒီမှာ ပြန်ဖတ်နိုင်)ကို ရှောင်ကြဉ်နေရင် ကာမေသုမိစ္ဆာစာရ မဖြစ်ဘူးလို့ ဆိုလိုတာ ဖြစ်ပါတယ်။ စာပေမှာ ဖော်ပြထားတဲ့ ဒီအယောက် (၂၀)ဟာ တစ်လင်တစ်မယား စနစ်ကို ကျော်လွန်ပြီး ကျူးလွန်နိုင်တဲ့ အရာမှန်သမျှ အကုန်ဖော်ပြထားပြီး ဖြစ်တဲ့အတွက် ကျန်တဲ့ပြစ်မှားကောင်းတယ်ဆိုတဲ့ အရာတွေလည်း မရှိနိုင်တော့ပါဘူး။ အမှန်တော့ ကာမဂုဏ်မှန်သမျှ မလုပ်ဘဲ နေနိုင်ရင်ကောင်းပေမယ့် ပုထုဇဉ်များအဖို့ အဲဒီလို မရှောင်နိုင်သေးရင်လည်း တစ်လင်တစ်မယား စနစ်ကိုကျင့်သုံးပြီး ဒီအကျင့်ကလွဲတဲ့ ကျန်တဲ့အရာတွေမှာ မသွားလာ၊ မပြစ်မှားကြဖို့ ဒီနေရာမှာ ပညတ်သတ်မှတ်ပေးခြင်း ဖြစ်ပါတယ်။ ဆိုတော့ကား မိမိတို့ အနေနဲ့ ဒုစရိုက်အမှုကို ရှောင်ကြဉ်လိုက်ရင် သုစရိုက်အမှုကိုလည်း စောင့်ထိန်းပြီးသား ဖြစ်သလို မပြစ်မှားကောင်းတဲ့ အဂမနီယဝတ္ထုတွေကို ရှောင်ကြဉ်လိုက်ရင် ကာမေသုမိစ္ဆာစာရ သီလကိုလည်း စောင့်ထိန်းပြီးသားဖြစ်တဲ့ သဘောမျိုးလို့ နားလည်သဘောပေါက်ပြီး မကျူးလွန်သင့်တဲ့အရာတွေကိုသာ မကျူးလွန်မိအောင် ထိန်းသိမ်းနေထိုင်ဖို့ပဲ အဓိက ဖြစ်ပါတယ်။

Hohone Kyin
မေး။ ဆရာတော်ဘုရား တပည်တော် လျောက်ခွင့်ပြုပါဘုရား။ မကောင်းတဲ့အကုသိုလ် လုံးဝမလုပ်ရင် ကုသိုလ်ရ နိုင်ပါသလား ဘုရား။

Ashin Vicitta ‎>> Hohone Kyin
ဖြေ။ မကောင်းမှုရှောင်၊ ကောင်းမှုဆောင်၊ ဖြူအောင်စိတ်ကိုထား ဆိုတဲ့ ဘုရားစကားတော် ရှိပါတယ်။ ဘုရားစကားတော်အရ ကြည့်ရင်ရှင်းပါတယ်။ အကုသိုလ်ရှောင်၊ ကုသိုလ်ကိုဆောင်၊ ပြီးတော့ စိတ်ဖြူစင်အောင်လုပ်တဲ့။ သတ္တဝါတွေ အနေနဲ့ ရှေးဦးစွာ လုပ်သင့်တာက မကောင်းမှု အကုသိုလ်ကို ရှောင်ကြဉ်ရမယ့် အလုပ်ဖြစ်ပါတယ်။ ဒီတော့ မကောင်းမှုကို ရှောင်လိုက်ရုံနဲ့ ကုသိုလ်ရသလားဆိုတော့ ကုသိုလ်က အမျိုးမျိုးရှိပါတယ်။ ကိုယ်ရှောင်လိုက်တဲ့ မကောင်းမှုက သီလနဲ့ပတ်သက်တဲ့ သူတစ်ပါးအသက်ကို သတ်ခြင်းအလုပ်၊ သူတစ်ပါးဥစ္စာကို ခိုးခြင်းအလုပ် စသည်ဖြင့် ဖြစ်နေမယ်ဆိုရင် အဲဒီမကောင်းမှုတွေကို ရှောင်လိုက်တာနဲ့ သီလကိုထိန်းပြီးဖြစ်လို့ သီလကုသိုလ်လည်း ရသွားပါတယ်။ ဒုစရိုက်အမှုကို မလုပ်ဘဲ ရှောင်ကြဉ်တဲ့အခါ သုစရိုက်အမှု ကုသိုလ်ကလည်း အလိုလို ဖြစ်သွားတဲ့ သဘောမျိုးလည်း ရှိပါတယ်။ ဒါပေမယ့် တစ်ချို့ကုသိုလ်တွေကျတော့ အကုသိုလ်ကို ရှောင်နေရုံနဲ့ မဖြစ်ဘဲ သီးသင့်လုပ်ယူမှကို ရပါတယ်။ ဥပမာ ဒါနကုသိုလ်ဆိုရင် လက်တွေ့ပေးကမ်းလှူးဒါန်နိုင်မှ ရတဲ့သဘောမျိုး၊ ဥပုသ်သီလလို ကုသိုလ်မျိုးကလည်း လက်တွေ့စောင့်ထိန်းနိုင်မှသာ ရတဲ့သဘောမျိုး၊ သမထကုသိုလ်၊ ဝိပဿနာကုသိုလ်တွေဆိုတာကလည်း လက်တွေ့လိုက်နာကျင့်ကြံနိုင်မှသာ ရနိုင်တဲ့ သဘောမျိုးရှိပါတယ်။ ဒါကြောင့် အရေးကြီးဆုံးက ဘုရားရှင် မိန့်တော်မူသလို မကောင်းမှုအကုသိုလ်ကို ရှောင်နိုင်အောင် အရင်ကြိုးစားပြီး နောက် ကုသိုလ်ကောင်းမှုကို ရယူဆောင်နိုင်အောင် ပြုလုပ်ကာ ကိုယ့်စိတ်ကို အဖြူစင်ဆုံးဖြစ်အောင် အားထုတ်ရမှာပဲ ဖြစ်ပါတယ်။

Read more »

Facebookက အမေးတစ်ပုဒ် (၃)

ဘုန်းဘုန်းရဲ့ facebook (http://www.facebook.com/ashinvicitta) မှာ မက်စေ့ခ်ျကဏ္ဍမှာ မေးထားလို့ဖြေထားတဲ့ အမေးအဖြေ အချို့ဖြစ်ပါတယ်။ အများဖတ်ပြီး အမြတ်ရစေဖို့၊ တစ်လုံးတစ်ပါဒဖြစ်ဖြစ် အသိရစေဖို့ တစ်ဆင့်ပြေလည် မျှဝေလိုက်ပါတယ်။

Mi Su
မေး ။ အရှင်ဘုရား…
အာသဝေါတရားလေးပါးကို ရှင်းပြပေးပါ ဘုရား

Ashin Vicitta
ဖြေ။ အာသ၀ဆိုတဲ့ စကားလုံးရဲ့ တိုက်ရိုက်အဓိပ္ပါယ်က ယိုစီးခြင်းလို့ အဓိပ္ပါယ်ရပါတယ်။ သွယ်ဝိုက်တဲ့ သဘောတွေကတော့ စွဲလမ်းစေခြင်း၊ ကပ်ငြိစေခြင်းသဘောဖြစ်ပြီး ဒီတရားတွေက သတ္တဝါတွေကို ဘ၀သံသရာမျိုးစုံမှာ ကျင်လည်အောင် လုပ်ပေးတတ်တဲ့ သဘောရှိပါတယ်။ အဲဒီ အာသဝ တရားတွေက
ကာမာသ၀ – ကာမဂုဏ်အာလုံကို တပ်မက်စွဲလမ်းတဲ့လောဘ။
ဘ၀ါသ၀ – ဘ၀အမျိုးမျိုးကို တပ်မက်စွဲလမ်းတဲ့လောဘ။
ဒိဋ္ဌာသ၀ – ငါ ရှိတယ်။ သူရှိတယ်၊ ယောကျာင်္း မိန်းမ၊ ပုဂ္ဂိုလ်သတ္တ၀ါရှိတယ် လို့ အယူမှားတဲ့ ဒိဋ္ဌိ။
အ၀ိဇ္ဇာသ၀ – အမှန်ကိုမသိတဲ့ မောဟတို့ပဲ ဖြစ်ပါတယ်။
ဒီတရားတွေကိုတော့ ဝိပဿနာဉာဏ်နဲ့ ဖြတ်မှပဲ အကြွင်းမဲ့ကုန်ဆုံးကာ အာသဝေါတရားလေးပါးရဲ့ ကင်းရာကုန်ရာဖြစ်တဲ့ နိဗ္ဗာန်ကို မျက်မှောက်ပြုကြရမှာ ဖြစ်ပါတယ်။

Mi Su
မေး။ ဗောဓိဉာဏ်၏ အင်္ဂါအစိတ်အပိုင်း ဖြစ်ကုန်သော သတိ၊ ပညာ (ဓမ္မဝိစယ)၊ "ဝီရိယ၊ ပီတိ၊ ပဿဒ္ဓိ ၊သမာဓိ၊ ဥပေက္ခာ၊ ဤတရား ခုနှစ်ဖြာတို့ကို ဗောဇ္ဖျင်တရားများ ဖြစ်ကြသည်ဟူ၍ တရားအားလုံးကို သိမြင်တော်မူသော မြတ်စွာဘုရားက ထုတ်ဖော်ဟောကြားပေ၏။"...........
၁)အရှင်ဘုရား ဗောဇ္ဖျင်တရား(၇)ပါးမှ ပဿဒ္ဓိ ဆိုတာ တပည့်တော် နားမလည်ပါဘုရား၊ ဖြေကြားပေးတော်မူပါ ဘုရား။
၂)မြတ်စွာဘုရားသည် ဗောဓိပင်ရင်း၌ မာရ်ငါးပါးကို အောင်မြင်တော်မူသည်။
အရှင်ဘုရား ထို မာရ်ငါးပါးကို လည်း သိလိုပါသဖြင့် ဖြေကြားပေးတော်မူပါဘုရား။

Ashin Vicitta
ဖြေ။ ဗောဇ္ဈင် (၇) ပါး
ဗောဓိဟူသော သစ္စာလေးပါးကို သိကြောင်းတရားအပေါင်း၏ အစိတ်အစိတ်ကို ဗောဓိအင်္ဂ= ဗောဇ္ဈင်္ဂ= ဗောဇ္ဈင်လို့ ခေါ်ပါတယ်။ ဒီဗောဇ္ဈင်လည်း ခုနှစ်ပါးရှိပါတယ်။
၁။ သတိသမ္ဗောဇ္ဈင် = သစ္စာလေးပါးကို သိကြောင်းဖြစ်တဲ့ အောက်မေ့မှုသတိ
၂။ ဓမ္မ၀ိဇယသမ္ဗောဇ္ဈင် = သစ္စာလေးပါးကို သိကြောင်းဖြစ်တဲ့ ဆိုင်ရာတရားများကို စိစစ်တတ်တဲ့ ပညာ
၃။ ၀ီရိယသမ္ဗောဇ္ဈင် = သစ္စာလေးပါးကို သိကြောင်းဖြစ်တဲ့ အားထုတ်မှု ၀ီရိယ
၎။ ပီတိသမ္ဗောဇ္ဈင် = သစ္စာလေးပါးကို သိကြောင်းဖြစ်တဲ့ နှစ်သက်ရွှင်လန်းမှု ပီတိ
၅။ ပဿဒ္ဓိသမ္ဗောဇ္ဈင် = သစ္စာလေးပါးကို သိကြောင်းဖြစ်တဲ့ ငြိမ်းအေးမှု ပဿဒ္ဓိ
၆။ သမာဓိသမ္ဗောဇ္ဈင် = သစ္စာလေးပါးကို သိကြောင်းဖြစ်တဲ့ တည်ကြည်မှု သမာဓိ
၇။ ဥပေက္ခာသမ္ဗောဇ္ဈင် = သစ္စာလေးပါးကို သိကြောင်းဖြစ်တဲ့ လျစ်လျူရှုမှု တတြမဇ္ဈတ္တတာ
ဒီဗောဇ္ဈင် (၇)ပါးမှာ ပဉ္စမမြောက် ဗောဇ္ဈင်တရားဟာ ပဿဒ္ဓိ သမ္ဗောဇ္ဈင်ပဲ ဖြစ်ပါတယ်။ စိတ် မငြိမ်သက်မှု စိတ်အကြံများမှုကြောင့် ဖြစ်တဲ့ ကိုယ်စိတ်နှစ်တန် ပူပန်ခြင်း ခပ်သိမ်းမှာ အစဉ်အတိုင်း အေးငြိမ်းလာခြင်းသဘောဟာ ပဿဒ္ဓိ ဖြစ်ပါတယ်။ တဏှာ လောဘများ လျော့ပါးလာတဲ့အခါ စိတ်ဟာလည်း ငြိမ်းအေး ချမ်းသာလာပါတယ်။ တဏှာ လောဘ ဒေါသများ လျော့ပါးလာတာနဲ့အမျှ စိတ်မှာ ပူလောင်ခြင်းများ ကင်းမဲ့သွားပါတယ်။ ဒီအခြင်းအရာဟာ ပဿဒ္ဓိရဲ့ အခြင်းအရာပဲ ဖြစ်ပါတယ်။

