Showing posts with label အားဖြည့်ဓမ္မစကားများ. Show all posts
Showing posts with label အားဖြည့်ဓမ္မစကားများ. Show all posts

ဒါလည်း ဆင်းရဲပါပဲ

ဦးစားပေးခံချင်တဲ့ စိတ်၊ အလေးပေးခံချင်တဲ့ စိတ်၊ အသိအမှတ်ပြု ခံချင်တဲ့စိတ် စတာတွေဟာလည်း ဆင်းရဲတစ်မျိုးပါပဲ။ 

သတ္တဝါတွေရဲ့  စိတ်အစဉ်ဆိုတာ ကိုယ့်ကို တစ်ယောက်ယောက်က အလေးထားတာ၊ ချီးမွန်းတာ၊ ဦးစားပေးတာ၊ အသိအမှတ်ပြုတာကို လိုချင်ကြ၊ သာယာကြ၊ တောင့်တကြတာ သဘာဝပါပဲ။ ဒါပေမယ့် တစ်ခါတရံ အဲဒီစိတ်ကြောင့်ပဲ ကိုယ့်မှာ ပင်းပန်းတာတွေ၊ စိတ်ဖိစီးတာတွေ၊ အလိုမကျတာတွေ၊ ခံစားရတာတွေ ရှိနေပြန်တတ်ပါတယ်။ ဦးစားပေးတာ မခံရလို့၊ အသိအမှတ်ပြု မခံရလို့၊ အလေးပေးမခံရလို့ စသဖြင့် ဖြစ်ပေါ်လေ့ရှိတဲ့ ပင်ပန်းမှုခံစားချက်ဟာ လူအတော်များများရဲ့  ဝန်းကျင်အသီးသီးမှာ ဖြစ်နေတတ်တဲ့ သဘောရှိပါတယ်။ ပိုဆိုးတာက ကိုယ့်ကို ဦးစားမပေးဘဲ တခြားသူကို ဦးစားပေးတဲ့အခါ၊ ကိုယ့်ကို အသိအမှတ်မပြုဘဲ တခြားသူကို အသိအမှတ်ပြု သွားတဲ့အခါ၊ ကိုယ့်ကို အလေးမပေးဘဲ တခြားသူကို အလေးပေးသွားတဲ့ အခါမျိုးမှာ အတူနေကြတဲ့ သူအချင်းချင်းတောင်မှ မကျေမနပ် ခံစားချက်တွေ ဖြစ်နေကြတဲ့ သဘောရှိပါတယ်။ 

သေချာတွေးကြည့်လိုက်တော့ ဒီလို ခံစားရတာတွေဟာ ကိုယ့်ဘက်က သိစိတ်ကရော၊ မသိစိတ်ကပါ လိုလားနေတဲ့ မျှော်လင့်ချက်ကြောင့်ပဲဖြစ်ပါတယ်။ မျှော်လင့်တာတွေ ရှိနေတော့ မျှော်ရင်းမျှော်ရင်းနဲ့ မျှော်လင့်တဲ့အတိုင်း ဖြစ်မလာတဲ့အခါမှာ စိတ်အစဉ် ခံစားချက် ဝေဒနာတွေ တိုးလာကြတော့တာပဲ ဖြစ်ပါတယ်။ မျှော်တာတွေက ချော်သွားတဲ့အခါ မတော်တာတွေတွေးပြီး မလျော်တာတွေပါ လိုက်ခံစားမိတော့ ဝေဒနာတွေက တက်လာကြတော့တာပဲပေါ့။

ဒီတော့ကား တစ်ယောက်ယောက်နဲ့ ပတ်သက်လို့ပဲ ဖြစ်ဖြစ်၊ တစ်ခုခုနဲ့ ပတ်သက်လို့ပဲ ဖြစ်ဖြစ် ဆက်ဆံပေါင်းသင်း လုပ်ကိုင်ပေးရတဲ့အခါ ဦးစားပေးခံချင်၊ အသိအမှတ်ပြု ခံချင်၊ အလေးပေးခံချင်တဲ့ မျှော်လင့်ချက်အတွေးကို ဘေးဖယ်ပြီး ဘယ်သူအသိအမှတ်ပြုပြု မပြုပြု၊ ဘယ်သူဦးစားပေးပေး မပေးပေး၊ ဘယ်သူ အလေးပေးပေး မပေးပေး ကိုယ့်ကိုကိုယ် အသိအမှတ်ပြုပြီး ကိုယ်လုပ်ရပ်ကိုယ် ကျေနပ်နေ၊ အပြစ်ကင်းနေအောင် ကြိုးစားကြဖို့ပဲ ဖြစ်ပါတယ်။ စစ်မှန်တဲ့ အတွေး၊ စစ်မှန်တဲ့ လုပ်ဆောင်ချက်နဲ့ လုပ်တဲ့ အပြစ်ကင်းတဲ့ အလုပ်တွေဟာ သူများ အသိအမှတ်ပြုဖို့၊ သူများအလေးပေးဖို့ မလိုပါဘူး။ ကိုယ့်ကိုကိုယ် အသိအမှတ်ပြု၊ ကိုယ့်ကိုကိုယ် အလေးဂရုပြုဖို့က အရေးအကြီးဆုံးပဲ ဖြစ်ပါတယ်။ 

