ဆူလာပြန်ပြီ ဆူနာမီ…

စိတ်ပင်ပန်းလို့ စိတ်နွမ်းပြေအောင် တရားတော်တွေနဲ့ စိတ်ပန်းဖြေချင်တယ်ဆိုမှ ဆူနာမီတရားနာမိလို့ အပန်းမပြေတဲ့အပြင် ပိုလို့တောင် နွမ်းနေပါတော့တယ်ဆိုတဲ့ ဒကာလေးတစ်ယောက်ရဲ့ အသံက နားထဲရောက်လာပြန်ပါတယ်။ ကိုယ်ကိုယ်တိုင်က အင်တာနက်စာမျက်နှာမှာ ဓမ္မအနှစ်သာရ သက်သက်တွေကိုပဲရေးပြီး တတ်နိုင်သမျှ နှစ်သက်မှုတွေကို မျှဝေပေးမယ်ဆိုတဲ့ ဆန္ဒနဲ့ သူတစ်ပါးကို ဝေဖန်တာ၊ တိုက်ခိုက်တာ၊ ဟိုလူ့အကြောင်းပြောတာ၊ ဒီလူ့အကြောင်း ပြောတာတွေ မလုပ်ဖြစ်အောင်၊ စာဖတ်သူများကို လောကီလောကုတ္တရာ အနှစ်တစ်ခုခုပဲ ပေးနိုင်အောင် ကြိုးစားနေပေမယ့် ခုတလော ဓမ္မစာမျက်နှာတွေမှာ ဆူနာမီနဲ့ ပတ်သက်ပြီး ပွဲက နဲနဲဆူလာပြန်တော့ စစ်မှန်တဲ့ အမှန်သစ္စာဘက်က ပူလာရပြန်ပါတယ်။

မကြာသေးခင်က အင်တာနက်ဓမ္မ စာမျက်နှာအချို့မှာ ဆူနာမီဆရာတော်နဲ့ ဒကာလေးအချို့တို့ အွန်လိုင်းမှာ ဆွေးနွေးမှုများကို တင်ထားတာတွေ့ပြီး သေချာအချိန်ပေး နားထောင်ဖြစ်ပါတယ်။ အမေးနွားကျောင်းသား အဖြေဘုရားလောင်းလို့ ဆိုတဲ့စကားကို ပြောင်းပြန်ဖြစ်အောင် ဖြေတဲ့ဘက်က ဝေ့လည်ကြောင်ပတ် လုပ်နေတာကို တွေ့ရပါတယ်။ ဘုရားလက်ထက်က တိတ္တိဆရာအချို့ရဲ့ အဖြေလို “ဟုတ်သလားဆို…မဟုတ်ဘူး၊ မဟုတ်ဘူးလားဆိုတော့ ဟုတ်တယ်…”ဆိုတဲ့ ဟိုလိုလို ဒီလိုလို အဖြေတွေပဲ နားထောင်လိုက်ရပါတယ်။ တိကျတဲ့ အဖြေမရခဲ့ပါဘူး။ သေချာတာကတော့ ဘုရားဟော စာပေတွေဟာ ဆူနာမီအတွက် ဆူနာမီမုန်တိုင်းနဲ့အတူ ပျောက်ပါသွားနေပြီဆိုတာ သေချာပါတယ်။ သာသနာတော်ရဲ့ အသက်ဖြစ်တဲ့ ၀ိနည်းတော်ကို ထည့်မတွက်ဘဲ ဒါတွေက ပညတ်တွေပါဆိုပြီး အရာရာ ပညတ်နဲ့ပဲ ကိုင်ပေါက်နေတာကို တွေ့ရပါတယ်။ ၀ိနည်းဆိုတာ မြတ်ဗုဒ္ဓရဲ့ အာဏာဒေသနာဆိုတာကို မေ့ထားပြီး အာဏာကို တော်လှန်သလို ဖြစ်နေပါတယ်။ သာမန်ပုထုဇင်များမပြောနဲ့ ရဟန္တာမထေရ်များတောင် ၀ိနည်းတော်အတိုင်းမညီရင် အာပတ်သင့်စေလို့ ပညတ်တော်မူခဲ့တဲ့ ဘုရားအမိန့်တော်ကို ပရမတ်တစ်ခုတည်းကိုင်ပြီး အပိုင်ဆန့်ကျင်နေတာဟာ မုန်တိုင်းထက် ကြောက်စရာ ပိုကောင်းနေပါတယ်။ ငါ့တွေ့ငါတွေ့ဆိုပြီး ငါ့နည်းအတိုင်း ငါဟောတာဆိုပေမယ့် ဘုရားသားတော် ဖြစ်နေတဲ့အတွက် ဘုရားမျက်နှာကိုတော့ ကြည့်ဖို့လိုပါတယ်။ ဘုရားက မလုပ်နဲ့ဆိုတာကိုတော့ မလုပ်ဘဲ လိုက်နာဖို့ လိုပါတယ်။