မာရ်ငါးပါး
ဘုရားရှင်တိုင်းဟာ မာရ်ငါးပါးကို အောင်မြင်တော်မူပြီး လောကမှာ အထွတ်အမြတ်ဆုံးဖြစ်တဲ့ သဗ္ဗညုတ ဘုရားအဖြစ်ကို ရောက်ရှိတော်မူလေ့ ရှိပါတယ်။ မာရ်ဆိုတာ မာရဆိုတဲ့ပါဠိ စကားကို မြန်မာမှုပြုထားတာ ဖြစ်ပါတယ်။ မာရရဲ့ အဓိပ္ပါယ်က သေခြင်း သေစေခြင်းလို့ အဓိပ္ပါယ်ရပြီး သတ်ရှိသတ္တဝါများကို သေစေတတ်တဲ့ တရားလို့လည်း နားလည်ထားနိုင်ပါတယ်။ အဲဒီမာရ်တွေဟာ
၁။ ဒေ၀ပုတ္တ မာရ် = မာရ်နတ်
(သေအောင် သတ်တတ်သည့် နတ်သားလို့ အဓိပ္ပါယ်ရပါတယ် ။ နတ်ပြည် ၆-ထပ်၏ အပေါ်ဆုံးထပ် (ပရနိမ္မိတ ၀သ၀တ္တီ နတ်ပြည် - ကာမဂုဏ်ကို အလိုရှိတိုင်း ပြီးစေသော ဘုံ) မှ နတ်ဆိုးတစ်ဦးလို့ ဆိုပါတယ်)
၂။ ကိလေသ မာရ် = ကိလေသာဆယ်ပါး
(ကိလေသာ တရားဟာ ရယူလက်ခံထားသူရဲ့ စိတ်နှလုံးကို ပူလောင်ဆင်းရဲအောင် နှိပ်စက်တတ်တဲ့ တရားပဲ ဖြစ်ပါတယ်။ ဒီကိလေသာရှိနေသမျှ သံသရာတွင်းမှ မလွတ်ဘဲ တ၀ဲလည်လည် ကျင်လည်ပြီး သေပြီးရင်းသေ နေရဦးမည်ဖြစ်တဲ့အတွက် ကိလေသာကိုလည်း သတ်တတ်တဲ့ မာရ်လို့ ခေါ်ခြင်း ဖြစ်ပါတယ်။)
၃။ အဘိသင်္ခါရ မာရ် = ပြုပြင်စီရင်မှု
(ပြုလုပ်ကျင့်ကြံ အားထုတ်ထားတဲ့ ကုသိုလ်ကံ ၊ အ ကုသိုလ်ကံ တွေကို အဘိသင်္ခါရ မာရ်လို့ ဆိုလိုခြင်းဖြစ်ပါတယ်။ ကုသိုလ်ကံကြောင့် ကောင်းရာ သုဂတိ ရောက်ခြင်း အကုသိုလ်ကံကြောင့် မကောင်းရာ ဒုဂ္ဂတိဘ၀ရောက်ခြင်းများ ရှိနေပေမယ့် ရောက်ရာဘဝမှာလည်း နောက်ထပ်တစ်ဖန် သေရ ဦးမှာ ဖြစ်တဲ့အတွက် ကုသိုလ်ကံ ၊ အကုသိုလ်ကံ တို့မှာလည်း တဖန်သေမယ့် ဘ၀ကိုရအောင် ပြုလုပ်ရာ ရောက်နေတဲ့ သတ်တတ်၊ သေစေတတ်တဲ့ မာရ်ပဲ ဖြစ်ပါတယ်။)
၎။ ခန္ဓ မာရ် = ခန္ဓငါးပါး
(ခန္ဓမာရ် ဆိုရာမှာ ခန္ဓာကိုယ်ရှိနေသမျှ ဒီခန္ဓာကိုယ်ဟာ သေရမည်အမှန်ပဲ ဖြစ်ပါတယ်၊ ခန္ဓာကိုယ်မရှိတော့မှ သေရခြင်းကင်းမှာ ဖြစ်ပါတယ်။၊ ဒါကြောင့် ခန္ဓာကိုယ်ဟာလည်း သေရခြင်း အကြောင်းတစ်ရပ် ဖြစ်ပါတယ်။ ဒါကိုရည်ရွယ်ပြီး ခန္ဓမာရ်- ခန္ဓာတည်းဟူသော သေမှုသေခင်း တစ်ရပ်လို့ ဆိုခြင်း ဖြစ်ပါတယ်။)
၅။ မစ္စု မာရ် = သေခြင်းတရား
(မစ္စုဆိုတာ သေခြင်းပဲ ဖြစ်ပါတယ်။ မွေးလို့သေ သေပြီးနောက်မှာ ဘဝသစ်တစ်ခါ ပြန်ဖြစ်၊ အဲဒီလို တစ်ဘဝပြီး တစ်ဘဝ ထပ်ထပ်ကျင်လည်မှုတွေ ရှိနေရတာ ဖြစ်ပါတယ်။ ကိလေသာမကုန်သေးသမျှ သေပြီးနောက်မှာ မွေးခြင်းဖြစ်လာပြီး မွေးနေသမျှ သေနေကြရမှာ ဖြစ်လို့ သေခြင်းတရားဟာလည်း နောက်ထပ်တစ်ခါ သေစေတတ်တဲ့ မာရ်တစ်မျိုးလို့ ဆိုခြင်းဖြစ်ပါတယ်။) တို့ပဲ ဖြစ်ဖြစ်သည်။

Read more »

Live Questions and Answers (13)…

မနာပ ဒါယီ အင်တာနက်စာမျက်နှာ အောက်ခြေမှာ ဖွင့်ထားတဲ့ Live Questions and Answers ကဏ္ဍတွင် မေးဖြေထားချက် အချို့ကို အများဖတ်၍ အမြတ်ဖြစ်စေဖို့်၊ နဲနဲပဲဖြစ်ဖြစ် အသိပညာ ဗဟုသုတ ရရှိနိုင်ကြစေဖို့အတွက် တစ်ဆင့်ပြန်လည် တင်ပြပေးလိုက်ပါတယ်။

22 Jun 11, 12:33 AM
သဲသဲ
အရှင်ဘုရား မေးခွန်းလေးတစ်ခုမေးခွင့်ပြုပါဘုရား ဘာသာခြားတစ်ယောက်က တပည့်တော်ကို မေးလာတယ်ဘုရား။ လူတွေသေလို့ သရဲဖြစ်ရင်ကမ္မ၀ါဖတ်ရင် ထွက်သွားပြီး ဘုန်းကြီးတွေပျံလွန်တော်မူလို့ရှိရင် ဘာကြောင့် ကမ္မ၀ါ ဖတ်ရင်မထွက်ရတာလဲတဲ့ဘုရား။ ဟိုတလောက ဇာတ်ကားထဲမှာလည်း သရဲက ဘုန်းကြီးတွေက ကမ္မ၀ါဖတ်တာကို ထွက်မသွားတဲ့အပြင် စကားတွေတောင် ပြန်ပြောနေသေးတာကိုလည်း နားမလည်ဘူးတဲ့ဘုရား ကျေးဇူပြုပြီး တပည့်တော်ကို ပြန်ဖြေပေးတော်မူပါဘုရား။

22 Jun 11, 06:37 PM
မနာပ ဒါယီ>>>သဲသဲ
တစ္ဆေသရဲ နာနာဘာဝ စတာတွေဟာ ပြိတ္တာတွေပဲ ဖြစ်ပါတယ်။ လူဖြစ်ဖြစ် ရဟန်းဖြစ်ဖြစ် သေခါနီးမှာ အစွဲတစ်ခုခုနဲ့ သေသွားရင် ပြိတ္တာဘုံဘဝကို ရောက်သွားနိုင်ပါတယ်။ အဲဒီလို ပြိတ္တာဘဝကို ရောက်သွားတဲ့သူများဟာ သူတို့ရဲ့ အစွဲ၊ ဒါမှမဟုတ် အကုသိုလ် အကြီးအသေးကို လိုက်ပြီး အဲဒီဘုံဘဝက ကျွတ်မကျွတ်ကွာခြားပါတယ်။ ပရိတ်ပဋ္ဌာန်းကမ္မဝါစာ ရွတ်ဖတ်ပေးခြင်းဟာ သူတို့ကို အဲဒီဘဝက ကျွတ်အောင်လုပ်ပေးခြင်း မဟုတ်ပါဘူး။ ကျွတ်လည်းမကျွတ်နိုင်ပါဘူး။ အဲဒီနေရာကနေ ပြောင်းသွားဖို့၊ ထွတ်သွားဖို့အတွက်လောက်ပဲ ဖြစ်ပါတယ်။ ကျွတ်ဖို့ကတော့ ကုသိုလ်ကောင်းမှုလုပ်ပြီး အမျှပေးဝေကာ သာဓုခေါ်စေမှ ကျွတ်မှာဖြစ်ပါတယ်။ ဒါတောင် ပြိတ္တာဘဝ ရောက်နေတဲ့သူက သာဓုခေါ်နိုင်မှပဲ ဖြစ်ပါတယ်။ တစ်ချို့ အရမ်းအကုသိုလ်ကြီးအစွဲကြီးတဲ့ ပုဂ္ဂိုလ်တွေဟာ အဲဒီပြိတ္တာဘဝမှာ သာဓုမခေါ်နိုင်ဘဲ သက်တမ်းကုန်တဲ့အထိ ခံရတာလည်း ရှိတတ်ပါတယ်။ ဘုန်းကြီးတွေသေလို့ ပြိတ္တာဖြစ်ရင် ကမ္မဝါစာ ဖတ်လို့မရဘူး ဆိုတာကလည်း ခုနပြောသလို ဘုန်းကြီးဘဝက သေသွားလို့ဆိုတာထက် အစွဲအကုသိုလ် ကြီးလို့မရတာလို့ ဆိုရမှာ ဖြစ်ပါတယ်။ နောက်တစ်ချက် အဲဒီလို သေသူအတွက် ကုသိုလ်လုပ်ပေးပေမယ့် သူတို့မရတာ၊ ပရိတ်ပဋ္ဌာန်းကမ္မဝါစာ ဖတ်လို့မရတာတွေဟာ သူတို့ကိုယ်တိုင်က အကုသိုလ်အစွဲကြီးလို့ ဖြစ်နိုင်သလို အလှူခံပုဂ္ဂိုလ်၊ ပရိတ်ပဋ္ဌာန်း ကမ္မဝါစာရွတ်ဖတ်ပေးတဲ့ ဆရာတော် သံဃာတော်များရဲ့ သီလသမာဓိပညာ အကျင့်ဂုဏ်ပြည့်စုံမှု၊ မပြည့်စုံမှုနဲ့လည်း ဆိုင်တတ်ပါတယ်။ သီလသမာဓိပညာအကျင့်ဂုဏ် ပြည့်စုံမှုမရှိရင် ပြိတ္တာဘဝရောက်နေသူတွေအတွက် အကျိုးသက်ရောက်မှု မရှိတာလည်း ရှိတတ်ပါတယ်။ ဒါကြောင့် ဘုန်းကြီးသရဲ ကမ္မဝါစာ ဖတ်လို့မရဘူးဆိုတာ ဘုန်းကြီးသရဲဖြစ်လို့ဆိုတာထက် အစွဲအကုသိုလ်ကြီးလို့လို့ဆိုခြင်း ဖြစ်ပါတယ်။ ဒါကလည်း ဘုန်းကြီးသရဲတိုင်း မဟုတ်ဘဲ အစွဲအကုသိုလ်အရမ်းကြီးတဲ့ အချို့အနည်းငယ်သာ ဖြစ်ပါကြောင်း သိစေလိုပါတယ်။

28 Jun 11, 05:46 AM
တောက်ပကြယ်စင်

ဘုန်းကြီးဘုရား မင်္ဂလာပါဘုရား ရန်ကုန်က တပည့်တော်ဒကာမတစ်ယောက်က သက်ရှိထင်ရှားနေသူကို အမျှပေးဝေလို့ ရမရ တပည့်တော်ကို မေးမြန်းလာလို့ ဘုန်းကြီးကို တစ်ဆင့်မေးမြန်းခွင့်ပြုပါဘုရား...သူနေတဲ့နေရာက ခနက်ရှင် သိပ်ကောင်းပုံမရဘူးဘုရား ဒါကြောင့် တပည့်တော်က အီးမေးလ်ကနေတစ်ဆင့် သူ့ဆီကို စာပြန်ရေးရမယ်ဘုရား အားလပ်တဲ့အခါ ဖြေကြားပေးတော်မူပါဦးဘုရား ဘုန်းကြီးဆိုဒ်ပေါ်တင်ထားရင်လည်း တပည့်တော်အဲဒီကနေ ပြန်ကူးလိုက်မယ်ဘုရား

မနာပ ဒါယီ>>> တောက်ပကြယ်စင်
မင်္ဂလာပါ ညီတော်ရေ..
တစ်ဆင့်မေးတာဆိုတော့ တစ်ဆင့်ပြန်ဖြေပေးလိုက်ပါဦး။ အမျှဝေတာနဲ့ ပတ်သက်လို့ သက်ရှိထင်ရှား ရှိနေသူကို အမျှပေးဝေလို့ ရပါတယ်။ ဘယ်ဘဝ ရောက်သွားတယ်ဆိုတာ မသေချာတဲ့ သေသူကိုရည်စူးပြီး အမျှဝေတာထက် လက်ရှိအသက်ရှင်နေသူကို အမျှဝေတာက ပိုတောင်ကောင်းပြီး၊ ကုသိုလ်ကောင်းမှုကို အမျှရဖို့ ပိုတောင်သေချာပါသေးတယ်။ ဒါပေမယ့် အမျှဝေသူကလည်း ထက်သန်တဲ့သဒ္ဓါ၊ စစ်မှန်တဲ့ စေတနာနဲ့ အမျှဝေပြီး အမျှယူသူကလည်း နှစ်လိုဝမ်းမြောက်စွာ သာဓုခေါ်နိုင်မှ ကုသိုလ်ကောင်းမှုကို အမျှရနိုင်မှာ ဖြစ်ပါတယ်။ စာပေမှာလာတဲ့ ပတ္တိဒါနဆိုတာ မိမိရရှိတဲ့ ကုသိုလ်အဖို့ကို တခြားသူများအားလည်း အညီအမျှ ရပါစေဆိုတဲ့ ဆန္ဒနဲ့ အမျှအတမ်းပေးဝေခြင်းမျိုးကို ဆိုတာဖြစ်တဲ့အတွက် တစ်စုံတစ်ယောက်ကို အမျှဝေဖို့ဆိုတာ အမျှဝေမယ့်သူကိုယ်တိုင် အရင်ဆုံး ကုသိုလ်ကောင်းမှုကို ရအောင်လုပ်ယူရမှာ ဖြစ်ပါတယ်။ ဝတ်ကျေတန်းကျေ လုပ်တဲ့ကုသိုလ်မျိုး မဟုတ်ဘဲ အလှူပေး၊ အလှူခံ၊ အလှူဝတ္ထုပြည့်စုံအောင် လုပ်ပြီး စေတနာသုံးတန် ပြတ်သားစွာနဲ့ ကုသိုလ်ကောင်းမှုကို ရအောင်လုပ်ပြီး မိမိရတာနဲ့အညီ သူတပါးလည်း ရပါစေလို့ အမျှဝေခြင်းမျိုးကို ပတ္တိဒါနလို့ ခေါ်တာ ဖြစ်ပါတယ်။ ဒီလိုနည်းနဲ့ အမျှဝေးနိုင်မယ်ဆိုရင် အမျှဝေတဲ့သူဘက်က ပြည့်စုံတယ်လို့ ဆိုရမှာ ဖြစ်ပါတယ်။ ဒီလို သဘောမျိုးနဲ့ အမျှပေးဝေနိုင်မယ်ဆိုရင် အမျှယူသူ ရသည်ဖြစ်စေ၊ မရသည်ဖြစ်စေ အမျှဝေသူမှာ ပတ္တိဒါနကုသိုလ်ကို ရပြီးဖြစ်ပါတယ်။