မေတ္တာဖြင့်
မနာပဒါယီ အရှင်ဝိစိတ္တ

Read more »

အသိရှိပါ၊ သတိမလွတ်ပါစေနဲ့


အသိရှိပါ၊ သတိမလွတ်ပါစေနဲ့ ()
--------------------
ဖတ်ဖူးတဲ့ စာပိုဒ်လေးတစ်ခုပါ။
သူများလဲသွားအောင် ခြေထိုးခံတဲ့အချိန် ကိုယ်လည်းရှေ့ကို မသွားနိုင်ပါဘူးတဲ။

သိပ်မှန်ပါတယ်။ ကိုယ့်အလုပ်ကို ကောင်းအောင်လုပ်ရမယ့်အချိန်မှာ သူများမကောင်းကြံနေ၊ သူများမကောင်းကြောင်းပြောနေ၊ သူများမကောင်းအောင် လုပ်နေရတာနဲ့ ကိုယ့်မှာအချိန်တွေကုန်ပြီး အပြစ်တွေသာ ဖြစ်နေတော့တာပါ။ အဲဒီလို သူများမကောင်းကြောင်းတွေ ကြံစည်ပြောဆို လုပ်ကိုင်နေတဲ့အချိန်တွေများ ကိုယ့်အတွက်၊ အများအတွက် အကောင်းတစ်ခုခု လုပ်ဖြစ်ခဲ့မယ်ဆိုရင် ဘယ်လောက်များ အကျိုးများလိုက်မလဲပေါ့။ ဒီတော့ကား သူများအပေါ် အပြစ်တွေရှာနေမယ့်အစား သူ့လမ်းသူလျှောက် ကိုယ့်လမ်းကိုယ်လျှောက်ပြီး ကိုယ်ကောင်းအောင် ကြိုးစားကာ ကိုယ့်အတွက်နဲ့ အများအတွက် အကျိုးတစ်ခုခုကို တိုးပွားအောင်သာ လုပ်ကြရမှာ ဖြစ်ပါတယ်။ သေချာတာကတော့ သူများအတွက် မဟုတ်တာတွေ အားထုတ်နေတဲ့အချိန်ဟာ ကိုယ်သန္တာန်မှာ မကောင်းတဲ့အားတွေ တိုးနေတဲ့အချိန်ဆိုတာ အသေအချာပါပဲ။ အသိရှိပါ၊ သတိမလွတ်ပါစေနဲ့။

[မနာပဒါယီ အရှင်ဝိစိတ္တ (ဒိုက်ဦး)]


အသိရှိပါ၊ သတိမလွတ်ပါစေနဲ့ ()
---------------------
ကိုယ့်ဒုက္ခမှ ဒုက္ခထင်မနေနဲ့။
ရုပ်ရှိနေသမျှ ဒုက္ခဆိုတာ
အားလုံးမှာ ရှိနေကြတာပါ။
ရုပ်ဒုက္ခကြား စိတ်ဒုက္ခမများဖို့သာ
သတိပြု ဆင်ခြင် ကိုယ့်စိတ်ကို 
ပြင်နိုင်အောင် ကြိုးစားကြရမှာပါ။

[မနာပဒါယီ အရှင်ဝိစိတ္တ (ဒိုက်ဦး)]

Read more »

အောင်မြင်တိုးတက်သူတွေရဲ့ ဘဝ

အမြင့်ရောက်လေ၊ လေအတိုက်ခံရလေပဲ။

အမြင့်ရောက်တဲ့သူတွေဟာ လေဒဏ်ကို ခံနိုင်ရည်ရှိရမှာပါ။ ပြီးတော့ အကျိုးမရှိတဲ့ အလုပ်တွေ မလုပ်ကြဘူး။