ခုတော့ အဲလိုမဟုတ်ဘဲ ဘုရားမလုပ်နဲ့ဆိုတာကို မလိုက်နာရုံတင်မကဘူး ဘုရားမလုပ်တဲ့အရာတွေကိုပါ လုပ်နေတာကို သူ့အပြောနဲ့ သူ့အဟော၊ သူ့လုပ်ရပ်တွေက တိုက်ရိုက်ပြနေတာကို တွေ့ရပြန်ပါတယ်။ ဘုရားက လွတ်မြောက်မှုအတွက် နည်းပေးလမ်းပြမှုလောက်ပဲ ပြုပြီး လက်တွေ့ကျင့်ကြံမှု အပိုင်းက ကိုယ်ကိုယ်တိုင် လုပ်ရမယ်လို့ ဟောထားတာတွေနဲ့ ဆန့်ကျင်ပြီး ဆူနာမီက တရားအလုပ်ကို ကူလုပ်ပေးနေပါတယ်တဲ့။ ဘေးကနေ သတိပေးတဲ့အနေနဲ့ လမ်းညွှန်ပေးတာ မဟုတ်တော့ဘဲ တရားအားထုတ်သူတွေကို သူ့အစွမ်းတွေထည့်ပေးပြီး သူရထားတာတွေကို မျှပြီးပေးနေသလို လုပ်နေပါတယ်တဲ့။ သူ့ရဲ့နည်းတွေဟာ ယောဂီများအတွက် ကိုယ်ကိုယ်တိုင် ကျင့်ယူရမယ့် အရာကို သူ့အားနဲ့ အချောင်ယူနိုင်အောင် လုပ်ပေးနေသလို ဖြစ်နေပါတယ်။ သူ့ရဲ့နည်းတွေဟာ အားလုံးပညတ်တွေပဲ၊ အရာရာ ဘာမှမရှိဘူးဆိုပြီး ဟောပြောနေတာ တွေကြောင့် အယူလွဲနေတဲ့ နတ္ထိက၀ါဒ ဆန်ဆန်ဖြစ်နေပြန်ပါတယ်။ သမုတိသစ္စာနဲ့ ပရမတ္တသစ္စာနှစ်မျိုးမှာ ပရမတ္ထသစ္စာက အဓိကကျပေမယ့် ဆူနာမီကတော့ အစွန်းရောက်စေတဲ့အထိ ပရမတ်ကို ဟောပြောနေတာကို တွေ့နေရပါတယ်။ ပြီးတော့ အနတ္တ အနတ္တဆိုတဲ့ စကားလုံးကို တွင်တွင်သုံးပြီး ဘုရားဟောတဲ့ အနတ္တနဲ့ ဆန့်ကျင်ပြီး သူတီထွင်ထားတဲ့ အနတ္တတွေနဲ့ သဒ္ဓါလွန်ကဲပြီး ပညာနည်းနေသူများကို ရိုက်သွင်းနေသလို ဖြစ်နေပါတယ်။