ဒီလိုပဲ ပတ္တာနုမောဒနာဆိုတာ မိမိထံသို့ ရောက်လာတဲ့ ကုသိုလ်အဖို့ကို ဝမ်းမြောက်ဝမ်းသာ သာဓုခေါ်တာကို ဆိုတာ ဖြစ်ပါတယ်။ သူတပါးရဲ့ ကုသိုလ်ကောင်းမှုကို အညီအမျှ ရယူဖို့ သာဓုခေါ်ကြတဲ့ အမျှယူသူ အနေနဲ့လည်း တကယ့်ကို စစ်မှန်တဲ့စေတနာနဲ့ ဝမ်းမြောက်ဝမ်းသာ မုဒိတာတရားထားပြီး သာဓုခေါ်နိုင်မယ်ဆိုရင် အမျှဝေတဲ့သူနဲ့အတူ အညီအမျှ ရနိုင်မှာ ဖြစ်ပါတယ်။ ကိုယ်ကိုယ်တိုင်က လိုလိုလားလား စေတနာမထား၊ သဒ္ဓါတရားမပွားဘဲ သူများသာဓုခေါ်လို့ ခေါ်လိုက်တဲ့သဘောမျိုး၊ အကျင့်ပါနေလို့ ခေါ်လိုက်တဲ့သဘောမျိုး၊ ဝတ်ကျေတန်းကျေ သာဓုခေါ်တဲ့ သဘောမျိုးဆိုရင် အမျှယူသူအနေနဲ့ ကုသိုလ်အဖို့ကို အမျှမရနိုင်ပါဘူး။ ဒီလိုဆိုရင် ပတ္တာနုမောဒနာကုသိုလ်လည်း ရနိုင်မှာ မဟုတ်ပါဘူး။ အမျှယူသူ အနေနဲ့ အလှူရှင်က ကိုယ့်ကို သီးသန့်ရည်ရွယ်ပြီး အမျှဝေတာမျိုးမဟုတ်လည်း အလှူရှင်ရဲ့အလှူကို ကြည့်ပြီးကိုယ့်အသိနဲ့ကိုယ် တကယ့်ကို မှန်ကန်တဲ့စိတ်စေတနာနဲ့ ဝမ်းမြောက်ဝမ်းသာ သာဓုခေါ်ဆိုနိုင်မယ်ဆိုရင်လည်း ကုသိုလ်စိတ်ဖြစ်ပြီး ကုသိုလ်တိုးနိုင်မှာ ဖြစ်ပါတယ်။

ဒါကြောင့် ကုသိုလ်ကောင်းမှုကိုပြုပြီး သက်ရှိထင်ရှားရှိသူကိုဖြစ်စေ၊ သက်ရှိထင်ရှား မရှိတဲ့သူကို ဖြစ်စေ ရည်မှန်းရည်စူးကာ အမျှပေးသူနဲ့ အဲဒီကုသိုလ်ကို သာဓုခေါ်ကာ ရယူကြမယ့် အမျှယူသူတွေ အနေနဲ့ အမျှပေးဝေမှုနဲ့ အမျှယူမှု အထမြောက်အောင်မြင်ဖို့၊ ကုသိုလ်ကောင်းမှုအကျိုးကို အညီအမျှ ရဖို့အတွက် အမျှပေးသူကလည်း စေတနာသဒ္ဓါတရား ထက်သန်ဖို့လိုသလို အမျှယူသူကလည်း ကောင်းမွန်တဲ့ စေတနာနဲ့ ဝမ်းမြောက်ဝမ်းသာ မုဒိတာပွားကာ သာဓုခေါ်နိုင်ဖို့ လိုပါတယ်။ အဲဒီလို နှစ်ဖက်ပြည့်စုံကြမယ်ဆိုရင် နှစ်ဦးနှစ်ဘက်လုံး ကုသိုလ်ကောင်းမှုကို အညီအမျှ ရနိုင်ပါကြောင်း အသိပေး ဖြေကြားလိုက်ရပါတယ်။

30 Jul 11, 02:02 AM
k s m
ဆရာတော်ဘုရား တပည်တော် မရှင်းတာလေးတွေရှိ မေးလျှောက်ခွင့်ပြုပါဘုရား။ ဆရာတော်ဘုရား လူတွေဟာကောင်းတာနဲ့ မကောင်းတာတွေလုပ်ရင် မကောင်းတာက အကျိုးပေးမြန်တယ်လို့ ပြောကြတယ်ဘုရား အဲဒါမှန်လားဘုရား။


30 Jul 11, 06:46 AM
မနာပ ဒါယီ>> k s m
ကောင်းတာနဲ့ မကောင်းတာ ဘယ်ဟာက အရင်အကျိုးပေးတာလဲဆိုရင် စေတနာအားကြီးတဲ့ကံက အရင်အကျိုးပေးတာလို့ပဲ ပြောရမှာဖြစ်ပါတယ်။ ဒါပေမယ့် မကောင်းတာက အရင်အကျိုးပေးတယ်လို့ ထင်ရတတ်တာက သတ္တဝါတွေဟာ ကောင်းတာနဲ့ မကောင်းတာဆို မကောင်းတဲ့အလုပ်တွေမှာ ပိုပြီးစေတနာ အားကောင်းနေတတ်ပြီး ကောင်းတဲ့အလုပ်တွေမှာဆို စေတနာက တွန့်ဆုတ်တွန့်ဆုတ် ဖြစ်နေတတ်ပါတယ်။ ဒါကြောင့်လည်း စေတနာ အားကောင်းကောင်းနဲ့ လုပ်ခဲ့တဲ့ အကုသိုလ်က အားကြီးပြီး အရင်အချိုးပေးတဲ့အခါ အကုသိုလ်က ပိုပြီးအကျိုးမြန်တယ်လို့ ထင်ရခြင်းဖြစ်ပါတယ်။ ကောင်းတဲ့ကံတွေကတော့ ပြုလုပ်သူတွေကိုယ်တိုင် အကြောင်းအမျိုးမျိုးကြောင့် စေတနာသဒ္ဓါတရားက ပြည့်စုံသင့်သလောက် မပြည့်စုံဘဲ ဖြစ်တတ်ပါတယ်။ အဲဒီလို မပြည့်စုံတဲ့အတွက်ကြောင့်လည်း ကောင်းမှုကုသိုလ်ဟာ အကျိုးပေးတဲ့အခါမှာလည်း အားနည်းပြီး အချိန်တန်မှသာ အကျိုးပေး ရောက်လာတတ်တဲ့ သဘောဖြစ်ပါတယ်။ အကုသိုလ်လည်း အချိန်တန်မှ အကျိုးပေးတာဆိုပေမယ့် စေတနာအားကောင်းတာရယ်၊ အားကောင်းတဲ့စေတနာက အကျိုးပေးချိန်ကို ကျစေတာရယ်ကြောင့် အမြန်အကျိုးပေးတာလို့ ပြောရခြင်း ဖြစ်ပါတယ်။ အဓိကကတော့ ပြုလုပ်သူရဲ့ စေတနာအားကြီးမှု၊ မကြီးမှုက အဓိကပဲ ဖြစ်ပါတယ်။

Read more »

Facebookက အမေးတစ်ပုဒ် (၃)

မေး။ အရှင်ဘုရား.. တပည့်တော် မေးလျှောက်စရာများရှိလို့ မေးပါရစေဘုရား။ ၀ါတွင်းကာလ နီးလာဘီဆိုတော့ အိမ်အပြောင်းအရွေ့များ အယူအဆအရ မလုပ်ကြရပါဘူးလို့ ဆိုတယ်ဘုရား၊ အကယ်၍ ပြောင်းရွေ့စရာများ ရှိရင်လည်း ၀ါမ၀င်ခင်ကထဲက စတိသဘော ပြောင်းထားရပါတယ်တဲ့။ ဒီလိုမှ မဟုတ်ရင်တော့ ဘာဖြစ်မယ်၊ ညာဖြစ်မယ်ပေါ့ဘုရား။ တပည့်တော်များလည်း ဒါတွေကို လိုက်နာ ကျင့်သုံးလာတာလည်း ကြာလှပါဘီဘုရား။ ရေရေလည်လည် မသိဘဲ လိုက်နာကျင့်သုံးလာရတော့ တစ်ခါတစ်လေ အဓိပ္ပါယ်ကို တိတိကျကျမသိဘဲ။ ရည်ရွယ်ချက်ကို တိတိကျကျမသိဘဲ။ မျိုးရိုးစဉ်ဆက် ကျင့်သုံးလာလို့ ကျင့်သုံးနေရတယ်လို့ ဆိုလို့လည်း ရပါတယ်။ ယခုတော့ ဒီလိုအယူအဆတွေကို တကယ်ဘဲ လိုက်နာကျင့်သုံး သင့်သလားဆိုတာကို တွေးမိလာရ ပါတယ်။ တကယ်ကျင့်သုံးရမယ်ဆိုရင်လည်း ဘာကြောင့်ကျင့်သုံး သင့်သလဲဆိုတာကိုလည်း သိချင်လာ ပါတယ်။ အဲ့သည့်အတွက် ဘုရားဟောကျမ်းစာများတွင် ဖော်ပြပါဝင်ပါသလားဘုရား။ မေတ္တာရှေ့ထား၍ တပည့်တော်အား ဖြေကြားပေးပါဟု လျောက်ထားပါရစေဘုရား...။

လေးစားစွာဖြင့်...
ဗုဒ္ဓဟောကြား မြတ်တရား

ဖြေ။ မြန်မာနိုင်ငံမှာ ဝါတွင်းကာလနဲ့ ပတ်သက်တဲ့ အရိုးစွဲနေတဲ့ အမှားတွေ အများကြီးရှိပါတယ်။ ဘာသာရေးနဲ့ မသက်ဆိုင်တဲ့ အယူအဆ အမှားတွေဟာ ကြာတော့ဘုရားပဲ ဟောသလိုလို၊ ကျမ်းဂန်တွေမှာပဲ ပါသလိုလို ဖြစ်ကုန်တာတွေ အများကြီးပါပဲ။ ဒီအများကြီးတွေထဲက မေးခွန်းရှင်မေးထားသလို၊ ဝါတွင်းကာလ အိမ်မပြောင်းရ၊ အိမ်မရွေ့ရ၊ အိမ်မဆောက်ရ စတာတွေလည်းရှိသလို ဝါတွင်းကာလ အိမ်ထောင်မပြုရ ဆိုတာတွေတောင် ပါနေပါသေးတယ်။ ဒီအယူအဆတွေဟာ ဘုရားဟောထဲမှာ မပါတဲ့၊ ဘုရားဟောနဲ့ မသက်ဆိုင်တဲ့ လောကီအယူအဆတွေပဲ ဖြစ်ပါတယ်။

ဝါတွင်းကာလမှာ အိမ်ပြောင်းရင်၊ အိမ်ရွှေ့ရင် ဘာဖြစ်မယ်၊ ညာဖြစ်မယ်ဆိုတဲ့ ရှေးရိုးစွဲအယူအဆတွေ၊ လောကဓာတ်ဆရာတွေရဲ့ ဟောပြောမှုတွေကြောင့် အခုနောက်ပိုင်းမှာ လူအတော်များများက ရက်ကောင်းရက်မြတ်ရွေးတာတို့၊ ဝါမဆိုခင်၊ ဒါမှမဟုတ် ဝါကျွတ်ပြီးမှ လုပ်တာတို့ စတာတွေ ဖြစ်လာကြတာ ဖြစ်နိုင်ပါတယ်။ ရှေးတုန်းကတော့ ရာသီဥတု အနေအထားအရ ဝါတွင်းဆိုတာ မိုးတွင်းကာလ ဖြစ်တဲ့အတွက် မိုးရွာနေတဲ့အချိန်မှာ အပြောင်းအရွှေ့လုပ်ရင် ပိုပြီးဒုက္ခများနိုင်တဲ့အတွက် ချောက်ချောက်သွေ့သွေ့ဖြစ်တဲ့ မိုးမကျခင်ကာလ ဒါမှမဟုတ် မိုးရာသီပြီးမှ လုပ်ကြတဲ့ အစဉ်အလာတွေ ရှိကြပါတယ်။ ဒါက ရာသီဥတု အခြေအနေကြောင့် ဖြစ်ပါတယ်။ ခုနောက်ပိုင်းတော့ ဗေဒင်ဆရာ၊ ယတြာဆရာ၊ နက္ခတ္တဆရာ စတဲ့လောကဓာတ် ဆရာတွေရဲ့ အာဘော်တွေ၊ ဒီလောကဓာတ် ဆရာတွေရဲ့ အယူအဆကို ယုံကြည်သူတွေကြောင့် ဝါတွင်းကာလ အိမ်မပြောင်းကောင်းတာတို့၊ အိမ်မရွှေ့ကောင်းတာတို့၊ အိမ်မဆောက်ကောင်းတာတို့၊ အိမ်ထောင် မပြုကောင်းတာတို့ စတာတွေ ဖြစ်လာတာ ဖြစ်နိုင်ပါတယ်။ ဒီလိုခေတ်စားလာတာတွေဟာ ဘုရားဟောမှာပါလို့ လုပ်ကြတာတော့ မဟုတ်ကြပါဘူး။

ဗုဒ္ဓစာပေတွေမှာတော့ ဒီလိုကိစ္စတွေနဲ့ ပတ်သက်ပြီး ဘယ်အချိန်မှာ မလုပ်ကောင်းဘူး၊ ဘယ်အချိန်မှာ လုပ်ရမယ် စသဖြင့် ဟောထားတာ မရှိပါဘူး။ ဘယ်လိုမင်္ဂလာ၊ ဘယ်လိုနက္ခတ်တွေနဲ့ အညီမှ လုပ်ရမယ်ဆိုတာ မရှိပါဘူး။ ဒီလို နည်းတွေကိုလည်း ဘုရားမြတ်စွာက အားမပေးပါဘူး။ အဲ နက္ခတ်၊ မင်္ဂလာ စတဲ့အယူအဆတွေ သိပ်ပြင်းပြနေတယ်ဆိုရင်တော့ ကောင်းတဲ့အကျင့်ကို များများကျင့်ကြဖို့ပဲ မိန့်တော်မူပါတယ်။ ဒီစကားတော်ကို ပရိတ်ကြီး၊ ပုဗ္ဗဏှသုတ်မှာ လာတဲ့စကားတော်က အထင်းအရှား ဖြစ်စေပါတယ်။ အဲဒီသုတ်တော်မှာ ဘုရားရှင်က “ကောင်းမြတ်သောအကျင့်ကို ကျင့်နေသူများအဖို့ အမြဲတမ်း နက္ခတ်ကောင်းပါတယ်၊ အမြဲတမ်း ကျက်သရေမင်္ဂလာ ရှိပါတယ်၊ အမြဲတမ်း ကောင်းသော မိုးလင်းခြင်း ဖြစ်ပါတယ်၊ အမြဲတမ်း ကောင်းသော အိပ်ရာထခြင်း ဖြစ်ပါတယ်၊ အမြဲတမ်း ကောင်းသော အချိန်အခါ ဖြစ်ပါတယ်၊ အမြဲတမ်း ကောင်းသော ပူဇော်ခြင်း ဖြစ်ပါတယ်” လို့ ဟောကြားတော်မူထားတာကို တွေ့ရမှာ ဖြစ်ပါတယ်။