အကျိုးမဲ့ ဝေဖန်တာ၊ ကဲ့ရဲ့တာ၊ အပြစ်ပြောတာတွေဟာ လူတိုင်းလုပ်တတ်ပါတယ်။ ဒါပေမယ့် အဲဒီလို ဝေဖန်၊ ကဲ့ရဲ့ အပြစ်ပြောတာမျိုးကို မလုပ်ဖြစ်အောင်၊ သူများက ကိုယ့်ကိုအဲဒီလို ပြောလာခဲ့ရင်လည်း ဒီဒဏ်တွေကို ခံနိုင်အောင်ကျတော့ လူတိုင်းမလုပ်တတ်ပါဘူး။ မလုပ်နိုင်ပါဘူး။ ဘဝမှာ သူများထက် ထူးခြားပြီး တိုးတက်သွားတယ်ဆိုတဲ့ သူတွေဟာ အများမလုပ်နိုင်တဲ့ အလုပ်တွေကို လုပ်နိုင်ကြလို့ပါပဲ။ အထူးသဖြင့် လူတိုင်းလုပ်တတ်တဲ့ အကျိုးမဲ့ ဝေဖန်တာတွေ၊ ကဲ့ရဲ့တာတွေ၊ အပြစ်ပြောတာတွေကို ရှောင်ကြဉ်ပြီး လူတိုင်းမလုပ်နိုင်တဲ့ အဲဒီ ဒဏ်တွေကို ခံနိုင်ရည်ရှိအောင် ကြိုးစားအားထုတ်နိုင်ကြလို့ပါပဲ။ ဒါကြောင့် တိုးတက်ချင်တဲ့သူတွေဟာ မလိုအပ်တဲ့ အချည်းနှီးဝေဖန်ကဲ့ရဲ့ အပြစ်ပြောတာတွေကို ရှောင်ကြဉ်ပြီး ပတ်ဝန်းကျင်ရဲ့ ရိုက်ခတ်မှုဒဏ်ကို ခံနိုင်အောင် လိုက်နာကျင့်သုံးကာ ဖြစ်ပေါ်လာမယ့် အခက်အခဲတွေကိုလည်း မတုန်မလှုပ် ခံနိုင်ရည်ရှိအောင် ကြိုးစားကြဖို့ လိုအပ်လှတာ ဖြစ်ပါတယ်။ 

[မနာပဒါယီ အရှင်ဝိစိတ္တ (ဒိုက်ဦး)]

Read more »

လွတ်လပ်တဲ့ စိတ်



တစ်ခါတလေ စိတ်ဟာ တင်းကျပ်ပြီး လေးလံနေတတ်ပါတယ်။ စိတ်ဖိစီးမှုတွေများလာတဲ့အခါ၊ အဆင်မပြေမှုတွေ များလာတဲ့အခါ၊ အခက်အခဲတွေ များလာတဲ့အခါ အဲဒီ ဖိအားတွေကြောင့် ကိုယ့်စိတ်မှာ လေးလံထိုင်းမှိုင်းနေပြီး လွတ်လပ်တဲ့ စိတ်မဖြစ်တော့ဘဲ တင်းကျပ်နေတော့တာ ဖြစ်ပါတယ်။ အထူးသဖြင့် မလိုလားအပ်တဲ့ အတွေးတွေဟာ စိတ်ကိုပိုပြီး မွန်းကျပ်စေပါတယ်။ အတွေးတွေဟာ စိတ်ရဲ့လွတ်လပ်မှုကို လွှမ်းမိုးထားတဲ့အတွက် ထွက်ပေါက်ပျောက်ပြီး ကျဉ်းကြပ်နေတတ်တာ ဖြစ်ပါတယ်။ ဒါဟာ ဖိအားတွေက ဖြစ်ပေါ်ပြီးသွားခဲ့ပေမယ့် အဲဒီ ဖိအားတွေကို အကြောင်းပြုပြီး ကျန်နေခဲ့တဲ့ အတွေးတွေကြောင့်ပဲ ဖြစ်ပါတယ်။ အရင်းစစ်တော့ စိတ်ကိုလေးလံ ထိုင်းမှိုင်းစေတာဟာ မလိုလားအပ်တဲ့ အတွေးတွေကြောင့်ဆိုတာ ကောက်ချက်ချလို့ ရမှာဖြစ်ပါတယ်။