အဆိုးဆုံးက သူဟောပြောတာတွေကို ဗုဒ္ဓစာပေတွေနဲ့ မညှိတာဘဲ ဖြစ်ပါတယ်။ ငါတွေ့က အရေးကြီးပေမယ့် သဒ္ဓါပညာဝီရိယ အားတွေ ယုတ်လျော့လာနေတဲ့ ယနေ့ခေတ်ကြီးမှာ ဗုဒ္ဓစာပေတွေကပဲ စံတစ်ခုအဖြစ် မှန်မမှန်ကို စိစစ်ပေးနိုင်တာကို သူက စာပစ်ပြီး ငါဟစ်နေလေတော့ သူ့ရဲ့ငါတွေ့ဟာ အလွဲလမ်းအတွက် အားကိုးတစ်ခု ဖြစ်နေတာပါပဲ။ မဟာစည်ဆရာတော်ကြီး၊ မင်းကွန်းဆရာတော်ကြီး၊ မိုးကုတ်ဆရာတော်ကြီး၊ ဖားအောက်တောရ ဆရာတော်ကြီး စတဲ့ သီလသမာဓိပညာ အားကောင်းလှတဲ့ ဆရာမထေရ်ကြီးများပင် စာပေအတိုင်း၊ စာပေနဲ့ညှိပြီး စာပေကို မလွန်စေဘဲ ဟောပြောပေးခဲ့တာ၊ ဟောပြောပေးနေတာတွေကို ဆန့်ကျင်ပြီး ဆူနာမီက ငါတွေ့တွေနဲ့ စာကိုမေ့နေတာတော့ လိုက်နာကျင့်ကြံသူတွေအတွက် ရင်လေးစရာ ဖြစ်နေပါတယ်။ ဒီလိုသာ ဆက်ပြီး စာပေကို ပစ်နေမယ်ဆိုရင်တော့ သူတီထွင်ထားတဲ့ အယူဝါဒတစ်ခု တည်ထောင်နေသလို ဖြစ်နေပါလိမ့်မယ်။ သူ့အနေနဲ့ ၀ါဒတစ်ခု တည်ထောင်တာက အရေးမကြီးပါဘူး။ အယူဝါဒမှိုင်းမိလို့ သူ့နောက်ကို လိုက်မိတဲ့ ကျင့်ကြံသူတွေပါ အလွဲလမ်းကို လိုက်မိနေပြီး ဆိုးကျိုးတွေ ကြုံလာတဲ့အခါမှ ဗုဒ္ဓဘာသာ ရဟန်းတော်တစ်ပါးကို ကိုးကွယ်မိလို့ ဒီလိုဖြစ်တာပါလို့ ဆိုလာခဲ့ရင် ဘာသာသာသနာနဲ့ သံဃာ့ဥသျှောင် မထေရ်ကြီးများအထိ ပြောစရာဖြစ်လာနိုင်ပါတယ်။ ဒါကြောင့် သူက၀ါဒတစ်ခု တည်ထောင်ပေမယ့် သူ့ဝါဒကို လိုက်နာသူများအနေနဲ့ ယုံကြည်မှုကို ပညာနှင့်ဆင်ခြင်နိုင်အောင် သတိပြုကြဖို့ လိုအပ်လှပါတယ်။ “ဆရာတစ်ပါး လွဲချော်သွားက တပည့်အများ အပါယ်လား၏..”လို့ ဆိုသလို မဖြစ်ရအောင် ဆရာအနေနဲ့ အလွဲမရှိစေဖို့နဲ့ တပည့်တွေအနေနဲ့လည်း အလွဲမမိဖို့ ကြိုးစားသင့်ပါတယ်။