နောက် အိမ်အပြောင်းအရွှေ့ ပြုလုပ်ကြတာနဲ့ ပတ်သက်ပြီး ဗုဒ္ဓစာပေတွေမှာ အထူးမိန့်တော် မူထားတာ မရှိပေမယ့် အိမ်သစ်တက်တဲ့အခါ၊ မြို့ရွာအသစ်တည်တဲ့ အခါတွေနဲ့ ပတ်သက်ပြီးတော့ မဟာပရိနိဗ္ဗာနသုတ်မှာ မိန့်တော်မူထားတဲ့ ဘုရားစကားတော် ရှိပါတယ်။ ဒီသုတ်တော်မှာ ဘုရားရှင်က “ပညာရှိသည် အကြင်အရပ်၌ အိမ်ရာဆောက်လုပ်နေထိုင်၏၊ ဤအရပ်၌ သီလရှိသော၊ ကိုယ်နှုတ်နှလုံး စောင့်သုံးသော၊ မြတ်သောအကျင့်ကို ကျင့်သောပုဂ္ဂိုလ်တို့ကို ဆွမ်းကျွေးပြီးလျှင် ထိုအရပ်၌ ရှိသောနတ်တို့အား အလှူ၏ အဖို့ကို အမျှဝေရာ၏၊ ဤသို့ အမျှပေးဝေလတ်သော် နတ်တို့သည် ပူဇော်ခံရသဖြင့် ထိုအမျှပေးဝေသူကို အတုန့်ပြန်၍ ပူဇော်ကုန်၏၊ မြတ်နိုးခံရသဖြင့်လည်း အတုန့်ပြန်၍ မြတ်နိုးကုန်၏၊ ထို့ကြောင့် မိခင်သည် ရယ်ဝယ်သားကို စောင့်ရှောက်သကဲ့သို့ ထိုအမျှဝေသူကို စောင့်ရှောက်၏၊ နတ်တို့စောင့်ရှောက်ခံရသောသူသည် အခါခပ်သိမ်း ကောင်းခြင်းမင်္ဂလာတို့ကိုသာ တွေ့မြင်ရလေ၏” လို့ ဟောကြားတော်မူထားတာကို တွေ့ရပါတယ်။ ဒီစကားတော်အရ အိမ်အသစ်တက်တဲ့အခါ၊ နေရာအသစ် ပြောင်းတဲ့အခါမှာ အိမ်တက်အလှူစတာတွေ လုပ်ကြခြင်း ဖြစ်ပါတယ်။ ဒီလိုအလုပ်မျိုးကတော့ ဘုရားရှင်ရဲ့ တရားတော်နဲ့လည်း ညီညွတ်လှတဲ့အတွက် ကောင်းတဲ့အစဉ်အလာလို့ ပြောရမှာ ဖြစ်ပါတယ်။

ဒါပေမယ့် ဘယ်အချိန်၊ ဘယ်ကာလမှာ ဘာမလုပ်ကောင်းဘူး ဆိုတာတွေကတော့ ဘုရားဟောနဲ့ မညီသလို၊ ကိုယ့်ရဲ့ ကံတရားတွေကို မယုံကြည်ကြလို့ပဲလို့ ပြောရမှာ ဖြစ်ပါတယ်။ တကယ်လို့သာ အခါကာလတွေ ပြောကြကြေးဆိုရင် ဝါးတွင်းဝါပတွေ ရွေးစရာမလိုပါဘူး။ မကောင်းတာလုပ်တဲ့ သူတွေအတွက် အချိန်တိုင်းဟာ မကောင်းတာတွေ ဖြစ်နေမှာဖြစ်ပြီး ကောင်းတာလုပ်တဲ့သူတွေအတွက် အချိန်တိုင်းဟာ အကောင်းတွေပဲ ဖြစ်နေကြမှာ ဖြစ်ပါတယ်။ ဘယ်အချိန်အိမ်ပြောင်းပြောင်း ကိုယ်ကမကောင်းဘူးဆိုရင် မကောင်းတာတွေကို တွေ့ကြုံလာရမှာ ဖြစ်ပြီး ကိုယ်ကကောင်းနေမယ်ဆိုရင် ဝါတွင်းမှမဟုတ်ပါဘူး ဘယ်အချိန်ပဲ ဖြစ်ဖြစ် ကောင်းနေကြမှာ ဖြစ်ပါတယ်။

ဆိုလိုတာက ဝါတွင်းကာလ၊ အိမ်မပြောင်းရ၊ အိမ်ထောင်မပြုရ စတဲ့အယူအဆတွေဟာ ဘုရားဟောအရ လုပ်ကြတာမဟုတ်ဘဲ၊ ရှေးရိုးစွဲအယူအဆတွေကြောင့်နဲ့ ခေတ်စားလာတဲ့ လောကဓာတ်ဆရာတွေရဲ့ အယူအဆတွေကြောင့် မလိုအပ်ဘဲ အယူသည်းလာကြတာ ဖြစ်ကြောင်း၊ ဘုရားဟောအနေနဲ့ကတော့ တကယ်လို့ နက္ခတ်၊ မင်္ဂလာတွေ ရွေးကြကြေးဆိုရင် ကောင်းတဲ့အကျင့်တွေ လုပ်နေခြင်းဟာ ကောင်းတဲ့နက္ခတ်၊ ကောင်းတဲ့မင်္ဂလာ စတာတွေ ဖြစ်နေကြမှာ ဖြစ်ပြီး မကောင်းတဲ့ အလုပ်တွေ လုပ်နေတဲ့အချိန်ဟာ မကောင်းတဲ့ အတိတ်နိမိတ်တွေ ဖြစ်နေကြမှာ ဖြစ်ကြောင်း မှတ်သားကြရမှာ ဖြစ်ပြီး ဒီလို ဘယ်အချိန်၊ ဘယ်ကာလစတာတွေ ရွေးကြဖို့ထက် ဘယ်လိုမကောင်းမှုကို ဘယ်လိုရှောင်ကြဉ်ကြည့်ကြမယ်၊ ဘယ်လိုကောင်းမှုမျိုးကို ဘယ်လိုရှာပြီး လုပ်ကြမယ် စသဖြင့် ရွေးချယ်ခြင်းကသာ ဗုဒ္ဓအလိုတော်ကျ ဖြစ်ကြောင်း ဆိုလိုချင်တာ ဖြစ်ပါတယ်။

ဒါကြောင့် ဝါတွင်းကာလ ဘာမလုပ်ရ၊ ညာမလုပ်ရ စတဲ့အယူအဆတွေဟာ အရိုးစွဲနေတဲ့ ရှေးအယူအဆများနဲ့ ဗေဒင်နက္ခတ် စတဲ့ လောကဓာတ်ဆရာတွေရဲ့ အယူအဆများသာ ဖြစ်ပြီး ဘုရားဟော အယူအဆ မဟုတ်တဲ့အပြင် ဘုရားဟောနဲ့လည်း မညီတဲ့အလုပ်များ ဖြစ်တဲ့အတွက် ဒီလိုအယူအဆတွေမှာ အာရုံမထားကြဘဲ တကယ်အလေးထားရမှာက မိမိတို့ရဲ့ လုပ်ရပ်များကိုသာ အလေးထားရမှာဖြစ်ကာ ကောင်းတဲ့အလုပ်၊ ကောင်းတဲ့အကျင့်များ လုပ်နေကြတဲ့ အချိန်တိုင်းဟာ ကောင်းတဲ့ ရက်ကောင်းရက်မြတ် အချိန်ကောင်းများပဲ ဖြစ်ပြီး မကောင်းတဲ့ အလုပ်များကို လုပ်နေတဲ့ အချိန်တွေဟာ မကောင်းတဲ့ နက္ခတ်၊ အမင်္ဂလာ အချိန်တွေသာ ဖြစ်တဲ့အတွက် ဝါတွင်းကာလ ဘာမလုပ်ရ၊ ညာမလုပ်ရ စတဲ့ အခြေအမြစ်မရှိတဲ့ အယူအဆတွေ လိုက်နေကြမယ့်အစား ကိုယ့်ကိုယ်ကိုသာ အကောင်းဆုံး ဖြစ်အောင် နေကြည့်ကြဖို့ပဲ ဖြစ်ပါကြောင်း အမေးကြည့်၍ အဖြေညှိလိုက်ရပါတယ်။

Read more »

Facebookက အမေးတစ်ပုဒ် (၂)

ဘုန်းဘုန်းရဲ့ facebook (http://www.facebook.com/ashinvicitta)မှာ တင်ထားတဲ့ “ကိုယ့်ကိုယ်ကို ပြန်သတ်ခြင်း” ဆိုတဲ့ ပို့စ်အောက်မှာ မေးထားတဲ့ အမေးလေးတစ်ပုဒ်ပါ။ စိတ်ဝင်စားစရာကောင်းပြီး သိသင့်တယ်ထင်လို့ ပြန်လည်တင်ပြ ပေးလိုက်ပါတယ်။

မေး။ ကိုယ့်ကိုယ်ကို သတ်သေတာနဲ့ ပတ်သက်ပြီး တပည့်တော် သိချင်တာလေး တစ်ခုကို မေးလျှောက်ခွင့်ပြုပါ အရှင်ဘုရား။ အဲဒါ မမေးခင် လူ (သတ္တဝါ) ဟာ မိမိကိုယ်မိမိ အချစ်ဆုံးလို့ တပည့်တော် ကြားနာဖူးပါတယ် ဘုရား။ အဲဒါ မြတ်စွာဘုရားဟောတာ ဟုတ်မဟုတ် သိချင်ပါတယ်။ အကယ်၍ မြတ်စွာဘုရားက အဲလို ဟောခဲ့တယ်ဆိုရင် ကိုယ့်ကိုယ်ကို အချစ်ဆုံးဖြစ်တဲ့လူဟာ ဘာဖြစ်လို့ ကိုယ့်ကိုယ်ကို သတ်သေရတာလဲ ဆိုတာသိချင်ပါတယ် အရှင်ဘုရား။ ပြီးတော့ မိမိကိုယ်မိမိ အချစ်ဆုံးပါဆိုတဲ့လူဟာ ဘာဖြစ်လို့ တစ်ခြားတစ်ယောက်အတွက် အသက်ပေးပြီး အသေခံ ကြပါသလဲ။ ဥပမာ တိုက်ပွဲတစ်ခုခုမှာ ကိုယ်အရမ်းလေးစား ချစ်ခင်ရတဲ့ ဗိုလ်ကြီးအတွက် အသက်ပေးပြီး အသေခံ ကာကွယ်တဲ့ရဲဘော်တို့၊ သားလေး ကားတိုက်ခံရမှာကို သားကိုတွန်းပြီး အစားဝင် ကားအတိုက်ခံပြီး သားအစား အသေဝင်ခံလိုက်တဲ့မိခင်တို့ အဲဒီအကြောင်းလေး တပည့်တော် သိချင်ပါတယ် အရှင်ဘုရား ဖြေကြားပေးတော်မူပါ။
သက်နိုင်

ဖြေ။ အတ္တသမံ ပေမံ နတ္ထိ - မိမိထက် ပိုပြီး၊ ဘယ်သူ့ကိုမှ၊ မချစ်နိုင်၊ မိမိကိုယ်ကို မိမိအချစ်ဆုံး ဆိုတဲ့ဘုရား စကားတော်ရှိပါတယ်။ ဒီစကားက ပုထုဇဉ်သတ္တဝါများ ဖြစ်တတ်တဲ့ သဘောကို ပြောထားတာ ဖြစ်ပါတယ်။ ပုထုဇဉ်သတ္တဝါတွေဟာ တဏှာမာနဒိဋ္ဌိ တရားများရဲ့ လွှမ်းမိုးမှုကြောင့် ကိုယ့်ကိုယ်ကိုသာ အမြဲရှေးတန်းတင်ကာ ကိုယ့်ကိုယ်ကို ဦးစားပေးမှုတွေ ရှိတတ်တဲ့အတွက် ဘာပဲဖြစ်ဖြစ် ကိုယ့်ကိုယ်ကို အချစ်ဆုံးလို့ ထင်နေတတ်တဲ့ သဘောကို ဆိုလိုတာ ဖြစ်ပါတယ်။ ဒီတဏှာမာနစတဲ့ တရားတွေကြောင့် မိမိရဲ့ရုပ်နာမ်တွေမှာ တဏှာနဲ့စွဲလမ်းချစ်ခင် တွယ်တာနေပြီး အဲဒီလို မိမိကိုယ်ကို ချစ်ခင်မှုကြောင့်ပဲ မိမိနဲ့ပတ်သက်ရာ၊ မိမိချစ်ခင်မြတ်နိုး လေးစားရာတွေမှာလည်း ချစ်ခင်တွယ်တာနေမိတော့တာ ဖြစ်ပါတယ်။ သတ္တဝါအများ ချစ်လေ့ရှိတာက ငါဆိုတဲ့အတ္တကို ချစ်နေကြတာ ဖြစ်ပါတယ်။ ဘုရားဖြစ်စေချင်တဲ့ အချစ်က အတ္တကုန်ရာ၊ တဏှာကုန်ရာကို ချစ်စေချင်တာ ဖြစ်ပါတယ်။ ဒါကြောင့် ဘုရားရှင်က မိမိကိုယ်ကို တကယ်ချစ်တယ်လို့ဆိုရင် ထိုမိမိကိုယ်ကို ကောင်းစွာစောင့်ရှောက်ရာ၏လို့ မိန့်တော်မူထားတာ ဖြစ်ပါတယ်။ ဒီစကားတော်က ကိုယ့်ကိုယ်ကို တကယ်ချစ်ရင် ကိုယ့်ကိုယ်ကို မကောင်းမှု ဒုစရိုက်တွေက ရှောင်ကြဉ်ပြီး အကျင့်သီလကို ကောင်းစွာစောင့်ထိန်းကာ ကိလေသာကုန်ရာကို သုတ်သင်ကြဖို့ တိုက်တွန်းတော်မူထားတာ ဖြစ်ပါတယ်။