ဒါကြောင့် ပင်ကိုယ်အားဖြင့် အညစ်အကြေးကင်းပြီး သန့်ရှင်းနေတဲ့စိတ်ဟာ ဖိအားတွေ၊ အခက်အခဲတွေ၊ မလိုလားအပ်တဲ့ အတွေးတွေကြောင့် လေးလံထိုင်းမှိုင်းကာ လွပ်လပ်ပေါ့ပါးတဲ့ စိတ်မဖြစ်ဘဲ လူကိုပိုပြီး ပင်ပန်းနွမ်းနေစေတတ်တဲ့အတွက် အဲဒီလို စိတ်မှာတင်းကျပ်ပြီး ဖိအားတွေနဲ့ လေးလံထိုင်းမှိုင်းနေတဲ့အခါ ကိုယ့်ကိုကိုယ် သတိပြုဆင်ခြင်ပြီး အတွေးတွေကို အရင်ထုတ်ကာ ဘာမှအကြာကြီး မဟုတ်ဘူးဆိုတဲ့ မမြဲခြင်းရဲ့ သဘောကို မြင်အောင်ရှုရင်း ဖိအားဆိုတာ အသိတရား မပါရင် အခါခါ လာနေတတ်တာကို အမှတ်သတိ မပြတ်ရှိနေကြရမှာ ဖြစ်ပါတယ်။ 

သတိရှိနေတဲ့စိတ်ဟာ လွတ်လပ်တဲ့စိတ်၊ ပေ့ါပါးတဲ့စိတ်၊ ဖိအားမရှိတဲ့စိတ်၊ အညစ်အကြေးကင်းပြီး သန့်ရှင်းတဲ့စိတ်ဆိုတာ အသေအချာပဲ ဖြစ်ပါတယ်။ 

Read more »

သူ့အကျိုးဟာ ကိုယ့်အဆိုး မဖြစ်ပါစေနဲ့



လောကမှာ တစ်ချို့က တစ်ခါတလေ ကိုယ်နဲ့အယူအဆ မတူတဲ့သူတွေ၊ ကိုယ်နဲ့မတည့်တဲ့ သူတွေ၊ မဟုတ်တာ လုပ်တဲ့သူတွေ ဒုက္ခရောက်သွားတဲ့အခါ၊ အဆိုးတွေ ကြုံသွားတဲ့အခါ ဝမ်းသာအားရ ဖြစ်တတ်ကြပါတယ်။ အမုန်းတရားနဲ့ ရင်ထဲမှာ ကြိတ်ပြီးဝမ်းသာနေတတ်ပါတယ်။ “နည်းတောင်နည်းသေးတယ်”ဆိုပြီး စိတ်ထဲမှာ အကျေနပ်ကြီး ကျေနပ်နေတာတွေ ရှိတတ်ပါတယ်။ 

အဲဒီလို သူများဒုက္ခရောက်သွားတဲ့ အပေါ်မှာ ကိုယ်က ဝမ်းမြောက်ဝမ်းသာဖြစ်မိတာဟာ ကောင်းတဲ့စိတ်မဟာပါဘူး။ ကိုယ်နဲ့တည့်တာ၊ မတည့်တာတွေ ခဏထား၊ သူကောင်းတာ မကောင်းတာ အသာထားပြီး ကိုယ့်ရှုထောင့်က ကိုယ်စဉ်းစားကြည့်ကြဖို့တော့ လိုပါတယ်။ သူမကောင်းလို့ သူ့အပြစ်နဲ့ သူခံရတာဟာ သူ့အကြောင်းကြောင့် အကျိုးဖြစ်တဲ့ သဘောပဲ ဖြစ်ပါတယ်။ အဲဒါကို ကိုယ်ကသူများဒုက္ခရောက်တဲ့ အပေါ်မှာ ဝမ်းသာအားရ ဖြစ်မိတာတော့ ကိုယ့်ကိုကိုယ် အကုသိုလ် ဝင်ယူသလို ဖြစ်နေတတ်ပါတယ်။ အဘိဓမ္မာမှာ တော့ ဉာဏ်မယှဉ်တဲ့ ဝမ်းမြောက်မှုလုပ်ရပ်ဟာ အကုသိုလ်စိတ်တစ်မျိုးပဲလို့ ဆိုပါတယ်။ ဒါဟာ သတိပြုစရာ အချက်တစ်ခုပါ။