ထားပါတော့။ ဒီနေရာမှာ သိစေလိုတာက ဟောတာပြောတာ ဖြန့်ဝေတာများဟာ ငါတွေ့ငါတွေ့ ဆိုပြီး ဗုဒ္ဓစာပေတွေနဲ့ ဆန့်ကျင်ပြီး မဖြစ်စေဖို့ အဓိကပြောလိုရင်း ဖြစ်ပါတယ်။ ကိုယ်တိုင်လိုက်နာကျင့်သုံးမှုဟာ အဓိကကျပေမယ့် သူတစ်ပါးကို ဟောကြားတဲ့အခါမှာတော့ ဗုဒ္ဓစာပေနဲ့ ညှိပြီး ဟောပြောပေးဖို့လိုပါတယ်။ ကိုယ်ကိုယ်တိုင်က သဗ္ဗညုတဉာဏ်ရှင် ဘုရားသခင်ဆိုရင်တော့ မဆိုလိုဘူးပေါ့။ အဲလိုမှမဟုတ်သေးရင် အမှားတွေ ဖြစ်နိုင်သေးတဲ့အတွက် ကိုယ့်ဝါဒကို သူများတွေကို ဟောကြားတဲ့အခါ အစွန်းမလွတ်အောင် စာပေနဲ့တိုက်ပြီး ဟောကြားစေချင်တာပါ။ အမှန်တော့ ဗုဒ္ဓစာပေမှာလာတဲ့အတိုင်း သွားတာက အမှားကင်းပြီး အကောင်းဆုံး လမ်းပဲဖြစ်ပါတယ်။ လွန်ခဲ့တဲ့နှစ်ပေါင်း မြောက်များစွာကတည်းက ဘုရားစာပေအတိုင်း ဟောပြောပို့ချလာခဲ့တဲ့ ဆရာတော်ကြီးများဆိုရင် ဘယ်သူမှ ဝေဖန်ထောက်ပြစရာမရှိဘဲ အခုချိန်အထိ စင်ပေါ်မှာ ရှိနေတယ်ဆိုတာကို ကိုယ်ပိုင်ဝါဒတွေနဲ့ ပေါ်ပြူလာဖြစ်အောင် ဖောက်ထွက်ဖို့ ကြိုးစားနေကြသူများ အနေနဲ့ အထူးသတိပြု သင့်လှပါတယ်။ လိုက်နာကျင့်သုံးသူများ အနေနဲ့လည်း ကိုယ်နဲ့အဆင်ပြေတယ်၊ အခိုက်အတန့် သမာဓိနိမိတ်လေးရပြီး ငြိမ်းချမ်းတယ်ဆိုရုံနဲ့ တရားတွေ့ပြီလို့ ကိုယ့်ကိုယ်ကိုသတ်မှတ်ကာ ဒီဆရာတော်ရဲ့ အယူဝါဒသာ အမှန်ဆိုပြီး ၀ါဒမှိုင်းမမိဘဲ သဒ္ဓါပညာ ညီမျှစွာ လိုက်နာကျင့်သုံးကြဖို့ အထူးလိုအပ်လှပါတယ်။

ဒါကြောင့် ဆူနာမီကို အကြောင်းပြုပြီး ဆူလာတာတွေကို ဓမ္မအနှစ်သာရများနဲ့ တည်ငြိမ်အေးချမ်း ငြိမ်းအေးစေဖို့၊ အမှားနည်းပြီး အမှန်လမ်းကို လျှောက်နိုင်စေဖို့ ဟောပြောသူများနဲ့ လိုက်နာသူများ အနေဖြင့် ဘုရားမျက်နှာကို ကြည့်ပြီး ဘုရားဟောတဲ့ အရာတွေနဲ့ ဆန့်ကျင်ပြီး မဟောပြော မပို့ချ၊ မလိုက်နာ မကျင့်သုံးကြဘဲ ငါအသိကို စာပေနဲ့ညှိကာ ဟောပြောပို့ချ၊ လိုက်နာကျင့်သုံးကြပါဟု စေတနာစကားဖြင့် အသိတရား ပါးလိုက်ရပါကြောင်း…

4 မှတ်ချက်များ (...ရေးရန်):

  • Vipassana Meditation says:
    Friday, March 05, 2010

    ဘုန်းဘုန်းဦးဝိစိတ္တဆရာတော်အရှင်သူမြတ် (နှင့်) ဓမ္မမိတ်ဆွေများခင်ဗျား...