ဒါပေမယ့် လောကသားတွေကတော့ တဏှာပေမစတဲ့ စွဲလမ်းမှုတွေနဲ့ ကိုယ့်ကိုယ်ကို အချစ်ဆုံးဖြစ်အောင် လုပ်နေကြတဲ့ သဘောရှိပါတယ်။ ရုပ်နာမ်ခန္ဓာကြီးကို အချစ်ဆုံးဖြစ်အောင် လုပ်နေကြခြင်း ဖြစ်ပါတယ်။ ဒါကြောင့်လည်း ငါ့စိတ်မှာ၊ ငါ့ခန္ဓာမှာ သောကတွေ ဒုက္ခတွေ ဖြစ်လာခဲ့ရင် မခံမရပ်နိုင်ဖြစ်ပြီး မထူးပါဘူးကွာဆိုကာ နောက်ဆုံးကိုယ့်ကိုယ်ကို သတ်သေသွားတဲ့အထိ ဖြစ်ကြခြင်း ဖြစ်ပါတယ်။ ဒါဟာ ဒီခန္ဓာကြီးနဲ့ ဒီစိတ်ခံစားမှုကို ချစ်လွန်းလို့ ဖြစ်တာပါ။ သာမန်တွေးရင် ကိုယ့်ကိုယ်ကို ချစ်တဲ့သူက ဘာလို့ ကိုယ့်ကိုယ်ကို သတ်သေမှာလဲလို့ တွေးစရာရှိပါတယ်။ ဒီလိုချစ်လို့လည်း ဒီရုပ်နာမ်မှာ ဒီထက်ပိုပြီး ဖြစ်ပေါ်လာမယ့် ဒုက္ခတွေ မခံစားစေလို၊ မဖြစ်ပေါ်စေလိုလို့ ငါဆိုတဲ့တဏှာအစွဲ၊ ဒီရုပ်ဒီခန္ဓာပြတ်ရင် ပြီးတာပဲဆိုတဲ့ ဒိဋ္ဌိအစွဲစတာတွေကြောင့် ကိုယ့်ကိုယ်သတ်သေကြခြင်း ဖြစ်ပါတယ်။ ကိုယ့်ကိုယ်ကို သတ်သေသွားသူ အတော်များများကို ကြည့်ရင်စိတ်ချမ်းသာလို့၊ ပျော်လို့၊ အယူအဆမှန်လို့ သတ်သေသွားကြတယ်ဆိုတာ မရှိပါဘူး။ ဒုက္ခများလို့၊ အယူမှားလို့ ဖြစ်တာတွေပဲ များနေတာကို တွေ့ရမှာ ဖြစ်ပါတယ်။ ဒါဟာ တကယ်ချစ်လို့မဟုတ်ပါဘူး။ မချစ်လို့ လုပ်ကြတာပါ။ တကယ်ချစ်ရင် ဒီဒုက္ခတွေဖြစ်စေတဲ့ တဏှာ၊ မာန၊ ဒိဋ္ဌိစတဲ့ တရားတွေကိုပဲ သတ်နိုင်အောင်ကြိုးစားကြမှာ ဖြစ်ပါတယ်။ အဲဒီလိုပဲ ကိုယ့်ကိုယ်ကို တဏှာနဲ့ စွဲလမ်းမှုတင် မလုံလောက်ဘဲ ကိုယ်ချစ်ရတဲ့သူ၊ ကိုယ်လေးစားရတဲ့သူ စတာတွေအထိ ဆက်စပ်ကာ စွဲလန်းတတ်တာတွေလည်း ရှိပါတယ်။

ဒါကြောင့် ဒီလိုငါစွဲလေးတွေကြောင့် ငါ့သားလေး တစ်ခုခုဖြစ်မှာကို စိုးရိမ်တာ၊ ငါ့ဆရာ တစ်ခုခုဖြစ်မှာကို စိုးရိမ်တာတွေဖြစ်ပြီး သူတို့တွေဘာမှ မဖြစ်အောင် ကာကွယ်လိုကြတာ ဖြစ်ပါတယ်။ ငါလေးတွေက ဦးစီးထားကြလို့ပဲဖြစ်ပါတယ်။ ကပ်ပြီးပြောကြေးဆိုရင် အဲဒီသူတွေ သူများသားသမီး အတွက်ဆို ကိုယ့်ကိုယ်ကို အသေခံမလား၊ သူများက လေးစားကြည်ညိုရတဲ့ သူများဆရာသမားအတွက်ဆို ဒီလို လုပ်နိုင်မလားဆိုတော့ ငါ့သားသမီးမှ မဟုတ်တာ၊ ငါ့ဆရာမှ မဟုတ်တာ စတာတွေ ဖြစ်ပေါ်လာတော့တာ ဖြစ်ပါတယ်။ ဒါဟာ ငါဆိုတဲ့ အတ္တကိုချစ်နေတဲ့ လွဲနေတဲ့ အချစ်လွဲကြောင့်ပဲ ဖြစ်ပါတယ်။ ကိုယ့်ကိုယ်ကို တကယ်ချစ်ရင် ခုနပြောသလို အကျင့်သီလကို ကောင်းအောင်လုပ်ပြီး ကိလေသာ တဏှာကုန်ရာကိုပဲ ကြိုးစားကြမှာ ဖြစ်ပါတယ်။

Read more »

မေးလ်ထဲက အမေးများ (၄)

မင်္ဂလာပါ အရှင်ဘုရား
တပည့်တော်အနေနဲ့ အရှင်ဘုရားရဲ့ ရေးသားလမ်းညွှန်ချက်တွေကို ဖတ်ရှုမိပြီး နှစ်သက် သဘောကျမိပါတယ်ဘုရား။ အရှင်ဘုရား ရေးသားထားသမျှထဲမှာ မေးလ်ထဲက အမေးအဖြေများဆိုတာလည်း ပါဝင်တာတွေ့ရလို့ တပည့်တော်လဲ သိချင်တာကို မေးလိုက်ရပါတယ်ဘုရား။ နယ်ဝေးရောက်နေသူ တစ်ဦးဖြစ်နေတာမို့ ဖုန်းဆက်ပြီး ရိုသေစွာ လျှောက်ထားမေးမြန်းနိုင်ခြင်း မရှိတာကို ခွင့်လွှတ်နားလည်ပေးဖို့ လျှောက်ထားအပ်ပါတယ်ဘုရား။ တပည့်တော်မေးချင်တာက
"ဘုရားရှင်ရဲ့ ကြင်ယာဖော်ဟာ ဘုရားလောင်းရဲ့ ပါရမီဖြည့်ဆည်းနေဆဲ ဘ၀အဆက်ဆက်မှာရော ကြင်ယာဖော် တွေအဖြစ် ကူညီပံ့ပိုး ပေးခဲ့ကြပါသလား ဘုရား။ ဘ၀အဆက်ဆက် ကြင်ဖက်အဖြစ် ဆုပန်လို့ (သို့မဟုတ်) လိုက်နာကျင့်ကြံ အားထုတ်လို့ရော ဖြစ်နိုင်ပါသလား ဘုရား။ ဘယ်လိုနည်းလမ်းတွေနဲ့ သံသရာတစ်လျှောက် ဘ၀အဆက်ဆက် ကြင်ယာဖက်တွေ ဖြစ်နိုင်ကြပါသလဲ ဘုရား"

ရိုသေလေးစားစွာဖြင့် ရှိခိုးဦးခိုက်လျှက်
တပည့်တော်
ကိုသန့် (ခေတ္တ - မော်စကို)

ဖြေ။ မင်္ဂလာပါ။ ဒကာ ကိုသန့်။ အမေးရှိလာလို့ အဖြေညှိတဲ့ သဘောနဲ့ ဖြေကြည့်ပေးပါမယ်။ အခု ဘုန်းဘုန်းတို့ ဂေါတမ မြတ်စွာဘုရားရှင်ရဲ့ သာသနာတော်မှာ ဂေါတမဘုရားအလောင်း သိဒ္ဓတ္တမင်းသားရဲ့ ကြင်ယာတော် ယသောဓရာ အမျိုးကောင်းသမီးဟာ ဘုရားအလောင်း ပါရမီဖြည့်စဉ်ကာလ တစ်လျှောက်လုံးမှာ ကြင်ယာတော်အဖြစ် အတူဖြစ်ခဲ့တာ ဖြစ်ပါတယ်။ ကြင်ဖက်အဖြစ်လို့ ဆိုတာထက် ပါရမီဖြည့်ဖက်အဖြစ် အခုနောက်ဆုံး ဘဝအထိ အတူတူ ရှိခဲ့ကြတာလို့ ဆိုရင်ပိုမှန်ပါလိမ့်မယ်။ ဘုရားရှင်နဲ့ ယသောဓရာတို့ရဲ့ ပါရမီဖြည့်ဖက်အဖြစ် စတင်ခဲ့တဲ့ အချိန်ဟာ လွန်ခဲ့တဲ့ လေးအသင်္ချေနဲ့ ကမ္ဘာတစ်သိန်းလောက် ကတည်းက စခဲ့ကြတာ ဖြစ်ပါတယ်။ အဲဒီတုန်းက ဂေါတမဖြစ်စွာဘုရား ဖြစ်တော်မူလာမယ့် သုမေဓာ ရှင်ရသေ့ဟာ ဒီပင်္ကရာ မြတ်စွာဘုရား ကြွတော်မူလာမယ့် လမ်းခရီးမှာ ကိုယ်ကိုတံတားခင်းပြီး ဒီပင်္ကရာ ဘုရားရှင်နဲ့ နောက်ပါသံဃာတော်များ နင်းလျောက်သွားဖို့ အလှူလုပ်ရင်း ဒီပင်္ကရာ မြတ်စွာဘုရား အထံတော်မှောက်မှာ နိဗ္ဗာန်ကို မျက်မှောက်ပြုနိုင်ခဲ့ပေမယ့် သတ္တဝါ ဝေနေယျတွေကို ကယ်လိုတဲ့ စိတ်ဓာတ်နဲ့ ဘုရားဆုပန်ဖို့ ဆုံးဖြတ်ပြီး ပါရမီတော်တွေကို ဖြည့်ကျင့်ဖို့ အစပြုခဲ့တာ ဖြစ်ပါတယ်။

အဲဒီအချိန်မှာ ဒီပင်္ကရာ မြတ်စွာဘုရားကို ဖူးမြော်ကြည်ညို ကြိုဆိုဖို့ ရောက်လာကြတဲ့ ရမ္မာဝတီ မြို့သူမြို့သားတွေနဲ့ အတူ သုမိတ္တာလို့ခေါ်တဲ့ ပုဏ္ဏေးမ အမျိုးသမီးငယ် တစ်ယောက်လည်း ပါဝင်ခဲ့ပါတယ်။ အမျိုးသမီးငယ်ဟာ ဘုရားလောင်း သုမေဓာ ရှင်ရသေ့ရဲ့ ဘုရားဆုပန်တဲ့ အဖြစ်ကို ကြည့်ပြီး ထိုရှင်ရသေ့နဲ့အတူ ပါရမီဖြည့်ဖက်အဖြစ် နိဗ္ဗာန်ကို ကူးမြောက်နိုင်ဖို့ ဒီပင်္ကရာ ဘုရားရှင်ထံမှာ ဆုပန်ပြီး ဗျာဒိတ်ခံယူခဲ့ကြတာ ဖြစ်ပါတယ်။ အဲဒီတုန်းက ဒီပင်္ကရာ မြတ်စွာဘုရားရှင်က ဒီဘဒ္ဒကမ္ဘာမှာ သုမေဓာ ရှင်ရသေ့ဟာ ဂေါမမြတ်စွာအနေဖြင့် ဘုရားဖြစ်တော်မူမည့်အကြောင်း၊ သုမိတ္တာ အမျိုးကောင်းသမီးဟာ ယသောဓရာ အနေနဲ့ ပါရမီဖြည့်ဖက်အဖြစ် နိဗ္ဗာန်ကို ဝင်စံမည့်အကြောင်း ဗျာဒိတ်စကားကို မိန့်ကြားတော်မူခဲ့ပါတယ်။ ဆုကြီးပန်တဲ့ ပါရမီရှင်တွေ အနေနဲ့ ဘုရားတစ်ဆူဆူထံမှာ ဗျာဒိတ်စကား ခံယူပြီးပြီဆိုရင် အဲဒီဆုပန်မှုဟာ မပြောင်းလဲ မပျက်ဆီးတော့ပဲ ဘဝအဆက်ဆက် ဒါနစတဲ့ ပါရမီတော်တွေကို ဖြည့်ကျင့်ကာ နောက်ဆုံးပန်းတိုင်အထိ အရောက်လှမ်းနိုင်ခဲ့ကြတော့တာ ဖြစ်ပါတယ်။ ဒါကြောင့် ယခုဘုရားရှင်ရဲ့ သာသနာတော်မှာ မြတ်စွာဘုရားရှင်ရဲ့ ပါရမီဖြည့်ဖက် ယသောဓရာဟာ ဘုရားရှင်နဲ့အတူ ဘဝဆက်တိုင်း အတူတူ ပါရမီဖြည့်ဖက်အဖြစ် ရှိနေခဲ့တာလို့ ဆိုရတာဖြစ်ပါတယ်။

ဆိုတော့ကား လူတစ်ယောက်ဟာ တစ်ဘဝပြီး တစ်ဘဝအတူတကွ ရှိနိုင်ဖို့ဆိုတာ ဖြစ်နိုင်ပါ့မလားလို့ စဉ်းစားစရာ ရှိပါတယ်။ ဖြစ်နိုင်ပါတယ်။ ဒီအကြောင်းအရာနဲ့ ပတ်သက်ပြီး မြတ်စွာဘုရားရှင်က အင်္ဂုတ္တိုရ်ပါဠိတော်၊ ပုညာဘိသန္ဓ၀ဂ်၊ ပဌမ သမဇီဝိသုတ်မှာ “သတ္တဝါများ အနေနဲ့ ဒီဘဝမှစပြီး ဘဝသံသရာ ခရီးအတူနီးကာ လျှောက်လှမ်းလိုပါလျှင် တစ်ဦးနဲ့တစ်ဦး တူမျှတဲ့ သဒ္ဓါ၊ တူမျှတဲ့ သီလ၊ တူမျှတဲ့ ပေးကမ်းစွန့်ကြဲ လှူဒါန်းမှု စာဂ၊ တူမျှတဲ့ အသိဉာဏ်ပညာ ရှိကြရမည် ဖြစ်ကြောင်း၊ အဲဒီလို သဒ္ဓါ၊ သီလ၊ စာဂ၊ ပညာ တူညီကြပါက နောင်ဘဝသံသရာတွင် အတူဖြစ်နိုင်ကြောင်း” စသဖြင့် မိန့်တော်မူထားတာ တွေ့ရပါတယ်။

ဒီအဖွင့်တွေအရ ဘုရားရှင်ရဲ့ ပါရမီဖြည့်ဖက် ယသောဓရာ အနေဖြင့်လည်း ဘုရားရှင်နဲ့အတူ တူညီတဲ့စိတ်ထား၊ တူညီတဲ့ သဒ္ဓါတရားစတာတွေနဲ့ သဒ္ဓါသီလစာဂပညာ တရားများ လက်ကိုင်ထားကာ ဒါန၊သီလစတဲ့ ပါရမီတော်တွေကို ဖြည့်ကျင့်ခဲ့ကြတဲ့အတွက် ပါရမီဖြည့်ကျင့်ရာ ကာလတစ်လျှောက်လုံး အတူတူ ဖြစ်ခဲ့ကြတယ်ဆိုတာ သိမှတ်နိုင်မှာဖြစ်ပါတယ်။ ဒါကြောင့် အဲဒီလိုပဲ ဘဝအဆက်ဆက် ကြင်ဖက်အဖြစ် သံသရာအဆုံးတိုင် လျှောက်လှမ်းလိုသူများဟာလည်း တစ်ဦးနဲ့တစ်ဦး ဒီလိုတူမျှရမယ့် တရားများနဲ့ ညီမျှအောင် ကြိုးစားနိုင်လျှင် ဖြစ်နိုင်ပါတယ်ဆိုတာ အမေးကြည့်၍ အဖြေညှိပေးလိုက်ရပါတယ်။

Read more »

မေးလ်ထဲက အမေးများ (၃)

အရှင်ဘုရား,
တရားတော်နဲ့ ပတ်သက်ရင် မေးမြန်းကိုးကွယ်ရာအဖြစ် ဆည်းကပ်ပါ၏ အရှင်ဘုရား။
အခုတစ်ခေါက်လည်း တပည့်တော် မသိတာလေးတွေကို မေးလျှောက်ချင်လို့ပါ အရှင်ဘုရား။