အမှန်တော့ ပုထုဇဉ်သဘာဝ ကိုယ့်အပေါ်မှာ မကောင်းတဲ့သူ၊ လောကကောင်းကျိုးမပြုတဲ့ သူတွေ သူတို့အပြစ် သူတို့ခံရတဲ့အခါ အများအတွက်ကြည့်ပြီး ကိုယ်က ဝမ်းမြောက်မိတတ်ပေမယ့် တကယ်ထားသင့်တဲ့ စိတ်ထားက အကုသိုလ် သောမနဿမျိုး မဟုတ်ဘဲ သဗ္ဗေသတ္တာ ကမ္မဿကာဆိုတဲ့ အတွေးမျိုးထားရမှာပါ။ သူတပါးဒုက္ခရောက်တဲ့ အပေါ်မှာ ဝမ်းမြောက်ဖို့ထက် “သူ့ကံ သူခံသွားတဲ့ သဘောပါလား”လို့ မချစ်မမုန်း ဥပေက္ခာနှလုံးနဲ့ ဆင်ခြင်တတ်ရမှာ ဖြစ်ပါတယ်။ ဒါမှ သူ့အပြစ်ဟာ ကိုယ့်အပြစ်မဖြစ်မှာပါ။ မဟုတ်ရင် သူများကိုကြည့်ပြီး ကိုယ့်မှာအပြစ်တွေ ဖြစ်နေတတ်ပါတယ်။ ဒါဟာလည်း ပုထုဇဉ်သဘာဝ ကိုယ့်စိတ်ကိုယ် ပြုပြင်ကျင့်သုံးသင့်တဲ့ အချက်ပဲ ဖြစ်ပါတယ်။ 

Read more »

အချိန်မတန်သေးလို့ပါ


- ကိုယ်ကောင်းရဲ့သားနဲ့ အခြေအနေတွေက မကောင်းသေးဘူး၊ မပြောင်းသေးဘူး၊ အဆိုးတွေပဲ ဆက်ဖြစ်နေသေးတယ် ဆိုရင်လည်း စိတ်ဓာတ်မကျပါနဲ့၊ ဇွဲမလျော့ပါနဲ့၊ ကိုယ့်ကံကိုယ် မယုံမကြည် မဖြစ်လိုက်ပါနဲ့။ ကောင်းတဲ့အလုပ်တွေကိုသာ ကြိုးစားပြီး ဆက်လုပ်နေလိုက်ပါ။

- မကောင်းတာလုပ်နေရဲ့သားနဲ့ အခြေအနေတွေကောင်းပြီး ဘဝမပြောင်း အလှတွေဆောင်းနေသေးတဲ့ သူတွေကို တွေ့ခဲ့ရင်းလည်း အားမကျမိပါစေနဲ့၊ စိတ်ခံစားမှု မဖြစ်မိပါစေနဲ့၊ ကံတရားက မျက်နှာလိုက်တယ်လို့ မတွေးမိပါစေနဲ့။ ကိုယ့်အလုပ်ကို ကောင်းအောင်ပဲ ဂရုစိုက်ပြီး ကြိုးစားနေလိုက်ပါ။

- ကောင်းမှု၊ မကောင်းမှုဆိုတာ အချိန်တန် အကျိုးပေးချိန်တန်မှ အကြောင်းကြောင့် အကျိုး ဖြစ်လာတဲ့သဘော ရှိတဲ့အတွက် ကံအကျိုးပေးချိန်တွေကို မမျှော်ဘဲ လက်ရှိအချိန်မှာ ကိုယ့်အလုပ်ကိုယ် ကောင်းအောင်လုပ်ကြဖို့ပဲ အရေးကြီးပါတယ်။ ကံအကျိုးပေးဆိုတာ အချိန်တန်ရင် ကိုယ်ကမမျှော်လည်း သူ့အကျိုးသူပေးသွားမှာ အမှန်ပဲ ဖြစ်ပါတယ်။ 

“အကျိုးပေးရမှာက ကံရဲ့အလုပ်၊ စေတနာကောင်းနဲ့ အလုပ်ကောင်းအောင် ကြိုးစားရမှာက ကိုယ့်ရဲ့အလုပ်ပါ။”

Read more »


RECENT POSTS

သူတုို့သူတုို့၏ မှတ်ချက်များ

အမှတ်တရ ပုံရိပ်များ