    ဆူနာမီဆရာတော်ရှင်းပြချက် တရား ၉ ပုဒ်ပါဘုရား။
    အောက်ပါလင့်လေးမှာပါဘုရား။

    http://www.mediafire.com/?sharekey=19aabee74b2877695a3d773badf21430859762455ffca24384bbec0582a7e90e

    သေသေချာချာနားဆင်ပေးစေလိုပါတယ်ဘုရား..
    ဆူနာမီဆရာတော်ဟာ ပညတ်များကို ပယ်ခိုင်းနေတာလား။ ဒါမှမဟုတ် ပညတ်များအပေါ် ငြိတွယ်နေသည့် သမုဒယသစ္စာ ဥပါဒါန်အစွဲများကို မှန်မှန်ကန်ကန် စွန့်လွှတ်နိုင်စေရန် (သို့) ၀ိပဿနာဥာဏ်များဖြစ်ပေါ်စေရန် guided နည်းလမ်းပေးနေတာလားဆိုတာ ကွဲကွဲပြားပြား သိရှိနိုင်ရန်အတွက် သေသေချာချာ နားဆင်ပေးစေလိုပါတယ်ဘုရား။
    ဝေဖန်သူများသည် Guided meditation သဘောဆိုတာကိုလည်း သေသေချာချာ သဘောပေါက်ဖို့လိုပါတယ်ဘုရား။
    Guided meditation သဘောကို မသိသဖြင့် ဆရာတော်မှ ယောဂီကိုယ်စား တရားကူထိုင်ပေးသည် ဟု အထင်မှားကြပါသည်ဘုရား။
    တရားအားထုတ်မှုကို သေသေချာချာ လေ့လာထားသူများသာ guided meditation သဘောကို သိနားလည်နိုင်ပါသည်ဘုရား-ဥပမာ
    မိုးကုတ်ဆရာတော်ကြီး၏ “နားက တရားနာနေစဉ် ခန္ဓာဥာဏ်လှည့်” ဆိုသော တရားနှလုံးသွင်းပုံ သင်ကြားပေးမှုများ၊
    သဲအင်းဂူဆရာတော်ကြီး၏ “ရှုကွက်တရားများ”၊
    ဆရာတော်ဦးဇောတိက မဟာမြိုင်တောရ၏ “ငြိမ်းချမ်းခြင်းတရာ;” guided meditation ခွေ နှင့်
    အနောက်နိုင်ငံမှ Jack Konfield ၏ guided meditation များ သည် မိမိကိုယ်တိုင် တစ်ဦးတည်း တရားအားထုတ်ရန် အချိန် -နေရာ-အခက်အခဲရှိနေသူများ(သို့)ရိပ်သာသွားရန် အချိန်မပေးနိုင်သူများ(သို့)လူမမာများအတွက် တရားခွေကိုဖွင့်လျှက် တရားနှလုံးသွင်းရသော တရားအားထုတ်နည်း(သို့)တရားအားထုတ်ရာတွင် နှလုံးသွင်းမှန်ကန်စေရန် အလွန်မှန်ကန်ထိရောက်သော အကူအညီပေးမှုဖြစ်ပါသည်။ တစ်ခုခုကို စူးစိုက်ကာ တရားမှတ်နေသည်ဟုဆိုသော်လည်း တွေးချင်ရာတွေးနေကာ စိတ်ပျံ့လွင့်သူများအတွက် အလွန်ထိရောက်ကောင်းမွန်သော အကူအညီဖြစ်ပါသည်။ လက်တွေ့လုပ်ကြည့်သူများသာ အလွန်ကျေးဇူးများကြောင်းသိကြပါသည်။ သမထ တရားနည်း တစ်ခုခုကို သာ နားလည်ပြီး တရားနည်းတစ်ခုကို ဆုပ်ကိုင်လျှက် ထိုနည်းနှင့် မတူညီသော မိမိဥာဏ်မမီသော ၀ိပဿနာတရားနည်းများအတွက် ဝေဖန်နေမှုမှာ အပြုသဘောထက် ဓမ္မန္တရာယ်ကြီးသို့ ဦးတည်နေကြောင်း လေးစားစွာဖြင့် သတိပေးနှိုးဆော်အပ်ပါသည်။