(၁) သင်္ခါရ လောကမှာ ဘာတွေပါလဲ ဆိုတာကို သိချင်ပါတယ် အရှင်ဘုရား။
ဖြေ။ သင်္ခါရလောကဆိုတာ (၃၁)ဘုံနဲ့တကွ သက်ရှိသက်မဲ့ အားလုံးသော သတ္တလောက၊ သြကာသလောက တွေကို ဖြစ်မှုပျက်မှု၊ အိုနာသေမှု စသည် အမျိုးမျိုး အဖုံဖုံးတို့ဖြင့် စီမံဖန်တီး ပြောင်းလဲပြုပြင် ပေးတဲ့သဘောမျိုး၊ တစ်နည်းအားဖြင့် လောကီစိတ်၊ စေတသိက်၊ ရုပ်တရားများ၊ တစ်နည်းအားဖြင့် နာမ်ရုပ်အစုများကို သင်္ခါရလောကလို့ ခေါ်တာဖြစ်ပါတယ်။ အလွယ်ပြောရရင် ရုပ်တရား၊ နာမ်တရားအားလုံးဟာ သင်္ခါရလောကပဲ ဖြစ်ပါတယ်။

(၂) သြကာသ လောကကို “သက်မဲ့လောက” လို့ အတိုချုပ် ပြောရင် ရနိုင်မလားဘုရား။
ဖြေ။ သက်မဲ့လောကလို့ ပြောလိုကလည်း ပြောနိုင်ပါတယ်။ စာပေအဖွင့်တွေကတော့ သတ္တဝါဟူသမျှ၊ မှီတင်းနေထိုင်ရာ ဌာနဖြစ်တဲ့ (၃၁)ဘုံ (ရေ၊ မြေ၊ တော၊ တောင်၊ ကောင်းကင်စတာတွေ) ကို သြကာသလောကလို့ ဆိုလိုတာ ဖြစ်ပါတယ်။ စာပေအရ သက်ရှိသတ္တဝါအပေါင်းကို သတ္တလောကလို့ ခေါ်ပြီး အဲဒီသတ္တဝါတွေရဲ့ တည်နေရာဘုံဌာနကိုဖြစ်စေ၊ ဘုံမရှိတဲ့ နေရာဌာကို (တစ်ချို့သတ္တဝါတွေဟာ သီးသန့်ဘုံဌာနမရှိ) ဖြစ်စေ သြကာသလောကလို့ ခေါ်ဆိုတာ ဖြစ်ပါတယ်။ ဒါကြောင့် သက်မဲ့လောကလို့ ဆိုတာထက် သက်ရှိသတ္တဝါတွေ မှီတင်းနေထိုင်ကြတဲ့ တည်နေရာဘုံဌာနကို သြကာသလောကလို့ ဆိုတာက ပိုသင့်ပါတယ်။ (ခန္ဓဝဂ္ဂသံယုတ် ပါဠိတော်၊ ၁၁၃၊ အဋ္ဌကထာ၊ ၂၉၃)

(၃) မြတ်စွာဘုရားက ရှားတောရောက်တဲ့အခါ ရှားရွက်တစ်ရွက်ကိုကိုင်ပြီး အရှင်အာနန္ဒာကို မိန့်တော်မူတာလေးကိုလည်း သိချင်ပါတယ် အရှင်ဘုရား။ ဘယ်အကြောင်းအရာနဲ့ ဆက်စပ်ပြီး ဟောဖြစ်သွားတာလဲ ဆိုတာကိုလည်း သိချင်ပါတယ် အရှင်ဘုရား။ ဒီ(၃) မေးခွန်းမှာ အမှားတွေ( ရှားတော ဟုတ်မဟုတ်၊ အရှင်အာနန္ဒာကို ဟောတာဟုတ်မဟုတ်) ပါသွားရင်လည်း ခွင့်လွှတ်ပြီး ပြုပြင်ပေးပါဘုရား။ တပည့်တော် မှတ်မိသလောက်လေးကို မှန်းဆပြီး ရေးလိုက်ရလို့ပါ အရှင်ဘုရား။
ရိုသေလေးစားစွာဖြင့်
တပည့် ဆက်နောင်

ဖြေ။ လက်လှမ်းမီသလောက် ပိဋကတ်စာပေတွေအရ မြတ်စွာဘုရားရှင် ရှားတောကို ကြွတော်မူတဲ့အကြောင်းနဲ့ ပတ်သက်ပြီး ရှားတောမှာ တစ်ပါးတည်း ဓုတင်ဆောက်တည်နေတဲ့ အရညက ဓုတင်အရာမှာ ဧတဒဂ် ရတော်မူတဲ့ အရှင်ရေဝတမထေရ်ကို အကြောင်းပြုပြီး ကြွတော်မူကြောင်း သိရပါတယ်။ အဲဒီရှားတောကို ကြွတော်မူတဲ့အချိန်မှာ မြတ်စွာဘုရားရှင်နဲ့အတူ၊ အရှင်သာရိပုတ္တရာ၊ အရှင်အာနန္ဒာ၊ အရှင်သီဝလိ စတဲ့ မထေရ်မြတ်ကြီးအတော်များများနဲ့ နောက်ပါးရဟန်းတော်များလည်း အတူတကွ ကြွတော်မူပါတယ်။ ရှားတောကြွရာလမ်း တစ်နေရာရောက်တော့ ကောက်ကွေးနေတဲ့လမ်း တစ်သွယ်ရင်၊ ဖြောင့်ဖြူးပေမယ့် ဝေးပြီးအန္တရာယ်ရှိတဲ့အပြင် ဆွမ်းကွမ်းကိစ္စလည်း အခက်အခဲဖြစ်နိုင်တဲ့ လမ်းတစ်သွယ်ရယ်ဆိုပြီး လမ်းနှစ်သွယ်ကို တွေ့တော်မူကြပါတယ်။ အဲဒီအခါမှာ အရှင်အာနန္ဒာ မထေရ်က မြတ်စွာဘုရားကို “အရှင်ဘုရား လမ်းနှစ်သွယ်မှာ ဘယ်လမ်းကို ကြွတော်မူပါမလဲ ဘုရား”လို့ လျှောက်ထားတော့ မြတ်စွာဘုရားရှင်က “အာနန္ဒာ နောက်ပါသံဃာတော်တွေထဲမှာ အရှင်သီဝလိ မထေရ်ပါသလား”လို့ မေးတဲ့အခါ အရှင်အာနန္ဒမထေရ်က ပါတော်မူကြောင်း ပြန်လျှောက်ပါတယ်။ ဒီတော့ ဘုရားရှင်က “ရှင်သီဝလိမထေရ်ပါရင် လမ်းဖြောင့်ကိုပဲ ကြွကြစို့”လို့ မိန့်တော်မူကာ ကြွတော်မူကြောင်း ဖတ်မှတ်ရပါတယ်။ ဒီလို မိန့်တော်မူတာကလည်း ရှင်သီဝလိ မထေရ်ရဲ့ ဘုန်းကံကြီးမား၊ လာဘ်လာဘ ပေါများမှုကို သိတော်မူတဲ့ အတွက်ကြောင့် ဖြစ်ကြောင်း ဓမ္မပဒအဋ္ဌကထာမှာ ဖွင့်ပြပါတယ်။

ဘုန်းဘုန်းသိတဲ့ စာပေအဖွင့်တွေအရ အရှင်ရေဝတ မထေရ်ကို ချီးမြှောက်တော်မူလိုတဲ့အတွက် ရှားတောကို ကြွတော်မူရခြင်း အကြောင်းနဲ့ လမ်းခရီးမှာ အရှင်အာနန္ဒာနဲ့ ဘုရားရှင်တို့ရဲ့ အမေးအဖြေအကြောင်းကတော့ ဒီလောက်ပဲ သိမှတ်မိပါတယ်။ ဒကာတော် မေးတဲ့အကြောင်းအရာနဲ့ ပတ်သက်ပြီး ပိဋကတ်လမ်းညွှန်မှာ အထပ်ထပ် ရှာကြည့်ပေမယ့် မေးခွန်းကသုတ်တော် အတိအကျ မရှိတာရယ်၊ အကြောင်းအရာက ဟိုလိုလိုဒီလိုလို ရောနေတာရယ်ကြောင့် တိတိကျကျ မတွေ့မိဘူး ဖြစ်နေပါတယ်။ ဘုန်းဘုန်းရဲ့ စာပေ မနှံ့စပ်မှုကြောင့်လည်း ဖြစ်နိုင်ပါတယ်။ ဘုန်းဘုန်းအနေနဲ့ ဓမ္မပဒ၊ အရဟန္တဝဂ်၊ ရေဝတမထေရ် ဝတ္ထုပါ အဋ္ဌကထာ အဖွင့်ကို ဖတ်မှတ်မိပြီး ပြန်လည်ဖြေကြားလိုက်ပါတယ်။ အကြောင်းသင့်တဲ့အခါ စာပေရေးရာမှာ ပိုမိုနှံ့စပ်ပြည့်စုံတော်မူတဲ့ ဆရာတော် သံဃာတော်များ အထံတော်မှာ ထပ်မံပြီး မေးလျောက်ကြည့်ဖို့ ဆန္ဒပြု တိုက်တွန်းပါတယ်။

Read more »

မေးလ်ထဲက အမေးများ (၂)

တပည့်တော်၏ မေးခွန်းကိုဖြေကြားပေးသောကြောင့် ကျေးဇူးအထူးတင်ပါသည် ဘုရား။
အရှင်ဘုရား တပည့်တော်မ မေးခွန်းအနည်းငယ်ထပ်မံ၍ မေးလိုပါသည်ဘုရား။ ဖြေကြားပေးပါရန် လျှောက်ထားပါသည်။

၁။ တရားထိုင်ရာတွင် မည်သည့်အတွက်ကြောင့် ထိုင်ခုံတွင်ထိုင်၍ မရပါသနည်း။ ထိုင်ခုံတွင်ထိုင်ခြင်းဖြင့် ကြာကြာထိုင်နိုင်သည် မဟုတ်ပါလားဘုရား။

ဖြေ။ တရားထိုင်တဲ့အခါ ထိုင်ခုံတွင်ထိုင်ပြီး တရားမမှတ်ရဘူးဆိုတာ မရှိပါဘူး။ မှတ်လို့ရပါတယ်။ ခန္ဓာကိုယ်ရဲ့ လျောင်းထိုင်ရပ်သွား ဣရိယာပုတ်လေးပါးလုံးမှာ သင့်လျော်သလို မှတ်နိုင်ပါတယ်။ ဘုရားရှင်က မဟာသတိပဋ္ဌာနသုတ်မှာ တိတ်ဆိတ်ရာအရပ်မှာ တင်ပလ္လင်ခွေထိုင်ပြီး ခါးကိုဖြောင့်မတ်စွာထားက မှတ်ရမယ်လို့ တိုက်ရိုက်ဆိုထားပေမယ့် နောက်ပိုင်း ကာယာနုပဿနာ သတိပဋ္ဌာန် အဖွင့်တွေမှာ ခန္ဓာကိုယ်ရဲ့ ဘယ်လို အနေအထားမျိုးမှာ မဆို အရှိအတိုင်း သတိကပ်ကာ ရှုမှတ်ရမယ်လို့ ဟောတော်မူထားပါတယ်။ ဒါကြောင့် အခြေအနေအရ ထိုင်ခုံပေါ်မှာ ထိုင်ပြီးမှတ်လို့ အဆင်ပြေရင် အဆင်ပြေတဲ့အတိုင်း မှတ်နိုင်ပါတယ်။ ဒီအတွက် ပညတ်သတ်မှတ်ချက် မရှိပါဘူး။ ဒါပေမယ့် တစ်ချို့ရိပ်သာတွေမှာတော့ အဲဒီလို ထိုင်ခုံပေါ်မှာ သက်သောင့်သက်သာ ထိုင်မှတ်တဲ့အခါ ထိနမိဒ္ဓ (တွေဝေငိုက်မျည်း)တာတွေ အလွယ်တကူ ဖြစ်တတ်တဲ့ အတွက်ရယ်၊ တစ်ခြားတခြား အသက်သိက္ခာဂုဏ်ဝါ ကြီးသူတွေရဲ့ အထက်မှာဖြစ်နေကာ ဂရုဂါရဝ မဖြစ်တာတွေရယ် စတာတွေကြောင့် ထိုင်ခုံမှာထိုင်ပြီး တရားမမှတ်ကြဖို့ ပြောကောင်းပြောနိုင်တာ ဖြစ်ပါတယ်။ ဘုရားဟောလို့၊ ဒါမှမဟုတ် ထိုင်ခုံမှာ ထိုင်မှတ်လို့ တရားမရနိုင်တဲ့ အတွက်ကြောင့်တော့ မဟုတ်ပါဘူး။ သေချာတာကတော့ ဘယ်လိုပဲဖြစ်ဖြစ် ခန္ဓာကိုယ်ရဲ့ ဘယ်လိုအနေအထားမျိုးမှာမဆို တရားမှတ်နိုင်တယ်ဆိုတာ အသေအချာပဲ ဖြစ်ပါတယ်။

၂။ တပည့်တော်မ လူတယောက်ကို ဆေးဖိုးအမြောက်အများ လှူခဲ့ပါသည်။ ထိုလူမှာ ရောဂါမသက်သာပါ။ တပည့်တော်မက ငါ့ပိုက်ဆံတွေ အလကားဖြစ်သွားတယ်လို့ ထင်ခဲ့ပါသည်။ ထို့နောက် ထိုလူရောဂါ သက်သာသွားပါသည်။ တပည့်တော်မ ကုန်ရကျိုးနပ်ပါလားဆိုပြီး ၀မ်းသာသွားပြန်ပါသည်။ ပထမ နှမြောသွားခဲ့သည်။ ထိုအတွက်ကြောင့် တပည့်တော်ကုသိုလ် မရတော့ဘူးလားဘုရား။

ဖြေ။ ပုထုဇဉ်တွေရဲ့ စိတ်အစဉ်ဟာ အမြဲတမ်း ပြောင်းလဲနေပြီး သဒ္ဓါတရားဟာလည်း မတည်မမြဲ ဖြစ်တတ်တာ သဘာဝပဲ ဖြစ်ပါတယ်။ ဒါပေမယ့် ဒကာမအခုဖြစ်တဲ့ စိတ်အစဉ်ဟာ လှူပြီးနောက်မှာ ဖြစ်တဲ့ နောက်ပိုင်းစေတနာ ကွက်သွားမှုသာ ဖြစ်ပြီး မလှူခင်မှာဖြစ်တဲ့ ပုဗ္ဗစေတနာရယ်၊ လှူစဲအခိုက်မှာ ဖြစ်တဲ့ မုဉ္စစေတနာရယ်က အလွန်အားကောင်းပြီး ဖြစ်တဲ့အပြင် လှူပြီးနောက်မှာ အကျိုးရလာဘ်ကို မြင်ရပြီး တစ်ခါပြန်ကာ အရပစေတနာ အားကောင်းလာတာ ဖြစ်တဲ့အတွက် နောက်ပိုင်းမှာဖြစ်ခဲ့တဲ့ စိတ်ကွက်မှုဟာ မပြောပလောက်ဖူးလို့ ဆိုရမှာဖြစ်ပါတယ်။ ကုသိုလ်ကတော့ လှူပြီးကတည်းက ဖြစ်ခဲ့တဲ့ စေတနာမှာကိုက ရရှိခဲ့ပြီး ဖြစ်ပါတယ်။ နောက်ပိုင်းစေတနာ အနည်းငယ် ပျက်ကွက်ခဲ့တဲ့အတွက် အလှူအကျိုးပေး အနည်းငယ် အားနည်းနိုင်ပေမယ့် ရှေ့မှာဖြစ်ခဲ့ လှူခဲ့တဲ့ စေတနာတွေ အားကြီးခဲ့တာတွေရယ်၊ လှူလိုက်ပြီးနောက် အကျိုးရလာဘ်ကောင်းတာကို တွေ့ရတဲ့အတွက် တစ်ခါပြန်ပြီး နောက်ပိုင်းစေတနာ အားကောင်းခဲ့တာတွေရယ်ကြောင့် အားနည်းခဲ့တဲ့ စိတ်ကွက်မှုဟာ မပြောပလောက်ဘဲ ကောင်းတဲ့စေတနာတွေက အားကြီးတဲ့အတွက် ကုသိုလ်တရားကတော့ ရရှိပြီးဖြစ်တယ်လို့ ဆိုရမှာဖြစ်ပါတယ်။ အလှူလှူတဲ့အခါမှာ စေတနာသုံးတန် ပြတ်သားဖို့ အရေးကြီးတယ်လို့ ဆိုပေမယ့် ရှေ့ပိုင်းမှာ ဖြစ်တဲ့စေတနာတွေက ကုသိုလ်ကောင်းမှု လုပ်ဖို့အတွက် အဓိကကျတဲ့ အထောက်အပံ့တွေ ဖြစ်တဲ့အတွက် ဒီရှေ့ပိုင်းစေတနာတွေကို အဓိက အားကောင်းအောင် ကြိုးစားပြီး နောက်ပိုင်းစေတနာကိုလည်း မကွက်အောင် နောက်နောင် သတိထားပြီး ထိန်းသိမ်းစောင့်ရှောက်ကြဖို့ လိုပါတယ်။ နောက်ပိုင်းစေတနာကလည်း သတိရတိုင်း သတိရတိုင်း ကုသိုလ်တရားကို ပိုမိုတိုးပွားစေတဲ့အတွက် ဒီစေတနာ မပျက်အောင် လှူကတည်းက စိတ်ပြတ်အောင် ကြိုးစားကြဖို့ အထူးလိုအပ်လှပါတယ်။

thin thin

Read more »

မေးလ်ထဲက အမေးများ (၁)...

အရှင်ဘုရား … တပည့်တော်ကို မေးခွန်းလေး နည်းနည်းလောက် မေးလျှောက်ခွင့်ပြုပါ အရှင်ဘုရား။
(၁) လောကကြီးက သတ္တဝါတွေရဲ့ ဘဝဖြစ်စဉ်တွေကို သတ်မှတ်ပြီးသားပဲ။ ဘယ်ဘဝရောက်ရင် ဘာဖြစ်မယ်၊ ဘယ်ဘဝရောက်ရင် ဘယ်လိုဖြစ်မယ် စသည်ဖြင့် လောကကြီးက သတ်မှတ်ထားပြီးသားဆိုတဲ့ မိစ္ဆာဒိဋ္ဌိ အမြင်တစ်မျိုးကို တပည့်တော် ဖတ်ဖူးပါတယ်။ အကယ်၍ ခေတ်လူငယ် တစ်ယောက်ယောက်က, (ဒီလိုသတ်မှတ်ထားလို့ပဲ မြတ်စွာဘုရားအပါအဝင် တန်ခိုးအဘိညာဏ်ရတဲ့ သံဃာတော် ပုဂ္ဂိုလ်မြတ်များက ဘယ်ဘဝရောက်ရင် ဘာဖြစ်မယ်၊ ဘယ်နှစ်ဘဝရောက်ရင် ဘယ်လိုဖြစ်မယ် စသည်ဖြင့် ဟောနိုင်တာ မဟုတ်ဘူးလား) လို့ မေးလာရင် တပည့်တော် ကောင်းကောင်း မဖြေရှင်းတတ်ဘူး ဘုရား။ ကိုယ်တိုင်တော့ ရှင်းပါတယ်။ သူများကို ရှင်းပြဖို့တော့ ဘယ်လိုရှင်းပြရမှန်း သိပ်မသိလို့ပါ အရှင်ဘုရား။

ဖြေ။ ဒီမေးခွန်းနဲ့ ပတ်သက်ပြီး လောကဆိုတဲ့ စကားကို တိတိကျကျ သိရဖို့လိုပါတယ်။ လောကကြီးက သတ်မှတ်တယ်ဆိုတာမှာ လောကဆိုတာ ဘာကိုပြောတာလဲ၊ အခုလူတွေ နေထိုင်ကြတဲ့ ကမ္ဘာလောကကြီးကို ပြောတာလား၊ သက်ရှိသတ္တဝါတွေကို ပြောတာလား၊ ပြုပြင်ထားတဲ့ အရာတွေကို ပြောတာလား၊ ဒါမှမဟုတ် တန်ခိုးရှင် တစ်ဦးဦးကို ပြောတာလား၊ ဒါမှမဟုတ် တစ်ခါတလေ ဗုဒ္ဓဘာသာကပြောတဲ့ ခန္ဓာငါးပါးနဲ့ ဖွဲ့စည်းထားတဲ့ နာမ်ရုပ်အစုဖြစ်တဲ့ လောကကြီးကို ပြောတာလား စသဖြင့် သိရှိထားဖို့ လိုပါတယ်။ လောကဆိုတာ ဘယ်လိုအရာမျိုးပဲ ဖြစ်ဖြစ် သတ္တဝါ တစ်ဦးတစ်ယောက်ရဲ့ ဘဝဖြစ်စဉ်ကိုတော့ အဲဒီသတ္တဝါ ကိုယ်တိုင်ကလွဲလို့ ဘယ်လိုလောကကြီးကမှ သတ်မှတ်ပေးနိုင်မှာ မဟုတ်ပါဘူး။

တကယ်လို့များ ဒီနေရာမှာ လောကဆိုတာ ဗုဒ္ဓဘာသာက ဖွင့်ဆိုပြတဲ့ ခန္ဓာအစုဆိုတဲ့ လောကကြီးကို ပြောတာဆိုရင် သတ္တဝါတစ်ဦးဦးရဲ့ ဘဝဖြစ်စဉ်ကို လောကကြီးက သတ်မှတ်ပေးတာ မဟုတ်ဘဲ လောကကို သတ္တဝါတွေရဲ့ အလုပ်တွေက သတ်မှတ်ပေးတာလို့ပဲ ပြောရမှာ ဖြစ်ပါတယ်။ သတ္တဝါတွေရဲ့ ဘဝသံသရာ တစ်လျှောက်ကို ကြည့်ရင် မသိမှုအဝိဇ္ဇာ၊ တပ်မက်တွယ်တာမှု သမုဒယတဏှာတွေကြောင့် သံသရာရှည်တဲ့ အလုပ်တွေကို လုပ်နေမိကြပြီး အဲဒီအလုပ်တွေကြောင့်ပဲ အလုပ်တွေရဲ့ အကျိုးရလာဘ် အနေနဲ့ ဘဝအမျိုးမျိုးနဲ့ သံသရာမှာ ကျင်လည်ကြရခြင်း ဖြစ်ပါတယ်။ ဒီအလုပ်တွေရဲ့ တန်ပြန်သက်ရောက်မှု အနေနဲ့ ဘဝတစ်မျိုးမျိုးမှာ အကန့်အသတ် တစ်မျိုးမျိုးနဲ့ တစ်ဘဝပြီးတစ်ဘဝ ဆက်ကာဆက်ကာ ဖြစ်နေကြရခြင်းပဲ ဖြစ်ပါတယ်။ ဘယ်ဘဝရောက်ရင် ဘယ်လိုဖြစ်မယ်၊ ဘာဖြစ်မယ် စတာတွေဟာလည်း တခြားသူ သတ်မှတ်ပေးတာ မဟုတ်ဘဲ ကိုယ်ကိုယ်တိုင် လုပ်နေတဲ့ အလုပ်တွေက အကျိုးသက်ရောက်မှု ဖြစ်ပေးခြင်း ဖြစ်ပါတယ်။ သတ္တဝါ တစ်ဦးဦးရဲ့ ဘဝဖန်တီး သတ်မှတ်ချက်ဟာ အဲဒီသတ္တဝါတွေရဲ့ လုပ်ရပ်တွေ့ကြောင့်ပဲ ဖြစ်ပေါ်လာခြင်း ဖြစ်ပါတယ်။

ဒီလိုပါပဲ ဘုရားရဟန္တာ စတဲ့ တန်းခိုးရှင်များရဲ့ ဘဝဖြစ်စဉ်ဟာလည်း ထိုအရှင်မြတ်များရဲ့ အလုပ်တွေကြောင့်ပဲ ဖြစ်ပေါ်လာခြင်း ဖြစ်ပါတယ်။ ဘုရားရဟန္တာစတဲ့ သူတော်သူမြတ်များဟာ သတ်မှတ်ချက်တွေကို ကန့်သတ်ပြီး မသိတာကို သိအောင်လုပ်ခဲ့၊ တပ်မက်တွယ်တာတာတွေကို ပြတ်အောင်လုပ်ခဲ့တဲ့အတွက် အဲဒီအလုပ်တွေရဲ့ အကျိုးဆက်အနေနဲ့ မိမိတို့ရဲ့ ဘဝဖြစ်စဉ်ကို သတ်မှတ်လာနိုင်ခဲ့ခြင်း ဖြစ်ပါတယ်။ သူတော်သူမြတ်တွေဟာ ကောင်းတဲ့ ဒါန၊ သီလစတဲ့ ပါရမီတော်တွေကို လုပ်ခဲ့၊ သမထ၊ ဝိပဿနာစတဲ့ ကျင့်စဉ်တွေကို ကျင့်ကြံခဲ့ကြတဲ့အတွက် အဲဒီအလုပ်တွေရဲ့ အကျိုးဆက်အနေဖြင့် ဉာဏ်အဆင့်ဆင့် တိုးတက်ကာ အရာအားလုံးကို သိနိုင်တဲ့ဉာဏ်၊ ဘဝဖြစ်စဉ်ကို သိနိုင်တဲ့ဉာဏ်၊ အတိတ်အနာဂတ်စတဲ့ ကာလတွေကို သိနိုင်တဲ့ဉာဏ်တွေကို ရရှိတော်မူခဲ့ကြခြင်း ဖြစ်ပါတယ်။ ဒီဉာဏ်တော်တွေဟာလည်း ဘယ်လောကကြီးကမှ သတ်မှတ်ပေးတာ မဟုတ်ဘဲ သူတော်သူမြတ်တို့ ကိုယ်တော်တိုင် ကျင့်ကြံကြိုးကုတ် အားထုတ်ခဲ့ကြတဲ့ အလုပ်တွေကြောင့်ပဲ ဖြစ်ပါတယ်။

ဆိုလိုတာက သတ္တဝါ တစ်ဦးဦးရဲ့ ဘဝကို ဘယ်လိုလောကကြီးကမှ သတ်မှတ်ပေးတာမဟုတ်ဘဲ တစ်ဦးချင်းရဲ့ ခန္ဓာငါးပါးနဲ့ ဖွဲ့စည်းထားတဲ့ လောကဆိုရင်တော့ ဒီလောကကို သတ္တဝါတစ်ဦးဦးရဲ့ အလုပ်တွေကပဲ သတ်မှတ်ပေးတာ ဖြစ်ကြောင်း ဆိုလိုတာ ဖြစ်ပါတယ်။ အဝိဇ္ဇာ၊ တဏှာတွေအရင်းခံတဲ့ လုပ်ဆောင်ချက်တွေကြောင့် သတ္တဝါတွေရဲ့ ဘဝဟာတွေဟာ အမျိုးမျိုးဖြစ်နေကြပြီး အဲဒီအဝိဇ္ဇာ၊ တဏှာစတာတွေကို ပယ်ခွါနိုင်ကြတဲ့ အလုပ်တွေကြောင့်လည်း သတ္တဝါတွေရဲ့ ဘဝဟာ အကန့်အသတ်တွေနဲ့ အဆုံးသတ်ကုန်ကြတာ ဖြစ်ကြောင်း ဆိုလိုတာ ဖြစ်ပါတယ်။ အရင်းစစ်တော့ သတ္တဝါတွေရဲ့ ဘဝဖြစ်စဉ်ကို ထိုသတ္တဝါတွေရဲ့ အလုပ်တွေကပဲ သတ်မှတ်ပေးတာဖြစ်ကြောင်း ကောက်ချက်ချနိုင်မှာ ဖြစ်ပါတယ်။ ဒီလောက်ဆိုရင်တော့ ဒီမေးခွန်းနဲ့ ပတ်သက်ပြီး အထိုက်အလျောက် နားလည်နိုင်မယ်လို့ ထင်ပါတယ်။

(၂) မြင့်မိုရ်တောင်နဲ့ သူ့ကို ဝန်းရံထားတဲ့ ကျွန်းကြီးလေးကျွန်း စတဲ့အကြောင်းအရာတွေဟာ ပိဋကတ် သုံးပုံထဲမှာ ပါမပါလေးလည်း သိချင်ပါတယ် အရှင်ဘုရား။
ဖြေ။ မြင့်မိုရ်တောင်နဲ့ ပတ်သက်ပြီး ဟောကြားထားတဲ့ ပါဠိတော်မူရင်းတွေကို ပိဋကတ်တော်မှာ သိပ်မတွေ့ရပါဘူး။ ထူးထူးခြားခြား ထင်ထင်ရှားရှား အနေနဲ့ကတော့ အပါဒါနပါဠိတော် သာရိပုတ္တထေရအပါဒါန်မှာ မြတ်စွာဘုရားရှင်ရဲ့ သဗ္ဗညုတဉာဏ်တော်ကို မြင့်မိုရ်တောင်နဲ့ ဥပမာပေးပြီး ဖော်ပြထားတဲ့ စကားရပ်ကို တွေ့ရပါတယ်။ အဲဒီစကားရပ်ကို အနည်းငယ် ထုတ်ပြရရင် “မြင့်မိုရ်တောင်မင်းကို ယူဇနာရှစ်သောင်း လေးထောင်တိုင်တိုင် သမုဒ္ဒရာ၌ သက်ဝင်၍ ထိုမျှလောက် ရေပေါ်၌ပေါ်နေ၏ဟု ဆိုအပ်၏၊ အမြင့်အားဖြင့်လည်းကောင်း၊ အလျားအားဖြင့်လည်းကောင်း၊ အနံအားဖြင့်လည်းကောင်း၊ ထိုမျှလောက် ရှစ်သောင်းလေးထောင် နှင်နှင်ရှိသော စကြာဝဠာ ကုဋေတစ်သိန်း၌ရှိသော မြင့်မိုရ်တောင်အားလုံးကို သိမ်မွေ့သေးဖွဲ ထုခွဲသဖြင့် အမှုန့်ပြုလျက် အမှတ်၌ ထားအပ်သည်ရှိသော် မြူ၏ကုန်ခြင်းသို့ ရောက်ရာ၏၊ အရှင်ဘုရား၏ သဗ္ဗညုတဉာဏ်တော်ကို နှိုင်းယှဉ်ခြင်းငှါ မတတ်ကောင်းသည်သာတည်း။” လို့ ဆိုတဲ့ ဒီစကားရပ်ကို တွေ့ရပါတယ်။