    ထို့ပြင် ပညတ် နှင့် ပရမတ် အခြင်းအရာများနှင့်ပတ်သက်၍လည်း ထဲထဲဝင်ဝင်လေ့လာဖို့ လိုအပ်ပါသဖြင့် မျှဝေအပ်အပ်ပါသည်။
    ပညတ် နှင့် ပရမတ် အခြင်းအရာများနှင့်ပတ်သက်၍ သီဟိုဠ်မှ မေးခွန်းများအား လယ်တီဆရာတော်ကြီး၏ ရှင်းလင်းချက်ကို အောက်ပါ လင့်လေးတွင်ဖတ်ရှုနိုင်ပါသည်ဘုရား။

    http://realenlightenment.multiply.com/journal/item/9/9


    ရှိခိုးဦးခိုက်လျှက်
    သစ္စာ

  • Vipassana Meditation says:
    Saturday, March 06, 2010

    ဆူနာမီက ဆူတာလား...
    ကိလေသာတွေက ဆူတာလား....

    ၁) http://trueanswer.multiply.com/journal/item/3/3

    ၂) http://trueanswer.multiply.com/journal/item/4/4

    ရှိခိုးဦးခိုက်လျှက်
    သစ္စာ

  • Anonymous says:
    Wednesday, March 10, 2010

    သူ ဦးဇင်းမဝတ်ခင် လူဝတ်နဲ့  ၃၈လမ်းမှာ တရားစာတရားခွေတွေ အခမဲ့ငှားဆိုင်ဖွင့်ထားတာ အရမ်းလေးစားမိတယ်။ယောဂီတယောက်လို နေထိုင်သွားလာတာ သိပ်ကြည်ညိုဖို့ ကောင်းတယ်။အခုနောက်ပိုင်း သင်္ကန်းဝတ်သွားပြီးမှ ပေါက်ကရအသံတွေ ကြားလာရတာ အကြည်ညိုပျက်လာတယ်။ ဖြစ်နိုင်ရင် အရင်ကလိုပဲ လူယောဂီအကျင့်လေးနဲ့  အခမဲ့တရားဆိုင်လေး ပြန်လုပ်နေတာကမှ အကျိုးရှိဦးမယ်။သင်္ကန်းဝတ်ကြီးနဲ့ ပြစ်မှားကျူးလွန်နေတာ အားလုံးအတွက်အကျိုးယုတ်ပါတယ်။သက်ဆိုင်ရာက သူ့ ကို လူဝတ်ပြန်လဲပေးလိုက်ရင် သိပ်ကောင်းမယ် သာသနာအတွက် အကျိုးဖြစ်ထွန်းမယ် ထင်ပါတယ်။
    oway8888

  • Anonymous says:
    Tuesday, May 31, 2011

    ဆူနာမီဆရာတော်နှင့် ပတ်သက်ပြီး အမှန်တရားကို ဖော်ပြထားသော ဆောင်းပါးတချို့

    http://www.mediafire.com/?c8id49t48yywkcp


RECENT POSTS

သူတုို့သူတုို့၏ မှတ်ချက်များ

အမှတ်တရ ပုံရိပ်များ