အဋ္ဌကထာတွေမှာတော့ မြင့်မိုရ်တောင်နဲ့ ပတ်သက်တဲ့ ဖွင့်ဆိုချက်တွေ အများကြီးရှိပါတယ်။ တိတိကျကျပြောရရင် သုတ္တနိပါတ် အဋ္ဌကထာ၊ ဒုအုပ်၊ နှာ ၁၆၄၊ ဝိသုဒ္ဓိမဂ် အဋ္ဌကထာ၊ ပအုပ်၊ နှာ ၂၀၀၊ အပါဒါန အဋ္ဌကထာ၊ ပအုပ်၊ နှာ ၂၅၁၊ အဘိဓမ္မအဋ္ဌကထာ၊ ပအုပ်၊ နှာ ၃၃၆၊ တအုပ်၊ နှာ ၃၂၀၊ စူဠနိဒ္ဒေသ အဋ္ဌကထာ၊ ၃၈၊ ဝိနည်းအဋ္ဌကထာ၊ ပအုပ်၊ နှာ၉၁ စသဖြင့် အဋ္ဌကထာ အတော်များများမှာ ဖွင့်ဆိုရှင်းပြထားတာကို တွေ့ရပါတယ်။

မြင့်မိုရ်တောင်နဲ့ ပတ်သက်ပြီး ဒီနေ့ခေတ်မှာ အမျိုးမျိုးပြောနေကြပေမယ့် တကယ်တော့ ဒါဟာ လွတ်မြောက်မှုနဲ့ ယှဉ်ရင်ဘာမှ အရေးကြီးတဲ့ အချက်တော့ မဟုတ်လောက်ပါဘူး။ သိပ္ပံနည်းနဲ့ မကိုက်ညီလို့ လက်မခံနိုင်ဘူးဆိုရင်လည်း လက်မခံနိုင်သူတွေရဲ့ သဘောပါပဲ။ သေချာတာကတော့ သဗ္ဗညုတဉာဏ်တော်နဲ့ ဟောတော်မူထားတဲ့ ဘုရားရှင်ရဲ့ တရားတော်တွေ၊ ဟောကြားချက်တွေကို သိပ္ပံပညာနဲ့ အပြည့်အဝ စမ်းသပ်လို့ မရနိုင်ဘူးဆိုတဲ့ အချက်ကတော့ အသေအချာပဲ ဖြစ်ပါတယ်။

(၃) မြတ်စွာဘုရားရဲ့ ဂုဏ်တော်ကိုးပါးထဲမှာပါတဲ့ ဝိဇ္ဇာစရဏဂုဏ်တော်ထဲက ဝိဇ္ဇာဂုဏ်ရယ်၊ လောကဝိဒူ ဂုဏ်တော်ရယ် ဒီဂုဏ်တော် နှစ်ပါးကို သဗ္ဗညုတဉာဏ်တော်ကြီးရဲ့ အစိတ်အပိုင်းတွေအဖြစ် သဗ္ဗညုတ ဉာဏ်တော်ရဲ့အောက်မှာ ထည့်သွင်းကြည်ညိုလို့ ဖြစ်မဖြစ် သိချင်ပါတယ်ဘုရား။ ဒီဂုဏ်တော် နှစ်ပါးကို သဗ္ဗညုတဉာဏ်တော်ကြီးရဲ့ အစိတ်အပိုင်းတွေအဖြစ် သတ်မှတ်လို့ ရမရလဲ သိချင်ပါတယ်ဘုရား။

ဖြေ။ ဂုဏ်တော်ဆိုတာ ဘုရားရှင်ရဲ့ ထူးခြားမှုကို ထင်ရှားပြလိုတဲ့ သဘောပဲ ဖြစ်ပါတယ်။ ဉာဏ်တော်ဆိုတာက ဘုရားရှင် ရရှိပိုင်ဆိုင်ထားတဲ့ အရာတော်ဖြစ်ပါတယ်။ ဂုဏ်တော်ပဲပြောပြော ဉာဏ်တော်ပဲဆိုဆို ဒါဟာ ဘုရားမှတပါး ကျန်တဲ့ဘယ်လိုပုဂ္ဂိုလ်တွေမှ မရှိနိုင်တဲ့ အရာတွေဖြစ်ပါတယ်။ မေးလာလို့ ပြောရမယ်ဆိုရင် သဗ္ဗညုတဉာဏ်တော်ဟာ အရာအားလုံးကို အကုန်အစင်သိရှိနိုင်တဲ့ ဉာဏ်တော်ဖြစ်တဲ့အတွက် ဝိဇ္ဇာနဲ့လည်းပြည့်စုံ၊ လောကဝိဒူနဲ့လည်း ပြည့်စုံပြီးသား ဖြစ်နေပါတယ်။ ဘုရားရှင်ရဲ့ ထူးခြားမှုတွေကို ဂုဏ်တော်အနေနဲ့ ထုတ်ပြတဲ့အပိုင်းမှာပဲ ဒီလိုသီးသန့်အမည် ပေးကာပူဇော်ကြခြင်း ဖြစ်တဲ့အတွက် ကွဲပြားသလို ရှိပေမယ့် အမှန်တော့ မကွဲမပြား တစ်သားတည်းပဲ ဖြစ်ပါတယ်။ အစိပ်အပိုင်းလို့ ပြောရင်သီးသန့်လို ဖြစ်နေပြီး၊ ဒီဂုဏ်တော်တွေဟာ သဗ္ဗညုတဉာဏ်တော်လောက် အစွမ်းမကြီးဘူးလို့ ထင်ကောင်းထင်နိုင်ပါတယ်။

တကယ်တော့ သဗ္ဗညုတဉာဏ်တော်ကို ရရှိတော်မူပြီးတဲ့ ဘုရားရှင်တွေမှာ ဝိဇ္ဇာစရဏဂုဏ်တော်၊ လောကဝိဒူဂုဏ်တော်အပါအဝင် အရဟံ စတဲ့ဂုဏ်တော်တွေနဲ့ အလိုလို ပြည့်စုံပြီးသား ဖြစ်နေတော့တာ ဖြစ်ပါတယ်။ သဗ္ဗညုတဉာဏ်တော်ဟာ အလွန်ကျယ်ဝန်းလှတဲ့အတွက် နှိုင်းဆလို့ မရနိုင်ပါဘူး။ အကောင်းဆုံးနဲ့ အသေအချာဆုံးကတော့ ဘုရားရှင်ဟာ သဗ္ဗညုတဉာဏ်တော်ကြီးနဲ့ အရဟံ အစရှိတဲ့ ဂုဏ်တော်တွေနဲ့ ပြည့်စုံတော်မူတဲ့ အနှိုင်းမဲ့ အရှင်ဖြစ်တယ် ဆိုတဲ့အချက်ပဲ ဖြစ်ပါတယ်။ မကြံစည်ကောင်း မကြံစည်အပ်တဲ့အရာတွေထဲမှာ ဘုရားရှင်တို့ရဲ့ ဉာဏ်တော်တန်ခိုးတော် အရာတွေကိုလည်း မကြံစည်အပ်ကြောင်း ဆိုတဲ့အတွက် သာမန်လူသားတွေအနေနဲ့ ဂုဏ်တော်အဖွင့်တွေကိုသာ အာရုံပြုပူဇော်တာပဲကောင်းပြီး မကြံစည်နိုင်တဲ့ အရာတွေအပေါ်မှာ မကြံစည်တာပဲ ကောင်းပါတယ်။ ဘုရားရှင်ရဲ့ ဉာဏ်တော်၊ ဂုဏ်တော်တွေ အကြောင်းကို ဒီလောက်လေးလောက်ပဲ သိထားပြီး အာရုံပြုကာ ပွားများနိုင်မယ်ဆိုရင်ကိုပဲ ကုသိုလ်တရားတွေ တိုးပွားနေမှာ အမှန်ပဲ ဖြစ်ပါတယ်။ ဒီမေးခွန်းအတွက် ဒီလောက်ပဲ ဖြေပေးလိုပါတယ်။

(၄) သာသနာတော်ကို လူအများ သက်ဝင်ယုံကြည်လာအောင် နတ်တွေ၊ ဗြဟ္မာတွေက ဘာလို့ ကိုယ်ထင် ရှားပြပြီး မဆုံးမကြတာလဲ အရှင်ဘုရား။ ဒီလောကကြီးမှာ နတ်တွေ၊ ဗြဟ္မာတွေ အမှန်တကယ်ရှိ ကြောင်းလူတွေသိပြီး သတိ သံဝေဂရအောင် ဘာဖြစ်လို့ ကိုယ်ထင်ရှား မပြကြတာလဲ သိချင်ပါတယ် အရှင်ဘုရား။
အမှားပါရင် ခွင့်လွှတ်ပေးပါ အရှင်ဘုရား။

ဖြေ။ နတ်ဗြဟ္မာတွေဆိုတာ အမှန်တကယ်ရှိပါတယ်။ ကိုယ်ထင်ရှားပြတာတွေလည်း ရှိနိုင်ပါတယ်။ ကိုယ်က မြင်နိုင်တဲ့ အစွမ်းမရှိလို့ ဖြစ်မှာပါ။ များသောအားဖြင့် နတ်ဗြဟ္မာတွေ စောင့်ရှောက်လေ့ရှိတာက ကုသိုလ်ကောင်းမှု အားကောင်းတဲ့သူတွေ၊ ကုသိုလ်အားကြီးတဲ့ သူတွေကို ပိုပြီးစောင့်ရှောက်လေ့ရှိပါတယ်။ ဒီအချက်ကတော့ ကောင်းမှုအားကြီးပြီး မမြင်နိုင်တဲ့ နတ်တွေရဲ့ ကူညီစောင့်ရှောက်မှုကို ခံယူဖူးတဲ့သူတွေက ပိုသိကြပါတယ်။ အကုသိုလ်သမားတွေ အတွက်တော့ သူတို့အာရုံထဲမှာ ရှိဟန်မတူပါဘူး။ ပြီးတော့ နတ်ဗြဟ္မာတွေဟာ လူသားတွေကို ဆုံးမတဲ့ ပုဂ္ဂိုလ်တွေမဟုတ်ပါဘူး။ ကောင်းမှုကုသိုလ် ရှိရင်သာ ကူညီစောင့်ရှောက်ကြတဲ့ ပုဂ္ဂိုလ်တွေ ဖြစ်ပါတယ်။ လူသားတွေဟာ ကိုယ့်ကိုယ်ကိုပဲ ကိုယ်ဆုံးမရမှာ ဖြစ်ပါတယ်။ နောက် သာသနာဆိုတာလည်း နတ်ဗြဟ္မာတွေ ထိန်းသိမ်းစောင့်ရှောက်တာထက် သာသနာ့ဝန်ထမ်းတွေနဲ့ လူပုဂ္ဂိုလ်တွေကပဲ ထိန်းသိမ်းစောင့်ရှောက်ရတာ ဖြစ်ပါတယ်။ ဆုတ်ကပ်ကာလ ရောက်လာတဲ့ ဒီနေ့ခေတ်မှာ သတ္တဝါတွေရဲ့ ကုသိုလ်တရားတွေကလည်း တဖြည်းဖြည်း ဆုတ်ယုတ်လာနေတဲ့ အတွက် နတ်ဗြဟ္မာတွေရဲ့ စောင့်ရှောက်မှုတွေကလည်း တဖြည်းဖြည်း နည်းလာကြခြင်း ဖြစ်နိုင်ပါတယ်။ သာသနာတော်နဲ့ ပတ်သက်ပြီး အရမ်းကို ဆိုးဆိုးဝါးဝါး ဖြစ်လာတဲ့အခါဆိုရင်တော့ နတ်ဗြဟ္မာတွေက လာရောက်ပြီး ကူညီကောင်း ကူညီကြပါလိမ့်။

(ယောဆရာတော်ဘုရားကြီးက ဆရာတော်အရှင်ဆန္ဒာဓိကကို မိန့်တော်မူတာလေး တစ်ခုကိုလည်း တပည့်တော်ကို ရေးလျှောက်ခွင့် ပြုပါအရှင်ဘုရား။ “ဦးဇင်းလေး ဆွဲအားတွေကို သတိထားပါ၊ အတွင်းဆွဲအား အပြင်ဆွဲအားတွေနောက် ပါမသွားအောင် ဂရုစိုက်ပါ”ဆိုတဲ့ မိန့်ကြားချက်လေးပါဘုရား။ အရှင်ဘုရားရဲ့ ဘေးမှာလည်း ဆွဲအားတွေ အရမ်းများနေလောက်တယ်လို့ တပည့်တော် ထင်မိလို့ပါ အရှင်ဘုရား။)

ဖြေ။ ဆွဲအားတွေကတော့ တကယ်များပါတယ်။ များပေမယ့် ဆွဲအားနောက်ကို စွဲအားရောက်ပြီး လွဲမှား မသွားအောင်တော့ သတိတရားနဲ့ အမြဲထိန်းသိမ်းပြီးပဲ နေနေရတော့တာ ဖြစ်ပါတယ်။ အာရုံတွေနောက်ကို စိတ်မလိုက်ဖြစ်အောင်ပဲ ကြိုးစားနေရတော့တာ ဖြစ်ပါတယ်။ ပရဟိတစိတ်ထားလေးတွေ၊ မေတ္တာ၊ ကရုဏာတရားလေးတွေနဲ့ပဲ ဆွဲအားတွေကို စွဲမသွားအောင် ကြိုးစားရပါတယ်။ ဆွဲအားတွေနောက် အစွဲတွေ မရောက်အောင် အလုပ်များများလုပ်ပြီးပဲ ဖျောက်နေရတာဖြစ်ပါတယ်။ ခုချိန်ထိတော့ ဆွဲအားတွေနောက် ဆိုးဆိုးဝါးဝါး ရောက်မသွားသေးဘူးလို့ ထင်ပါတယ်။ စိုးရိမ်ပေးတဲ့အတွက် ကျေးဇူးတင်ပါတယ်။

အရှင်ဘုရား အပေါ်မှာ ကာယကံ၊ ဝစီကံ၊ မနောကံ တို့ဖြင့်ပြစ်မှားမိသည်များ ပါခဲ့ရင် တပည့်တော် ရှိခိုးကန်တော့ တောင်းပန်အပ်ပါတယ် အရှင်ဘုရား။

ရိုသေလေးစားစွာဖြင့်
တပည့် ဆက်နောင်

Read more »


RECENT POSTS

သူတုို့သူတုို့၏ မှတ်ချက်များ

အမှတ်တရ ပုံရိပ်များ